فوتو:قر پارلامەنتىنىڭ سەناتى ءباسپاسوز قىزمەتى
مەملەكەت باسشىسى «ورنىقتى دامۋ ماقساتتارىنا قول جەتكىزۋ جولىنداعى پروگرەستى جەدەلدەتۋدىڭ نەگىزگى وتپەلى پروتسەستەرىنە قاتىستى اۋقىمدى ءىس-قيمىلداردى جانداندىرۋ» اتتى كوشباسشىلار ديالوگىنىڭ ءبىرىنشى سەسسياسىندا سويلەگەن سوزىندە ۇلتتىق ستراتەگيالار مەن باعدارلامالاردى ازىرلەۋ كەزىندە ورنىقتى دامۋ قاعيداتتارىنىڭ ماڭىزى زور ەكەنىن اتاپ ءوتتى. مەملەكەت بيۋدجەتىنىڭ 80 پايىزى ورنىقتى دامۋ ماقساتتارىنا ساي كەلەدى.
ودم-عا قول جەتكىزۋ ماسەلەلەرىنە ارنالعان ماتەريالدار جيناعى – تالداۋشىلار مەن مەنتورلاردىڭ «تالداۋ مەكتەبى – شكولا اناليتيكي» جوباسىنىڭ وقىتۋ كۋرسى اياسىنداعى توپتىق جۇمىسىنىڭ قورىتىندىسى. ونىڭ ناتيجەلەرى ورتالىق جانە وڭىرلىك دەڭگەيلەردە نازارعا الىنادى. جيناقتا تالقىلانعان ماقساتتار كەدەيلىكتى جويۋ, دەنساۋلىق ساقتاۋ مەن ءبىلىم دەڭگەيىن ارتتىرۋ, سۋ ساپاسىن جاقسارتۋ جانە ەكونوميكالىق ءوسۋ ماسەلەلەرىنە قاتىستى.
«پرەزيدەنتىمىز قاسىم-جومارت كەمەل ۇلى توقاەۆتىڭ تاپسىرماسىمەن پارلامەنت ۇكىمەتپەن, ازاماتتىق قوعامداستىقپەن جانە ساراپشىلارمەن بىرگە ورنىقتى دامۋ ماقساتتارىن ىسكە اسىرۋ باعىتىندا جۇيەلى جۇمىس جۇرگىزىپ كەلەدى. ءبىز ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا اياسىندا بىرىككەن ۇلتتار ۇيىمىنىڭ قۇرىلىمدارىمەن بەلسەندى بايلانىس ورناتتىق. وسى تۇرعىدان كەلگەندە, تالداۋ مەكتەبىنىڭ تاقىرىبى اتالعان باعىتپەن ۇندەس ەكەنىن ايتا كەتكەن ءجون. الداعى ۋاقىتتا جارىق كورىپ وتىرعان جيناق مۇددەلى مەملەكەتتىك ورگاندارعا, تالداۋ ورتالىقتارىنا جانە ۋنيۆەرسيتەتتەرگە جىبەرىلەدى», دەدى پالاتا سپيكەرى قاتىسۋشىلارعا جوبانىڭ يدەياسىن قولداعاندارى ءۇشىن العىس ءبىلدىرىپ.
سونداي-اق ساراپشىلار پرەزيدەنتتىڭ تاپسىرماسىمەن قۇرىلعان ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا اياسىندا ورنىقتى دامۋدىڭ قالعان ماقساتتارى بويىنشا دا جوبالار ازىرلەۋ جانە بىرلەسىپ جۇمىس ىستەۋ باعىتىنداعى باستامالاردى تالقىلادى.
جيناقتى تانىستىرۋ بارىسىندا بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري, ەكونوميست الماس چۋكين, مەديا-مەنەدجەر ەلمار مۋرتازاەۆ جانە تاعى باسقا ساراپشىلار ءسوز سويلەپ, ءوز ۇسىنىستارىن ءبىلدىردى.
ەسكە سالا كەتەيىك, Taldau Talks ديالوگ الاڭىنىڭ العاشقى وتىرىسى بيىل ناۋرىز ايىندا ءوتتى. ول كەزدە ءىس-شاراعا ارنايى شاقىرىلعان سپيكەر ورتالىق ازيا تاقىرىبى بويىنشا بەلگىلى امەريكاندىق مامان فرەدەريك ستارر ءسوز سويلەگەن ەدى.
