سۋرەتتەردى تۇسىرگەن – التىنبەك قارتاباي
ەتنواۋىل. تاۋ باۋرايىنا جاقىن ماڭداعى جاسوركەن اۋىلىنىڭ تابيعاتى كوزدىڭ جاۋىن الادى. سەگىز قاناتتى قازاق ۇيلەردىڭ تۇستىگىندە بۇلاق سۋىنىڭ سىڭعىرى ەستىلەدى. تاۋدان سوققان سالقىن سامال كەكىلىڭدى تاراپ, جانىڭدى ءبىر عاجاپ كۇيگە بولەيدى. ەلىمىزدىڭ ءار تۇكپىرىنەن كەلگەن 65 جاستىڭ قۋانىشىندا شەك جوق. ەتنواۋىلداعى ەتنوگرافيالىق ستيلدە كيىنگەن «ناقىش» توبىنىڭ اندەرى رۋحىڭدى كوتەرەدى.
اتىراۋ مەن التاي اراسىنان كەلگەن جاستار 6 كومانداعا ءبولىندى. ۇلدار جاعى لاڭگى تەبۋ, ءداستۇرلى ساداق اتۋ, قازاق كۇرەسى, قول كۇرەسى, قوي كوتەرۋ, ارقان تارتىس سەكىلدى سپورت تۇرلەرىنەن باق سىناسا, قىزدار جاعى سيىر ساۋىپ, تابا نان جاۋىپ جارىستى.
ءار سالانىڭ جاستارى باس قوسقان ەتنوگرافيالىق جوبا قىزىققا تولى بولدى. «ساق» كومانداسىنىڭ قۇرامىندا توپقا تۇسكەن قوستانايلىق جاسۇلان بەكبولاتتى جاۋىرىنى جەرگە تيمەيتىن پالۋان با دەدىك. جامباس, ىشتەن جانە سىرتتان شالۋ ادىستەرىن تاماشا قولدانا بىلگەن وعلان قارسىلاستارىنىڭ بارلىعىن ايقىن باسىمدىقپەن جەڭىپ, ۇلتتىق سپورتتان حابارى بار ەكەنىن كورسەتتى.
اقتوبەلىك جانبولات سەبەشوۆ نەبىر جۋان بىلەكتى جىگىتتەردى جەڭىپ, قول كۇرەسى جارىسىندا بىلەك كۇشى مول ەكەنىن بايقاتتى. ءداستۇرلى ساداق اتۋ سايىسىندا تۇركىستاندىق ايبەك تاشكەنباي قۇرالايدى كوزگە اتقان مەرگەن ەكەنىن اڭعارتتى.
قوي كوتەرۋ دوداسىندا باق سىناعان ارىپتەسىمىز داۋرەن دوعدىربايدىڭ ونەرى جۇرتتى تامساندىردى. باكەنە بويلى, شاعىن دەنەلى جۋرناليست نەبىر الىپ قارسىلاستارىنىڭ الدىن وراپ كەتتى. قويدى سەكسەن مارتە سەرپي كوتەرگەن داۋرەندى باسىپ وزۋعا ەشكىمنىڭ شاماسى كەلمەدى.
بالالىق شاقتىڭ ءدامى. تابا نان جاپقان ارۋلار قازىر «قىزىل كىتاپقا» ەنىپ كەتكەندەي كورىنەتىنى راس. شىلىڭگىر شىلدەنىڭ كەزىندە مەحنات تارتىپ, قيدىڭ شوعىنا نان پىسىرەتىن كەيۋانالاردىڭ جالعاسى جوق پا دەپ كۇدىكتەنىپ جۇرگەن ەدىك. بار ەكەن. ۋاقىتتىڭ تىعىزدىعى اسەر ەتسە كەرەك. كەي كوماندادان توپقا تۇسكەن ارۋلار پىسىرگەن نان كۇيىپ كەتكەنىن كوز كوردى. ايتسە دە الماتىلىق دانا نۇرجانقىزى قارسىلاستارىنان وق بويى وزىق ەكەنىن كورسەتتى.
سيىر ساۋ باسەكەسىنە كەلگەندە قىزىقتىڭ كوكەسى باستالدى. كەيبىر قاتىسۋشىلار وسى كۇنگە دەيىن سيىر ساۋىپ كورمەگەن ەكەن. قوبالجىپ, قورىققاندارى جۇزدەرىنەن ايقىن اڭعارىلىپ تۇردى. ايتسە دە, اۋىلدا وسكەن اياۋلىم مۇحامەتقاليقىزىنىڭ شەبەرلىگى كوز ءسۇيسىنتتى.
جوبا قورىتىندىسىندا بىرنەشە سپورت تۇرىنەن ۇزدىك شىققان «ساق» كومانداسى جەڭىستىڭ ەڭ بيىك تۇعىرىنان كورىنىپ, 700 مىڭ تەڭگەلىك سەرتيفيكاتتى يەلەنسە, «الاش» كومانداسىنا ەكىنشى ورىن جانە 500 مىڭ تەڭگەنىڭ سەرتفيكاتى بۇيىردى. ۇزدىك ۇشتىكتى قورىتىندىلاعان «سۇڭقار» كومانداسى 350 مىڭ تەڭگەگە يە بولدى. سونداي-اق 21 قاتىسۋشىعا ارنايى ىنتالاندىرۋ سىياقىسى تابىستالدى.
«ەكى جىل قاتارىنان ۇيىمداستىرىلعان جوبامىز مارەسىنە جەتىپ وتىر. ۇلتتىق ءداستۇر مەن سپورتتى دارىپتەۋ ماقساتىندا ءبىز بۇل جوبانى تەلەارنامەن بىرلەسىپ ۇيىمداستىردىق. ەلىمىزدىڭ ءار قيىرىنداعى جاستار جاسوركەن اۋىلىندا بولدى. اۋليەاتا ءوڭىرىنىڭ تاريحىمەن تانىستى. باستىسى, ولار قازاقى ءداستۇر مەن سپورتتى ناسيحاتتاۋعا ۇلەس قوستى. ەندى ءبىز ەستافەتانى تۇركىستان وبلىسىنا جولدايمىز» دەدى وبلىستىق جاستار ساياساتى ماسەلەلەرى باسقارماسىنىڭ باسشىسى جومارت زۇلپىحار جوبا قورىتىندىسىندا سويلەگەن سوزىندە.
تالاي وڭىردەن بۇرىن جامبىل وبلىسىندا جاستار ساياساتى ماسەلەلەرى باسقارماسى اشىلعان بولاتىن. بىزگە بۇل جوبا جاستار ساياساتى ماسەلەلەرى باسقارماسى ۇيىمداستىرعان سوڭعى ءىس-شارالاردىڭ ءبىرى سەكىلدى كورىندى. ويتكەنى بۇل باسقارما جاقىن كۇندەرى اقپارات جانە قوعامدىق دامۋ باسقارماسىنىڭ قاتارىنا قوسىلادى.
قالاي دەسەك تە جاستار ساياساتى باسقارماسى سوڭعى ونجىلدىقتا كوپتەگەن جاڭا جوبالاردى دۇنيەگە اكەلگەنى انىق. ءار ىسكە جاڭاشىلدىقپەن قاراعان ۇجىم ءبىر جىلدارى جامبىلدىق جاستاردىڭ جىر جيناقتارىن دا شىعارىپ جۇرگەن ەدى. جاڭا باسقارماعا قوسىلعاننان كەيىن تىنىسى تارىلا ما, الدە جۇمىسى جاندانا ما؟ ۋاقىت كورسەتەر. باستىسى, ولار قولعا العان «JasSaq» - وڭىرلىك جوبادان ومىرلىك جوباعا اينالعانىن كوز كوردى.
جامبىل وبلىسى
