بالاباقشاداعى بالاسىنان باستاپ ەڭكەيگەن قارتتارىنا دەيىن ساحناعا شىققان بەس اسكەري قىزمەتشىنىڭ وتباسى اراسىنداعى جەڭىمپازدى انىقتاۋ قازىلار القاسىنا قيىندىق تۋعىزدى. الايدا شاڭىراعىنا ونەرىمەن, ورلىگىمەن ۇلگى بولا بىلگەن كىشى سەرجانت نۇربول ماناپوۆتىڭ اكەسى تۇرعىنبەك اتا باستاعان اۋلەت جۇلدەلى 1-ورىندى يەلەندى.
اسكەري ءبولىمنىڭ ماتەريالدىق جانە تەحنيكالىق قامتاماسىز ەتۋ روتاسىندا قىزمەت اتقارىپ جۇرگەن كىشى سەرجانت نۇربول ماناپوۆتىڭ ءوزى دە ونەردەن كەندە ەمەس. اكەسى تۇرعىنبەك ماناپوۆ تا ۇزاق جىل اۋىل مەكتەبىندە ۇستازدىقتىڭ ۇلى جولىن وتەگەن. قوعامدىق ومىرگە بەلسەنە ارالاسىپ جۇرگەن تۇركىستان وبلىسىنىڭ قۇرمەتتى ازاماتى, اقىن, ءتول ونەرىمىزدى تورگە سۇيرەپ جۇرگەن دومبىراشى. اناسى بەيسەنكۇل ومارقۇلقىزى دا ءبىلىم وشاعىندا ۇستازدىق ەتكەن ۇلاعاتتى جان. قازىر ەكەۋى دە زەينەتكە شىققانىمەن, جاستارعا ءتالىمدى تاربيەسىمەن ءبولىسىپ وتىر. اناسى اۋىلدىڭ ءانشى اجەلەر توبىنىڭ مۇشەسى. وسىنداي مادەنيەت پەن ونەردى, تاريح پەن تاعىلىمدى جاستايىنان بويىنا ءسىڭىرىپ وسكەن اسكەري قىزمەتكەردىڭ دە ونەردەن كەندە بولۋعا قاقى جوق سەكىلدى.
قارا ءسوز بەن قارا ولەڭنىڭ قاناتىندا قالىقتاعان كىشى سەرجانت نۇربول بۇگىندە ۇجىمدا قىزمەتىمەن دە, قۇرمەتىمەن دە ەرەكشەلەنىپ جۇرگەن جاۋىنگەر. تۇركىستان وبلىسىنىڭ تولەبي اۋدانىنداعى اباي اۋىلىندا دۇنيەگە كەلگەن ول مەكتەپتى اياقتاعان سوڭ اتا-اناسىنىڭ جولىن قۋدى. جوعارى وقۋ ورنىن تامامداعان سوڭ, اۋىل مەكتەبىندە تاريح پانىنەن ساباق بەرەدى. وتانشىلدىقتى, ەل قورعاۋدى جاستايىنان ۇلكەندەردەن ۇلگى ەتكەن نۇربول ۋاقىتى كەلگەندە ازاماتتىق بورىشىن وتەۋگە اسكەرگە اتتاندى. العاشقى اسكەري قىزمەتىن لەنگىر قالاسىنداعى 6698 اسكەري ءبولىمىنىڭ 4-جەكە اتقىشتار روتاسىندا باستاعان نۇربول بۇگىندە ۇلتتىق ۇلان قاتارىندا جاۋىنگەرلىك قىزمەتىن ابىرويمەن اتقارىپ
كەلەدى.
«نۇربول ۇجىمدا وتە ابىرويلى. ازىلقوي, كوپتى وزىنە قاراتا الاتىن شەشەندىگى دە بار. سەرجانت رەتىندە ءبارىمىزدىڭ كومەكشىمىز. ساربازداردى جىلى سوزبەن باۋراپ, سانالى بۇيرىقپەن باسقاراتىن تاجىريبەلى اسكەري قىزمەتشى. بولىمدە بولاتىن بارلىق كوعامدىق ىستەردى ءوزى ۇيىمداستىرىپ جۇرەدى. بارىمىزگە ۇزدىك قىزمەتىمەن, ونەگەلى وتباسىمەن ۇلگى. اسكەري بولىمدە وتكەن «ونەرلى وتباسى» سايىسىندا اتا-اناسىمەن جاقىننان تانىسىپ, «جاقسىنىڭ جاقسىلىعىن ايت, نۇرى تاسىسىن» دەگەندەي, ادال ۇل, سەنىمدى سەرجانت تاربيەلەگەنى ءۇشىن العىسىمىزدى بىلدىردىك», دەيدى كومانديرى, لەيتەنانت ءادىلجان مەلدەبەك.
ونەرلى جاۋىنگەر لايلامەن 2008 جىلى وتباسىن قۇردى. بۇگىندە اۋىل مەكتەبىندە مەيىربيكە بولىپ كىزمەت اتقاراتىن ءلايلا ەكەۋى اتا-اناسىنىڭ قارا شاڭىراعىندا ەكى ۇل, ەكى قىز تاربيەلەپ وتىر. «اتا ونەرى – بالاعا مۇرا» دەپ حالقىمىز بەكەر ايتپاسا كەرەك. قىزدارى – قاراقات پەن ايزەرە سايىس كەزىندە ۇلتتىق ءبيدى ناقىشىن كەلتىرە ورىنداپ, تالانتتارىنا تاڭداي قاقتىردى. اتاسى ءسوزىن جازعان «تۋعان ولكە تابيعاتىن قورعايىق», «ۇلاندار جىرى» اندەرىن اۋەلەتىپ ايتىپ جۇرگەن نۇرقابىل مەن ايسۇلتان دا ونەرلى ورەندەر ەكەن. نۇربولدىڭ اپكەسى سالتانات تا ونەردەن كەندە ەمەس, مەكتەپتە مۋزىكا پانىنەن مۇعالىم. اراسىندا بالالارعا ءان جازاتىن سازگەرلىك قابىلەتى دە بار.
سايىس سوڭى ونەردىڭ ونەگەلى جولىمەن ءجۇرىپ كەلە جاتقان جاۋىنگەردىڭ وتباسى ورىنداعان ادەمى انمەن اياقتالدى. كورەرمەننىڭ ىقىلاسىنا بولەنگەن اۋلەتتىڭ اۋەلەتكەن ءانى ساربازداردىڭ دا وتانشىلدىق رۋحىن وياتۋعا سەبەپ بولدى.
