جۋرناليستەردىڭ ءتول مەرەكەسى قارساڭىندا «جاڭارۋ» جالپىۇلتتىق قوعامدىق بىرلەستىگى ارنايى جيىن وتكىزىپ, باق وكىلدەرىن جەمقورلىقپەن كۇرەسكە بايلانىستى ورتاق ىسكە بىرلەسە جۇمىلۋعا شاقىردى. جيىندا مەملەكەتتىك قۇرىلىمداردا, قوعامنىڭ بارلىق سالاسىندا اشكەرەلەنگەن جەمقورلاردىڭ اتى-ءجونىن, شىققان تەگىن, جۇرگەن ورتاسىن تولىق جازىپ كورسەتۋدىڭ ماڭىزىن, اششى جاريالىقتى جۇرتتىڭ ەسىنە سالىپ وتىرۋدىڭ قاجەتتىگى ايتىلدى.
مادەنيەت جانە اقپارات مينيسترلىگىنىڭ جانىنداعى «ازاماتتىق باستامالاردى قولداۋ ورتالىعىنىڭ» قولداۋىمەن «جاستاردىڭ قۇقىقتىق ساۋاتتىلىعىن جانە قۇقىق قورعاۋ ورگاندارىنا سەنىم دەڭگەيىن ارتتىرۋ ءىس-شارالار كەشەنىن وتكىزۋ» اتتى الەۋمەتتىك جوبا اياسىندا وتكەن ءىس-شاراعا ەلوردالىق تانىمال باق باسشىلارى مەن وكىلدەرى, ستۋدەنتتەر قاتىستى. جيىندا «جاڭارۋ» بىرلەستىگىنىڭ توراعاسى مەلس سەمعاليەۆ, مەملەكەت جانە قوعام قايراتكەرى ورالباي ابدىكارىم ۇلى, مەملەكەت جانە قوعام قايراتكەرى دارحان مىڭباي, «باس رەداكتورلار كلۋبى» قوعامدىق بىرلەستىگىنىڭ ۆيتسە-پرەزيدەنتى مۇراتبەك توقتاعازين, «Elorda Aqparat» باس ديرەكتورى ولجاس سىدىقبەك, ت.ب. قوناقتار وي-پىكىرىن ورتاعا سالدى.
ءىس-شارادا سىبايلاس جەمقورلىقتىڭ الدىن الۋ جونىندەگى ۇسىنىستاردى جۋرناليستەرمەن بىرگە تالقىلاپ, جاۋاپتى ورىندارعا بىرلەسە دايارلاۋ ماسەلەسى كوتەرىلدى. بولاشاعىن جۋرناليستيكامەن بايلانىستىرعان ستۋدەنتتەر وزدەرىن قىزىقتىرعان ساۋالدارىن جولداپ, تۇشىمدى جاۋاپ الدى. جيىنعا قاتىسۋشى ۇيىمدار, رەداكتسيا باسشىلارى, زاڭگەرلەر, بولاشاق جۋرنالشىلار سىبايلاس جەمقورلىققا قارسى كۇرەستە كۇش بىرىكتىرۋ بويىنشا مەموراندۋمعا قول قويدى.
كەزدەسۋ بارىسىندا قوعامدىق ۇيىمداردىڭ, بۇقارالىق اقپارات قۇرالدارىنىڭ سىبايلاس جەمقورلىققا قارسى مەملەكەتتىك ساياساتتىڭ جۇزەگە اسىرىلۋىنا قاتىسۋى, «جاڭارۋ» بىرلەستىگىنىڭ جاستاردىڭ قۇقىقتىق ساۋاتىن جانە قۇقىق قورعاۋ ورگاندارىنا دەگەن سەنىم دەڭگەيىن ارتتىرۋ ماسەلەلەرى دە تالقىلانىپ, جەمقورلىققا قارسى بىرلەسىپ اتقاراتىن ءىس-قيمىلدارىنا بايلانىستى يدەيالار مەن ۇسىنىستار ورتاعا سالىندى.
