فوتو: akorda.kz
زاڭ ەنەرگەتيكا سالاسىن قولداۋ جانە دامىتۋ تەتىكتەرىن ودان ءارى جەتىلدىرۋگە باعىتتالعان.
اتاپ ايتقاندا, جاڭارتىلاتىن ەنەرگەتيكا سالاسىندا شاعىن گەنەراتسيانى دامىتۋ ءۇشىن «جاڭارتىلاتىن ەنەرگيا كوزدەرىن پايدالانۋ جونىندەگى شاعىن ماسشتابتى وبەكت» (بۇدان ءارى – شاعىن ماسشتابتى جەك) ۇعىمى ەنگىزىلدى. مۇنداي تيپتەگى وبەكتىلەردىڭ ساناتىنا قۋاتى 200 كيلوۆاتتان اسپايتىن, جاڭارتىلاتىن ەنەرگيا كوزدەرىن پايدالانا وتىرىپ ەلەكتر جانە/نەمەسە جىلۋ ەنەرگياسىن وندىرەتىن تەحنيكالىق قۇرىلعىلار جاتادى.
شاعىن ماسشتابتى جەك يەلەرى وسىنداي وبەكتىلەر وندىرگەن ەلەكتر ەنەرگياسىن جانە/نەمەسە جىلۋ ەنەرگياسىن ءوز قاجەتتىلىكتەرىنە قازىرگىدەي پايدالانا بەرەدى جانە ارتىق ەلەكتر قۋاتىن ەنەرگيامەن جابدىقتاۋشى ۇيىمعا ساتا الادى. ال اتالعان ۇيىم ونى ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتى بەلگىلەيتىن شەكتى باعامەن ساتىپ الادى.
ەلىمىزدىڭ گيدروەنەرگەتيكالىق الەۋەتىن ارتتىرۋ ماقساتىندا 2023 جىلعى 1 شىلدەگە دەيىن پايدالانۋعا بەرىلگەن, جيىنتىق قۋاتى 10 مەگاۆاتتان اسپايتىن شاعىن گيدروەلەكتر ستانتسيالارىنىڭ (بۇدان ءارى – شگەس) وندىرگەن ەلەكتر ەنەرگياسىن جابدىقتاۋشى ۇيىمدارعا تىكەلەي, ياعني بىرىڭعاي ساتىپ الۋشىنىڭ قىزمەتىنە جۇگىنبەي وتكىزۋگە رۇقسات ەتىلەدى.
شگەس وندىرگەن ەلەكتر قۋاتىن ەنەرگيامەن جابدىقتاۋشى ۇيىمدار ەنەرگەتيكا مينيسترلىگى بەلگىلەگەن شەكتى تاريف بويىنشا باسىم تارتىپپەن ساتىپ الادى. تاريف ءار جەتى جىل سايىن قايتا بەكىتىلىپ وتىرادى.
سونىمەن قاتار زاڭدا وتىننىڭ بالامالى ءتۇرى رەتىندە گازدى پايدالانا وتىرىپ, ەنەرگيا وندىرەتىن قوندىرعىلار سالۋ ارقىلى بۇرىنعى ەلەكتر ستانتسيالارىن جاڭعىرتۋعا, رەكونسترۋكتسيالاۋعا جانە/نەمەسە كەڭەيتۋگە ارنالعان ينۆەستيتسيالىق كەلىسىمدەر جاساۋ شارتتارى تۇزەتىلدى.
بۇدان بولەك, كوممۋنالدىق مەنشىكتەگى وڭىرلىك ەلەكتر جەلىلىك كومپانيالارعا ەلەكتر جەلىلەرىن سالۋعا, رەكونسترۋكتسيالاۋعا جانە جاڭعىرتۋعا بيۋدجەت ەسەبىنەن كرەديت بەرۋ ءتارتىبى ەنگىزىلەدى.
كرەديت بەرۋ قاعيدالارىن ەنەرگەتيكا مينيسترلىگى قارجى مينيسترلىگىمەن كەلىسە وتىرىپ بەكىتەدى.
زاڭنىڭ ءماتىنى باسپاسوزدە جاريالانادى.
