مەديتسينالىق ورتالىق بيىل مامىر ايىندا اشىلعان بولاتىن. ەندىگى جەردە كەپىلدىك بەرىلگەن كولەم اياسىندا تىركەلگەن حالىق ءۇشىن مۇندا تەگىن مەديتسينالىق قىزمەتتەر كورسەتىلسە, بۇعان جەدەل جاردەم, شۇعىل ستاتسيونارلىق جانە امبۋلاتوريالىق كومەك, ونكولوگيالىق كومەك, تۋبەركۋلەز كەزىندەگى پاللياتيۆتىك كومەك, بەيىندى مامانداردىڭ كەڭەسى, وڭالتۋ, بەلگىلى ءبىر اۋرۋلار جانە ءدارى-دارمەكتەر ءتىزىمى بويىنشا بۇيرىققا سايكەس ءدارى-دارمەكپەن قامتاماسىز ەتۋ كىرەدى. بۇگىندە مەديتسينالىق ورتالىققا اۋداننىڭ 23,2 مىڭ تۇرعىنى تىركەلگەن.
وسى ەمحاناعا جۋىردا قالا اكىمى ەربولات دوساەۆ ارنايى بارىپ, ۇجىممەن كەزدەسىپ قايتتى. الاڭى 5,5 مىڭ شارشى مەتر عيمارات مەديتسينالىق جابدىقتارمەن جابدىقتالعان. زاماناۋي ەمحانانىڭ ءبىر ەرەكشەلىگى – برونح دەمىكپەسى, برونحيت جانە پنەۆمونيا اۋرۋلارىن ەمدەۋگە ارنالعان تۇز شاحتاسىنا قوسا جاڭا تۋعان نارەستەلەر مەن 6 جاسقا دەيىنگى بالالارداعى ەستۋ قابىلەتىن تەكسەرە الاتىن اۋديو سكرينينگ اپپاراتى بار.
الماتى قالاسىنىڭ اكىمى جەرگىلىكتى تۇرعىندارمەن كەزدەسۋ بارىسىندا ەلگە ىڭعايلى بولۋ ءۇشىن جاڭا تەحنولوگيالاردى ەنگىزە وتىرىپ, كورسەتىلەتىن مەديتسينالىق قىزمەتتەردىڭ ساپاسىن ارتتىرۋ ماڭىزدى ەكەنىن تىلگە تيەك ەتىپ, وسىنداي ماڭىزدى الەۋمەتتىك نىسانداردى ىسكە اسىرۋعا قاتىساتىن مەتسەناتتاردى قولدايتىنىن ءبىلدىردى.
وسى «نۇركەنت» شاعىن اۋدانىندا مەملەكەتتىك مەديتسينالىق مەكەمەلەردىڭ جوق ەكەنىن, ەڭ جاقىن دەگەن №29 قالالىق ەمحانا «زەردەلى» شاعىن اۋدانىندا ورنالاسقانىن ايتا كەتۋ كەرەك. جەكەمەنشىك ەمحانانىڭ اشىلۋى «نۇركەنت», «اقكەنت», «زەردەلى», «العاباس», «تەرەكتى», «دارابوز» شاعىن اۋداندارىنىڭ 60 مىڭنان استام تۇرعىنىن مەديتسينالىق قىزمەتپەن قامتۋعا مۇمكىندىك بەرمەك. بۇل قالالىق ەمحانانىڭ جۇكتەمەسىن ازايتۋدا سەپتىگى ۇلكەن.
الماتى
