قازىردىڭ وزىندە كۇن سايىن جاڭا سكۆەرگە 800-گە جۋىق بالا باراتىنى بەلگىلى بولىپ وتىر. الماتىنىڭ ناۋرىزباي اۋدانى, قالقامان شاعىن اۋدانىنداعى كولەمى 0,8 گا بولاتىن جاڭا قوعامدىق ورىندى كورۋگە بارعان الماتى قالاسىنىڭ اكىمى ەربولات دوساەۆ جەرگىلىكتى تۇرعىنداردىڭ رياسىز قوشەمەتىنە بولەندى دەسەك اسىرە ايتالعان ءسوز ەمەس.
اقيقاتىندا بۇرىن بۇل اۋماق قاراۋسىز جاتقان جەر بولعان, ال قازىر «حالىق قاتىساتىن بيۋدجەت» باعدارلاماسىنىڭ ارقاسىندا ەلدىڭ بوس ۋاقىتىن وتكىزەتىن ادەمى جانە ىڭعايلى كەڭىستىككە اينالدى. كۇن سايىن الاڭعا مىڭعا جۋىق ادام بارسا, جوعارىدا اتاپ وتكەندەي, ونىڭ 800-گە جۋىعى – بالالار مەن جاسوسپىرىمدەر.
جۇرتقا جايلى بولۋى ءۇشىن 2 مىڭ شارشى مەتر جاياۋ جۇرگىنشىلەر ايماعى اباتتاندىرىلىپ, 17 بالالار ويىن كەشەنى مەن 13 سپورتتىق ترەناجەر ورناتىلدى, باسكەتبول-ۆولەيبول الاڭدارى, فۋتبول الاڭى, تەننيس ۇستەلدەرى بار. سونىمەن قاتار 400-دەن استام جاسىل جەلەك وتىرعىزىلدى, اۆتوماتتاندىرىلعان سۋارۋ جۇيەسى ورناتىلدى, جاڭبىر سۋىن بۇرۋ ءۇشىن ارىق جۇيەسى جابدىقتالدى.
جەرگىلىكتى حالىققا قالا اكىمى ەربولات دوساەۆپەن ديدارلاسۋدىڭ ءساتى تۇسكەن كەزدە ناۋرىزباي اۋدانىنىڭ تۇرعىنى زاۋرەش مۇستافاەۆا: «جىل سايىن ءبىزدىڭ اۋداندا جاڭا دەمالىس الاڭدارى سالىنىپ جاتقانىنا قۋانىشتىمىز. بۇرىن بۇل ۋچاسكە قاراۋسىز جاتقان سوڭ مۇندا بەلگىلى ءبىر تۇرعىلىقتى جەرى جوق جاندار مەكەندەيتىن. قازىر بۇل زاماناۋي الاڭعا اينالدى, مۇندا بارلىعى قاراستىرىلعان. جاڭا دەمالىس ورنى كىشكەنتاي بالالار ءۇشىن ءتىپتى جاقسى بولدى. ولار كۇندىز-ءتۇنى وسىندا وينايدى. مۇندا جاسوسپىرىمدەر مەن جاستار سپورتپەن شۇعىلدانا الادى. زەينەتكەرلەر دە وسىندا دەمالادى. وسى جەرگە پاترۋلدىك كۇزەتتى كۇشەيتۋدى سۇرايمىز», دەدى.
تۇرعىندارمەن كەزدەسۋ بارىسىندا قالا اكىمى ەربولات دوساەۆ ناۋرىزباي اۋدانىندا قوعامدىق قاۋىپسىزدىكتى قامتاماسىز ەتۋ ءۇشىن بەينەمونيتورينگ جۇيەسىنىڭ 600 كامەراسى ورناتىلاتىنىن جەتكىزدى. ولاردىڭ ۇشەۋى جاڭا الاڭعا ورنالاستىرىلعان. كامەرالاردان بەينەماتەريالدار بىردەن قالا پوليتسياسىنا كەلىپ تۇسەدى.
«الداعى ۋاقىتتا مۇندا تاعى 4 كامەرا ورناتىپ, وسى ارقىلى تۇرعىنداردىڭ تولىق قاۋىپسىزدىگىن قامتاماسىز ەتەمىز. ءبىز جاڭا فورماتتاعى سكۆەر سالدىق. مۇندا ءارتۇرلى ويىن جانە سپورت الاڭدارى, كىشى ساۋلەت پىشىندەرى, سونىڭ ىشىندە اعاشتان جاسالعاندار بار. بىرتە-بىرتە ءبىز جەرگىلىكتى تۇرعىنداردىڭ جايلى ءومىر ءسۇرۋى ءۇشىن جاڭا قوعامدىق كەڭىستىكتەر قۇرىپ, جاقسارتاتىن بولامىز. مىسالى, ءبىز قارعالى وزەنىنىڭ جاعاسىندا سەرۋەندەۋ ايماعىن قۇرۋدى جوسپارلاپ وتىرمىز», دەدى قالا باسشىسى.
وعان قوسا «حالىق قاتىساتىن بيۋدجەت» (حقب) اياسىندا ناۋرىزباي اۋدانىندا بيىل بارلىعى 2,5 ملرد تەڭگەگە 40 جوبا ىسكە اسىرىلماق.
جالپى, الماتىدا بيىل «حقب» جوباسىنا 18,8 ملرد تەڭگە بولىنگەن, بۇل وتكەن جىلمەن سالىستىرعاندا 5,8 ملرد تەڭگەگە ارتىق. قالا تۇرعىندارى اۋلالاردى, قوعامدىق كەڭىستىكتەردى اباتتاندىرۋ, سپورت جانە ويىن الاڭدارىن قۇرۋدا 364 جوبا ۇسىنىپ, ءوز ۇلەستەرىن قوسۋعا, قالاۋلارىن بىلدىرۋگە مۇمكىندىك الدى.
الماتى
