بىلىكتى, ءبىلىمدى مامان تابۋ ءۇشىن جۇمىس ۇسىنۋشىلاردىڭ قاتارىندا مامان تاپشىلىعىن كورىپ وتىرعان اۋداندار مەن قالالارداعى ءار سالا وكىلدەرى كەلىپ قاتىستى. ودان بولەك ء«ۇمز» اق, «بىرىككەن ەنەرگەتيكالىق كومپانيا» اق, «ۆوستوكتسۆەتمەت» جشس, «وسكەمەن قۇس فابريكاسى» اق سىندى الپاۋىت كومپانيالار مەن شاعىن كاسىپورىن يەلەرى دە جاۋاپتى ءارى ساۋاتتى مامان ىزدەپ كەلدى.
– «شىعىس مامانى» بوس جۇمىس ورىندار جارمەڭكەسىنىڭ ماقساتى – جۇمىس بەرۋشىلەر مەن جۇمىس ىزدەۋشى مامانداردى, جاستاردى ءبىر-بىرىمەن تىكەلەي بايلانىستىرىپ, جۇمىسسىزداردىڭ قاتارىن ازايتۋ ەدى. شىعىس قازاقستان وبلىسى بويىنشا 100-دەن استام جۇمىس بەرۋشى 1 500-دەن استام بوس جۇمىس ورنىن ۇسىنىپ وتىر. وڭىرىمىزدە ءتۇرلى ونەركاسىپ سالالارىندا, تاۋ-كەن وندىرىسىندە, ءبىلىم جانە مەديتسينا ماماندارىنىڭ تاپشىلىعى بار ەكەنى انىقتالىپ وتىر, – دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى دينارا قوجانوۆا.
مامان ىزدەۋشىلەردىڭ قاتارىندا مەملەكەتتىك باسقارۋ جۇيەسىنىڭ ۇيىمدارى, قارجى سالاسى, قۇقىق قورعاۋ ورگاندارى, ءبىلىم بەرۋ, دەنساۋلىق ساقتاۋ, مادەنيەت مەكەمەلەرىنىڭ وكىلدەرى دە بار. ايتا كەتسەك, ورمان شارۋاشىلىعى سالاسىندا دا مامان تاپشىلىعى بار.
– ءبىز بوس جۇمىس ورىندار جارمەڭكەسىنە بيىل ءۇشىنشى رەت قاتىسىپ وتىرمىز. قازىرگى تاڭدا پرەزيدەنت تاپسىرماسىمەن ۇلتتىق ۇلانعا قابىلداناتىن اسكەري قىزمەتشىلەردىڭ قاتارى ارتا ءتۇستى. وسىعان بايلانىستى بىزدە جاڭا لاۋازىمدار اشىلىپ جاتىر. سوندىقتان بوس تۇرعان لاۋازىمدارعا مامان ىزدەۋ ءۇشىن بۇگىنگى جارمەڭكەگە قاتىسىپ وتىرمىز. بىزگە جۇمىسقا كىرگەن اسكەري قىزمەتشىلەردىڭ وفيتسەر شەنىنە دەيىن كوتەرىلىپ, اسكەري وقۋ ورىندارىندا ءبىلىم الۋىنا مۇمكىندىگى بار. ودان بولەك, اسكەري قىزمەتشىلەرگە كورسەتىلەر الەۋمەتتىك كومەكتىڭ دە ءتۇرى كوپ, – دەيدى 3477 ۇلتتىق ۇلان اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, مايور اڭسار شاكەنوۆ.
جارمەڭكەگە قاتىسۋشىلارعا جاڭادان قۇرىلعان مارقاكول اۋدانىنان كەلگەن وكىلدەر كوپتەگەن بوس جۇمىس ورنىن ۇسىنسا, گلۋبوكوە اۋدانىنىڭ ءبىلىم ءبولىمى 99 بىرلىك بوس جۇمىس ورنىن ۇسىنىپ وتىرعانىن جەتكىزدى. سونىمەن قاتار وبلىسقا قاراستى بارلىق اۋدانداردىڭ وكىلدەرى دە وزدەرىندەگى بوس جۇمىس ورىندارى بارىن ايتىپ, جۇمىس ىزدەۋشىلەرگە اقىل-كەڭەس بەرىپ, بايلانىس نومىرلەرىن الماستى.
– تاربيە جۇمىسىن ۇيىمداستىرۋ ماماندىعى بويىنشا وقۋ ورنىن ءبىتىرىپ جاتىرمىن. بۇگىنگى بوس جۇمىس ورىندارى جارمەڭكەسىنە جۇمىس ىزدەپ كەلدىم. ەگەر وزىمە قولايلى جۇمىس تابىلسا, ىستەۋگە دايىنمىن. ازىرگە بىرنەشە جۇمىس بەرۋشىمەن سويلەستىم. تاعى دا باسقا جۇمىس ۇسىنۋشىلارمەن سويلەسە كەلە تاڭداۋ جاسايمىن, – دەيدى كوللەدج تۇلەگى كارينا مۇراتقىزى.
ايتا كەتەرلىگى, اشىق پلاتفورمادا جۇمىس بەرۋشىلەر ءوز كومپانيالارىمەن تانىستىرىپ, كەرەكتى مامان يەلەرى بويىنشا كانديداتتاردىڭ جەكە بازاسىن قالىپتاستىرۋدى ويعا العان. ونداعى ماقسات – وبلىسىمىزداعى مامان تاپشىلىعىن رەتتەپ, جۇمىسسىزدار قاتارىن ازايتۋ كوزدەلگەن.
ءسويتىپ, وسكەمەندە ءبىرىنشى رەت جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى, ەڭبەك موبيلدىلىگى ورتالىعى, قالالار مەن اۋدانداردىڭ مانساپ ورتالىقتارى, جەرگىلىكتى اتقارۋشى ورگاندارىمەن, جۇمىس بەرۋشىلەرمەن بىرلەسە وتىرىپ جۇمىس ىزدەپ جۇرگەن ادامدار, جاستار, جوعارى وقۋ ورىندارى, كوللەدج تۇلەكتەرى ءۇشىن «شىعىس مامانى» جۇمىس ۇسىنۋ وبلىستىق پلاتفورما ۇيىمداستىرىپ, وتكىزدى.
ءىس-شارانىڭ نەگىزگى ماقساتى جۇمىس بەرۋشىمەن تىكەلەي بايلانىس پلاتفورماسىن قۇرۋ ارقىلى جۇمىسسىز ازاماتتاردى, ءبىلىم بەرۋ ۇيىمدارىنىڭ تۇلەكتەرىن جانە جاستاردى جۇمىسقا ورنالاستىرۋعا جاردەمدەسۋ ەدى.
شىعىس قازاقستان وبلىسى
