ەل كۇتكەن ەۋروپا چەمپيوناتى

17-چەمپيونات

العاش 1960 جىلى باستالعان دوپ دوداسىنىڭ تۇڭعىش چەمپيو­نى – كسرو فۋتبول كومانداسى. كەيىن يسپانيا قۇراماسى (1964, 2008, 2012) مەن نەمىس فۋتبولشىلارى (1972, 1980, 1996) ءار قايسىسى ءۇش دۇركىن جەڭىمپاز اتانسا, ەكى دۇركىن ەۋروپا چەمپيو­نى اتانۋ مارتەبەسى يتاليا (1968, 2020) جانە فرانتسيا (1984, 2000) قۇرامالارىنا بۇيىرىپتى.

سونداي-اق ءدۇبىرلى دودانىڭ كۋبوگىن ءبىر دۇركىن كوتەرگەن مەملەكەتتەر: پورتۋگاليا (2016), گرە­كيا (2004), دانيا (1992), ني­دەر­لاند (1988), چەحوسلاۆاكيا (1976) قۇرامالارى. بۇل چەمپيونات گەرما­نيادا بۇدان 36 جىل بۇرىن ءبىر دۇركىن وتكەن ەدى. بيىل 17-ءدۇبىرلى دودا ەكىنشى رەت ەلدىڭ 10 ستاديوندا ءوتىپ دۇركىرەپ ءوتىپ جاتىر.

 رونالدۋدىڭ سوڭعى جارىسى

ءدال قازىر 39 جاستىڭ جالىنا شىققان پورتۋگاليالىق اتاقتى اياقدوپشى كريشتيانۋ رونالدۋدىڭ سوڭعى چەمپيوناتى. بۇل جىگىت قازىرگى تاڭدا ءوزى قاتىسقان ەۋروپانىڭ ءتورت چەم­پيوناتىندا (2004, 2008, 2012, 2016) توردا تۋلاتقان دوپ سانىنان كوش باستاپ تۇر. بۇل رەكوردى جۋىق جىلدارى جاڭارۋى قيىن, دەيدى بىلەتىندەر.

ەڭ جاس توپ يسپانيا قۇراماسى

چەمپيوناتتىڭ تاعى ءبىر جا­ڭالىعى – يسپانيا قۇراماسى ويىنشىلارىنىڭ ورتاشا جاسى – 20. ايتالىق, وڭ قاناتتاعى شابۋىلشى لامينە يامال (Lamine Yamal) 16 جاستا بولسا, قالعان 9 فۋتبولشى 23-25 جاس ارالىعىنداعى ورەندەر. بۇل قۇراما اياقدوپ جانكۇيەرلەرى «اجال الاڭى» دەپ اتاعان «ۆ» تو­بىندا (يسپانيا, يتاليا, ال­بانيا, حورۆاتيا) ونەر كورسەتىپ جاتىر.

چەمپيوناتتىڭ جۇلدە قورى 331 ملن ەۋرو

جەكە-جەكە تالداپ تۇسىندىرەر بولساق, توپتىق كەزەڭگە جولداما العان ءار كومانداعا 9,25 ملن ەۋرو سىياقى تاعايىندالسا, توپتىق ويىنداعى جەڭىسى ءۇشىن 1 ملن ەۋرو, تەڭ تۇسكەن جاعدايدا 500 مىڭ ەۋرو, سوڭعى تورتتىككە ىلىككەن قۇراماعا 2,5 ملن ەۋرو, جارتىلاي فينالدىق ويىن جەڭىمپازدارىنا 4 ملن ەۋرو, ەكىنشى ورىن ءۇشىن 5 ملن ەۋرو, ال چەمپيون تۇعىرىنا كوتەرىلگەن كوماندا 8 ملن ەۋرو سىيلىققا يە بولادى.