فوتو: dauletten.kz
زاڭعا حالىقتىڭ بورىشتىق جۇكتەمەسىنىڭ وسۋىنە جول بەرمەۋگە قاتىستى بىرقاتار ەرەجەلەر ەنگىزىلدى.
ازاماتتار بورىشىنىڭ ءوسۋىن بولدىرماۋ ءۇشىن مەرزىمى وتكەنىنە 90 كۇننەن اسقان بەرەشەگى بار تۇلعالارعا كەپىلسىز تۇتىنۋشىلىق قارىزدار بەرۋگە تىيىم سالىنادى. الايدا قارىزدى قايتا قارجىلاندىرۋعا بۇل تىيىم جۇرمەيدى.
اسكەري قىزمەتشىلەر مەرزىمدى اسكەري قىزمەتىن وتكەرۋ كەزىندە جانە دەموبيليزاتسيادان كەيىن 60 كۇن ىشىندە العان قارىزىنا سىياقى ەسەپتەۋدەن بوساتىلادى.
سونىمەن قاتار 2026 جىلعى 1 مامىرعا دەيىن بانكتەر مەن ميكروقارجى ۇيىمدارىنا ازاماتتاردىڭ قارىزىن كوللەكتورلىق اگەنتتىكتەرگە بەرۋگە تىيىم سالىندى. 2026 جىلعى 1 مامىردان باستاپ كوللەكتورلىق اگەنتتىكتەرگە جەكە تۇلعالاردىڭ قۇقىقتارىن (تالاپتاردى) بەرۋ شارتتارى قاتاڭداتالدى. ءدال وسى كۇننەن باستاپ تەك بەرەشەك تۋىنداعان ساتتەن 24 اي وتكەن جانە بەرەشەكتى رەتتەۋ جونىندەگى راسىمدەر مىندەتتى تۇردە جۇرگىزىلگەن جاعدايدا عانا قارىز الۋشى جەكە تۇلعالارعا قاتىستى قۇقىقتاردى (تالاپتاردى) كوللەكتورلارعا بەرۋگە بولادى.
بانك ومبۋدسمانىنىڭ بارلىق بانكتىك قارىز شارتتارى بويىنشا داۋلاردى قاراۋ قۇزىرەتى كەڭەيتىلدى (بۇعان دەيىن ول تەك يپوتەكالىق شارتتارعا قاتىستى داۋلاردى قارايتىن) جانە ميكروقارجى ومبۋدسمانى ينستيتۋتى ەنگىزىلدى. جەكە تۇلعالار ومبۋدسمانداردىڭ شەشىمىمەن كەلىسكەن جاعدايدا, مۇنداي شەشىمدەردى قارجى ۇيىمدارى ورىنداۋعا مىندەتتى.
ومبۋدسماندار حالىقتىڭ الەۋمەتتىك وسال توپتارىنا جاتاتىن بورىشكەر جەكە تۇلعالاردىڭ وتىنىشتەرىن قاراعان كەزدە كەپىلگە الىنعان جىلجىمايتىن م ۇلىكتى ءوندىرىپ الۋعا تىيىم سالىنادى. سونداي-اق وسى ساناتقا جاتاتىن ازاماتتار بۇعان دەيىن مىندەتتەمەنى ورىنداماعانىنا بايلانىستى بانك بالانسىنا ءوتىپ كەتكەن جالدامالى باسپاناسىن ساتىپ الۋعا قۇقىلى.
كامەلەتكە تولماعان بالالارى بار وتباسىلاردى جانە 1 نەمەسە 2 توپتاعى مۇگەدەكتىگى بار ادامداردى جىلىتۋ ماۋسىمىندا جالعىز باسپاناسىنان ماجبۇرلەپ شىعارۋعا تىيىم سالىنادى.
ءوندىرىپ الۋعا جاتپايتىن جانە بەرەشەكتى ماجبۇرلەپ ءوندىرىپ الۋ شارالارىن قابىلداعان كەزدە قارىز الۋشىنىڭ بانكتىك شوتىندا قالۋعا ءتيىس اقشا سوماسى ەڭ تومەنگى كۇنكورىس دەڭگەيىنىڭ (43407 تەڭگە) ەكى ەسەلەنگەن مولشەرىنە (86814 تەڭگە) دەيىن ۇلعايتىلدى.
20 اەك-كە (73840 تەڭگە) دەيىنگى اكىمشىلىك ايىپپۇلداردى جانە سالىق بەرەشەگىن ءوندىرىپ الۋ كەزىندە وڭايلاتىلعان ءىس جۇرگىزۋ ءتارتىبى ەنگىزىلدى. ءىستى ادىلەت ورگاندارى اۆتوماتتاندىرىلعان اقپاراتتىق جۇيەسى ارقىلى جۇرگىزەدى. بۇل ازاماتتاردى جەكە سوت ورىنداۋشىلارىنىڭ قىزمەتتەرىنە اقى تولەۋ مىندەتتەمەسىنەن بوساتادى. مۇنداي مەحانيزممەن كەلىسپەگەن جاعدايدا اتقارۋشىلىق ءىس جۇرگىزۋ جالپىعا بىردەي بەكىتىلگەن ءتارتىپ بويىنشا جۇزەگە اسىرىلادى.
ازاماتتاردىڭ بانكروتتىق راسىمىنە ءوتىنىش بەرۋ ءتارتىبى جەڭىلدەتىلدى. ەندى ول ءۇشىن كرەديتورلار ءتىزىمىن, مەرزىمى وتكەن بەرەشەكتى رەتتەۋ جانە ءوندىرىپ الۋ راسىمدەرىنىڭ جۇرگىزىلگەنىن راستايتىن قۇجاتتىڭ كوشىرمەسىن بەرۋ تالاپ ەتىلمەيدى. مۇنداي دەرەكتەر كرەديتتىك بيۋرودان سۇراتىلادى. ال كرەديتورلار وعان ءتيىستى مالىمەتتى جىبەرۋگە ءتيىس.
الاياقتىق ارەكەتتەرگە جول بەرمەۋ ءۇشىن ونلاين قارىزدار بويىنشا مىندەتتى تۇردە بيومەتريالىق سايكەستەندىرۋ ەنگىزىلدى. بۇعان دەيىن كرەديتتىك بيۋرودا ازاماتتاردىڭ نەسيە الۋدان ەرىكتى تۇردە باس تارتقانى تۋرالى مالىمەت بولعان جاعدايدا قارىز بەرۋگە تىيىم سالىنعان ەدى. وسى زاڭدا اتالعان تىيىمدى بۇزا وتىرىپ بەرىلگەن قارىزدار بويىنشا بەرەشەكتى قارجى ينستيتۋتتارى كەشىرۋ تالابى ەنگىزىلدى. سونداي-اق قابىلدانعان زاڭعا سايكەس اتالعان تىيىم لومباردتار بەرگەن ميكروكرەديتتەرگە تارالمايدى.
الاياقتاردىڭ ىقپالىمەن راسىمدەلگەنىن دالەلدەيتىن سوت اكتىلەرى بار بەرەشەكتەر زاڭ قولدانىسقا ەنگىزىلگەن كۇننەن باستاپ كەشىرىلەدى.
سونىمەن قاتار زاڭ ارنايى ەلەكتروندى ساۋدا الاڭىن قۇرۋ ارقىلى بانكتەر مەن ميكروقارجى ۇيىمدارىنىڭ اكتيۆتەرىن ساتۋ مەحانيزمدەرىن جەتىلدىرەدى.
زاڭنىڭ ءماتىنى باسپاسوزدە جاريالانادى.
