ءيا, الەمنىڭ تۇكپىر-تۇكپىرىندە ءبىلىم الىپ, تالاپ-تالانتىمەن كوپتى مويىنداتىپ جۇرگەن جاستار قازاقتا كوپ. سونىڭ ءبىرى – وسى ماليكا. ول نيۋ-يوركتەگى اسكەري اكادەميانى تابىستى ءتامامداپ, ءبىتىرۋ كەشىندە ەڭ ۇزدىك ستۋدەنت رەتىندە ءسوز سويلەۋ مارتەبەسىنە يە بولعان. كوپتى ءتانتى ەتكەنى ونىڭ ۇزدىك اتانعاندىعىنان بۇرىن, مۇحيتتىڭ ارعى بەتىندە التى قۇرلىق وركەنيەتىنىڭ باسىن قوسقان اقش-تا انا تىلىندە ءۇن قاتىپ, اتا-اناسىنا العىسىن جەتكىزۋى بولدى.
ء«اردايىم ماعان جاقسىلىق تىلەپ, ەركەلىگىمدى كوتەرىپ, الىستان ۋايىمداپ, مەنى ساعىنىپ جۇرەتىندەرىڭىز ءۇشىن كوپ راقمەت! اۋىرماڭىزدار, ءومىر جاستارىڭىز ۇزاق بولسىن!» دەپ جاس تۇلەك اتا-اناسىنا العىسى مەن پەرزەنتتىك جۇرەكجاردى لەبىزىن ءبىلدىردى.
ءبىتىرۋ كەشىندەگى تولقىنىستى ءسات تاسپالانعان بۇل ۆيدەونى نيۋ-يوركتە جۇرگەن قازاقستان فوتوگرافى اركەن اۆان جاقىندا ءوزىنىڭ Instagram پاراقشاسىندا جاريالادى. ايتۋلى شاراعا ارنايى تاپسىرىسپەن باسقا بالانى سۋرەتكە تۇسىرۋگە بارعان ول مىنبەردەن سويلەپ تۇرعان قازاق قىزىن كورگەندە تاڭ قالعانىن جانە شىنايى قۋانعانىن جاسىرمادى.
«مەن ءۇشىن بۇل ءبىر كۇتپەگەن جايت بولدى. جۇمىس بارىسىمەن نيۋ-يورك اسكەري اكادەمياسىنىڭ تۇلەكتەرىن فوتوعا تۇسىرۋگە بارعانمىن. ديپلوم الۋ ساتىندە ءبىلىم سالاسىندا جوعارى ناتيجە كورسەتكەن قازاق قىزىن ۇزدىك ستۋدەنت رەتىندە ساحناعا شاقىردى. مىنبەرگە جارقىراي كوتەرىلگەن ماليكا الەمنىڭ تۇكپىر-تۇكپىرىنەن جينالعان قاۋىم الدىندا قازاق تىلىندە ءۇن قاتىپ, اتا-اناسى مەن ۇستازدارىنا العىسىن ءبىلدىردى. قازاق قىزىنىڭ قايسارلىعى مەن ۇلتجاندىلىعى ءسۇيسىنتتى. بۇل ءسات مەنى ەرەكشە تولقىتتى», دەپ جازدى فوتوگراف الەۋمەتتىك جەلىدەگى پاراقشاسىندا.
بەينەجازبادا تاسپالانعانداي, نيۋ-يوركتە وتكەن ومىرىندەگى ماڭىزدى ساتتەرىنىڭ ءبىرى – ديپلوم الۋ كەشىندە ماليكا ءوزىنىڭ جۇرەكجاردى لەبىزىن اعىلشىن تىلىندە باستاپ, قازاقشا جالعاستىرىپ, كەيىن نەمىسشە سويلەيدى. جانارىنا ۇلتىنا دەگەن ۇلى ماحابباتتى سىيدىرعان ماليكاعا ءبىز دە ءسات ساپار تىلەيمىز.
