ەسەك ءۇيىرى بايزاق, تالاس اۋداندارىنىڭ ءورىسىن تولتىرعان. اڭگىسى اقىرىپ, بيەسى باقىرىپ, 4 اۋىلدىڭ بەرەكەسىن الادى دەيدى جۇرت. باسىندا 1 700-دەي بولعان ەسەكتىڭ سانى قازىر 2 300 باسقا كوبەيگەن. بىراق باعىتىن قايىرىپ باعىپ, ورىستەتكەن ەشكىم جوق. سويتسە, جەر يەسى ەسەك جيناعان ازاماتپەن كەلىسىمدى بۇزىپ, قورشالعان قورانىڭ ەسىگىن اشىپ جىبەرگەن.
- بوس جاتقان جەردى ۋاقىتشا بەرگەن. سودان ءبىز قولعا العاننان كەيىن ول انا كەلىسىمشارت جاساسقان اداممەن كەلىسىمىن بۇزدى عوي, – دەيدى بايزاق اۋداندىق اۋىل شارۋاشىلىعى ءبولىمىنىڭ باسشىسى ەركەباي رىساليەۆ.
بەلگىلى بولعانداي, بۇل ەسەك ونەركاسىبىن دامىتۋعا باستالعان جوبا ەكەن. جەكە ادامنىڭ جەرىن جالعا العان ازامات جەر-جەردەن 25-30 مىڭنان ەسەك الىپ, جيناعان. ەندىگى جەردە ونىڭ سانىن 10 مىڭعا جەتكىزۋ جوسپارلانىپ وتىر. وسىلايشا, ينۆەستيتسيا قۇيۋعا نيەت بىلدىرگەن ينۆەستورمەن ءوڭىر باسشىلارى اقىلداسىپتى.
- ءبىز ەسەك شارۋاشىلىعىن دامىتىپ, ءونىمىن قىتايعا الىپ كەتپەكپىز. قازىر ەسەك باسىن 10 مىڭ باسقا جەتكىزۋ جوسپارى بار. ونىڭ ءسۇتى, ەتى – ءتۇرلى ءدارى شىعارۋعا تاپتىرماس شيكىزات. سۇرانىس وتە زور. بىزگە باعۋعا, جەم-ءشوبىن ازىرلەۋگە 10 مىڭ گەكتارداي جەر بولسا جەتەدى. اكىمدىكپەن كەلىسسوز جۇرگىزدىك, – دەيدى قىتايلىق ينۆەستور سۋي چىن ىن 31 ارناعا بەرگەن جاۋابىندا.
جوبا ىسكە اسسا, وڭىرگە 50 ميلليون يۋان, ياعني 3,5 ميليارد تەڭگە ينۆەستيتسيا قۇيىلادى. بۇل ۇسىنىسقا جەرگىلىكتى بيلىكتىڭ بۇيرەگى بۇرىلعانداي. ال ەتىنىڭ ەلگە تاراپ كەتپەۋىنە ەش كۇمان بولماۋى كەرەك.
- ەسەكتەرگە چيپ سالىپ, سول چيپتەردى بازاعا ەنگىزىپ, تىركەۋگە الۋ ماسەلەسى جولعا قويىلدى. اباي اتامىزدىڭ دا «ەسەكتىڭ ارتىن جۋساڭ دا مال تاپ» دەگەنى بار, – دەيدى جامبىل وبلىستىق ۆەتەريناريا باسقارماسى باسشىسىنىڭ ورىنباسارى ولجاس كوكەي.
وسىلايشا, كوپ ۇزاماي جامبىل وبلىسىنان ەسەك ەتىن ەكسپورتتاۋ قولعا الىناتىن بولدى. الايدا ازىرگە جەرى جوق ينۆەستور مىڭعىرعان ەسەكتى باسى اۋعان جاققا جىبەرۋگە ءماجبۇر.
