قۋاتتى ادۆوكاتۋرا – زاڭ دەڭگەيىن كورسەتەتىن شارت

دوڭگەلەك ۇستەل جۇمىسىنا سەنات دەپۋتاتى امانگەلدى تولاميسوۆ, كونستي­تۋتسيا­لىق سوتتىڭ سۋدياسى ايجان جات­قان­باەۆا, رەسپۋبليكالىق ادۆوكاتتار القا­سى­نىڭ عىلىمي-كونسۋلتاتيۆتىك كەڭە­سىنىڭ توراعاسى سەرگەي سيزينتسەۆ, قازاقستاننىڭ زاڭ كونسۋلتانتتارى رەسپۋبليكالىق القاسىنىڭ توراعاسى سەرىك اقىلباي قاتىستى.

ءىس-شارانى اشقان ءپىب جانىنداعى پارلامەنتاريزم ينستيتۋتى ديرەكتو­رى­نىڭ ورىنباسارى بەرىك بەكجانوۆ بۇل ءىس-شارا ادۆوكاتتىق قىزمەت پەن زاڭ­گەر­لىك كومەك تۋرالى زاڭنامانى جەتىل­دىرۋ بو­يىنشا ۇلكەن جۇمىستىڭ باستاۋى ­بولاتىنىنا سەنىم ءبىلدىردى.

پرەزيدەنت قاسىم-جومارت توقاەۆ ۇلتتىق قوعامدىق سەنىم كەڭەسىنىڭ بەسىنشى وتىرىسىندا «كۇشتى جانە تاۋەلسىز ادۆوكاتۋراسىز قۇقىقتىق مەملەكەت قۇرۋ مۇمكىن ەمەس», دەپ اتاپ وتكەنى بەلگىلى. دەپۋتاتتاردىڭ باستاماسىمەن ءىس جۇرگىزۋ زاڭناماسىن جەتىلدىرۋ, ادۆوكاتتىق قىز­مەت پەن زاڭ كومەگىن كورسەتۋ, داۋلاردى سوتتان تىس جانە سوتقا دەيىنگى شەشۋ ماسەلەلەرى جونىندەگى زاڭ جوباسى قازىرگى ۋاقىتتا ماجىلىستە قاراۋدا جاتىر.

زاڭ جوباسىنىڭ باستاماشىسى بولعان دەپۋتاتتاردىڭ پىكىرىنشە, ەنگىزىلگەن وزگەرىستەر مەن تولىقتىرۋلار ادۆوكاتتار مەن زاڭ كونسۋلتانتتارى قىزمەتى­نىڭ تاۋەلسىزدىگىنىڭ ءتيىستى كەپىلدىكتەرىن جاساۋعا, ازاماتتارعا جوعارى ساپالى زاڭ كومەگىن كورسەتۋگە, ادۆوكاتتاردىڭ ءىس جۇرگىزۋ وكىلەتتىكتەرىن كەڭەيتۋگە جانە ادۆوكاتتىق تاجىريبەنىڭ كەپىلدىكتەرىن قامتاماسىز ەتۋگە باعىتتالعان.

دوڭگەلەك ۇستەل باسىندا ادۆوكاتتىڭ پروتسەسسۋالدىق وكىلەتتىكتەرىن كەڭەيتۋ, زاڭ­گەرلىك تاجىريبەگە كەپىلدىك بەرىپ, اد­ۆوكاتتىڭ قىزمەتىنە كەدەرگى كەلتىرگەنى ءۇشىن جاۋاپكەرشىلىك تۋرالى نورمالاردى قايتا قاراۋ, مەملەكەت كەپىلدىك بەر­گەن زاڭ قىزمەتىن كورسەتۋ, كاسىپكە «كىرۋ» جانە وكىلەتتىكتەرىن توقتاتۋ, ادۆوكاتتىق جانە زاڭگەرلىك كومەكتى ۇيىم­داستىرىپ, كليەنت­تەرمەن قارىم-قاتىناس باعىتتارى, ادۆوكاتۋرا قىز­مە­تىن ۇيىمداستىرۋدى كۇشەيتۋ, تارتىپ­تىك جاۋاپكەرشىلىك نەگىزدەرى سەكىلدى ماسە­لەلەر تالقىلاندى.

ايتا كەتەيىك, وتىرىسقا ونلاين رەجىمدە تمد ەلدەرىنەن دە زاڭگەر­لەر, اتاپ ايتقاندا, ازەربايجان رەسپۋب­لي­كاسى ادۆوكاتتار القاسىنىڭ توراعا­سى انار باگيروۆ, قىرعىز رەسپۋبليكا­سى ادۆوكاتتار القاسى ادۆوكاتتار كەڭەسى­نىڭ مۇشەسى ايجان قادىروۆا, تاجىكستان رەسپۋبليكاسى زاڭگەرلەر ودا­عىنىڭ تور­اعاسى اليشەر حايداروۆ, ت.ب. قاتىستى.