فوتو:قر پارلامەنتى سەناتى ءباسپاسوز قىزمەتى
ماۋلەن اشىمباەۆ تاجىكستان قازاقستاننىڭ ستراتەگيالىق سەرىكتەسى جانە ماڭىزدى وداقتاسى ەكەنىن اتاپ ءوتتى. كەزدەسۋدە مەملەكەت باسشىلارىنىڭ جەكە دوستىق پەن سەنىمگە نەگىزدەلگەن بايلانىسى مەن سىندارلى ديالوگى وسىنداي ءتيىمدى ىنتىماقتاستىقتىڭ كەپىلى ەكەنى ايتىلدى.
سونداي-اق سەنات توراعاسى ەكى ەل پارلامەنتتەرىنىڭ پالاتالارى اراسىنداعى ىنتىماقتاستىق جونىندەگى كوميسسيانىڭ ءبىرىنشى وتىرىسىنا نازار اۋدارىپ, ونىڭ قورىتىندىسى بويىنشا قول قويىلعان پارلامەنتارالىق ىنتىماقتاستىقتى دامىتۋ جونىندەگى جول كارتاسى اياسىندا ءوزارا ءىس-قيمىلدى ارتتىرۋدىڭ ماڭىزى زور ەكەنىن ايتتى.
«ەلدەرىمىز اراسىنداعى قارىم-قاتىناس بارلىق سالادا قارقىندى دامىپ كەلەدى. ستراتەگيالىق بايلانىسىمىزدى ودان ءارى ارتتىرۋدىڭ ماڭىزدى تەتىكتەرىنىڭ ءبىرى پارلامەنتارالىق ىنتىماقتاستىقتى نىعايتۋ ەكەنى انىق. پارلامەنتتەرىمىزدىڭ پالاتالارى اراسىنداعى ىنتىماقتاستىق جونىندەگى كوميسسيانىڭ ەكىنشى وتىرىسى بارىسىندا بەلگىلەنگەن مىندەتتەر الداعى بىرلەسكەن جۇمىسىمىزدا ايرىقشا مانگە يە. ولار كليماتتىڭ وزگەرۋىنە قارسى كۇرەس, سۋ رەسۋرستارىن ءتيىمدى پايدالانۋ جانە باسقا دا ماسەلەلەردە ءوزارا سەرىكتەستىكتى نىعايتا تۇسەدى دەپ سەنەمىز», دەدى ماۋلەن اشىمباەۆ.
سونداي-اق كەزدەسۋ بارىسىندا تاراپتار ساۋدا-ەكونوميكالىق, كولىك-لوگيستيكالىق جانە مادەني-گۋمانيتارلىق سالالارداعى ءوزارا ءىس-قيمىلدى دامىتۋ ماسەلەلەرىنە دە نازار اۋداردى.
ءوز سوزىندە رادجاببوي احمادزودا كەزدەسۋ ءۇشىن ماۋلەن اشىمباەۆقا العىسىن ءبىلدىرىپ, الداعى ۋاقىتتا پارلامەنتارالىق ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.
سونىمەن قاتار كەزدەسۋ بارىسىندا تاراپتار ءححى عاسىردا ورتالىق ازيانى دامىتۋ ماقساتىندا دوستىق, تاتۋ كورشىلىك جانە ىنتىماقتاستىق تۋرالى شارت جونىندە پىكىر الماستى. اتالعان قۇجات شولپان-اتا قالاسىندا وتكەن ورتالىق ازيا مەملەكەتتەرى باسشىلارىنىڭ IV كونسۋلتاتيۆتىك كەزدەسۋىندە كەلىسىلگەن ەدى.
قىرمىزى جۇماعاليقىزى,
ەۇۋ ستۋدەنتى
