فوتو: ن.بايبۋلين.
كەزدەسۋ بارىسىندا قازاقستان اسكەري-ساياسي, ەكونوميكالىق-ەكولوگيالىق, گۋمانيتارلىق جانە باسقا دا بارلىق نەگىزگى باعىت بويىنشا ۇيىممەن ناتيجەلى ءوزارا ءىس-قيمىل ورناتقانى ايتىلدى. وڭىردەگى ىنتىماقتاستىقتى دامىتۋعا باعىتتالعان ارنايى جول كارتاسىن ىسكە اسىرۋ اياسىندا قازاقستاننىڭ ورتالىق ازيا ەلدەرىمەن قارىم-قاتىناسىنىڭ پەرسپەكتيۆالارى دا ءسوز بولدى. تاراپتار ايماقتاعى گەوساياسي جاعدايدى تۇراقتاندىرۋ, ورنىقتى دامۋ ماقساتتارىن ىسكە اسىرۋ, سونداي-اق, ەكولوگيالىق جانە سۋ قاۋىپسىزدىگى ماسەلەلەرى بويىنشا بىرلەسكەن شارالارعا دا ەرەكشە نازار اۋداردى.
«بىلتىر قىركۇيەكتە دۋشانبەدە وتكەن ورتالىق ازيا مەملەكەتتەرى باسشىلارىنىڭ سامميتىندە قازاقستان پرەزيدەنتى ورتالىق ازيادا سۋ جانە ەنەرگەتيكا رەسۋرستارىن ءتيىمدى پايدالانۋدى قامتاماسىز ەتۋ ءۇشىن ۇزاق مەرزىمدى, ورنىقتى وڭىرلىك تەتىك قۇرۋدى قولدادى. قازاقستان سۋ ماسەلەلەرى بويىنشا ەقىۇ-نىڭ استاناداعى باعدارلامالىق كەڭسەسىمەن بەلسەندى ىنتىماقتاستىق ورناتتى. بىلتىر ورنىقتى دامۋ سالاسىنداعى ۇلتتىق ماقسات-مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا قۇرىلدى. ورتالىق ازيا مەملەكەتتەرى حالىقارالىق ارالدى قۇتقارۋ قورى ارقىلى ارال تەڭىزى باسسەينىندەگى ەكولوگيالىق جانە الەۋمەتتىك-ەكونوميكالىق ماسەلەلەردى شەشۋ ءۇشىن حالىقارالىق ۇيىمدارمەن ىنتىماقتاسا جۇمىس ىستەپ كەلەدى. وسى رەتتە ەقىۇ-عا سۋ ۇنەمدەۋ تەحنولوگيالارى سالاسىنداعى وزىق تاجىريبەنى زەردەلەۋگە جانە ورتالىق ازيادا, بۇكىل وڭىردە سۋ ماسەلەلەرى بويىنشا بەلسەندى ديالوگقا جاردەم بەرۋگە ارنالعان الماسۋ باعدارلامالارىن كەڭەيتۋگە تۇراقتى قولداۋ كورسەتكەنى ءۇشىن ريزاشىلىعىمىزدى بىلدىرەمىز», دەدى ماۋلەن اشىمباەۆ.
سونىمەن قاتار سەنات توراعاسى مەملەكەت باسشىسىنىڭ باستاماسىمەن قولعا الىنعان رەفورمالاردىڭ ىسكە اسىرىلۋ بارىسىنا جانە قازاقستاننىڭ قارقىندى دامۋىن قامتاماسىز ەتۋگە ارنالعان زاڭنامالىق جۇمىسقا توقتالدى. سونداي-اق ول 2022 جىلى وتكىزىلگەن رەسپۋبليكالىق رەفەرەندۋم ناتيجەسىندە كونستيتۋتسياعا بيلىكتى ورتالىقسىزداندىرۋعا, ساياسي جۇيەنىڭ تەجەمەلىگى مەن تەپە-تەڭدىگىن كۇشەيتۋگە جانە ەلدەگى ساياسي باسەكەلەستىككە قاتىستى ماڭىزدى تۇزەتۋلەر ەنگىزىلگەنىن اتاپ ءوتتى.
ءوز كەزەگىندە ي.بورچ قاسىم-جومارت توقاەۆتىڭ باسشىلىعىمەن قازاقستاندا جۇزەگە اسىرىلىپ جاتقان اۋقىمدى ساياسي جانە ەكونوميكالىق وزگەرىستەردى جوعارى باعالادى. سونداي-اق ىنتىماقتاستىقتى ودان ءارى نىعايتۋعا جانە بايلانىس اياسىن كەڭەيتۋگە مۇددەلى ەكەنىن ءبىلدىردى.
ودان بولەك, كەزدەسۋدە قازاقستاننىڭ ەۋروپالىق وداقپەن ىنتىماقتاستىق ماسەلەلەرى, ونىڭ ىشىندە جاسىل ەكونوميكاعا كوشۋ, ساۋدا جانە ينۆەستيتسيالار, ەنەرگەتيكا, اۋىل شارۋاشىلىعى, كولىك جانە لوگيستيكا, ءبىلىم جانە عىلىم, تۋريزم جانە باسقا دا سالالار بويىنشا قارىم-قاتىناستى ارتتىرۋ بارىسى تالقىلاندى.
