فوتو: اشىق دەرەككوز
«مەملەكەت باسشىسىنىڭ كينەماتوگرافيا سالاسىن رەفورمالاۋ جونىندەگى تاپسىرماسىن ورىنداۋ ماقساتىندا ۇكىمەت «كينەماتوگرافيا تۋرالى» زاڭعا وزگەرىستەر مەن تولىقتىرۋلار ەنگىزىپ, كينو سالاسىن مەملەكەتتىك قولداۋدىڭ جاڭا تەتىگىن ازىرلەپ جاتىر. ەنگىزىلىپ جاتقان تۇزەتۋلەردىڭ قاتارىندا وتباسىلىق كورۋگە ارنالعان قازاق تىلىندەگى بالالارعا ارنالعان انيماتسيالىق فيلمدەردىڭ سانىن كوبەيتۋ تۋرالى نورمالار بار. ءتيىستى زاڭ جوباسى قازاقستان رەسپۋبليكاسى پارلامەنتىنىڭ ماجىلىسىندە قارالىپ جاتىر», دەدى ۇكىمەت باسشىسى.
پرەمەر-مينيستر ۇكىمەتتىڭ قاۋلىسىمەن بەكىتىلگەن قازاقستاننىڭ 2023-2029 جىلدارعا ارنالعان مادەني ساياساتىنىڭ تۇجىرىمداماسى ىسكە اسىرىلىپ جاتقانىن حابارلادى. ول وتاندىق فيلمدەردىڭ, ونىڭ ىشىندە انيماتسيالىق فيلمدەردىڭ ۇلەسىن 2022 جىلعى دەڭگەيدەن 2030 جىلى 35%-عا دەيىن ۇلعايتۋدى كوزدەيدى (2023 جىلى 18%, 2024 جىلى 21%, 2025 جىلى 25%, 2026 جىلى 28%, 2027 جىلى 30%, 2028 جىلى 32%, 2029 جىلى 35%).
«انيماتسيالىق فيلمدەردى شىعارۋ «كينەماتوگرافيا تۋرالى» زاڭ نەگىزىندە رەتتەلەدى. ياعني, بۇل زاڭدا انيماتسيا ونەرىنىڭ قۇرىلىمى كەڭىنەن قاراستىرىلعان», دەپ ناقتىلادى ولجاس بەكتەنوۆ.
