جيىندا وبلىس اكىمى نۇرلىبەك نالىباەۆ وڭىردە تۇرعىنداردىڭ مەديتسينالىق قىزمەتكە قولجەتىمدىلىگىن ارتتىرۋ, دەنساۋلىق ساقتاۋ ينفراقۇرىلىمىن ودان ءارى جەتىلدىرۋ جۇيەلى جۇرگىزىلىپ كەلە جاتقانىن اتاپ ءوتتى. وسىدان 2 جىل بۇرىن 45 جەدەل جاردەم كولىگى الىنىپ, وبلىستىق مەديتسينالىق جەدەل جاردەم ستانساسى 100 پايىز قامتاماسىز ەتىلگەن بولاتىن.
«وتكەن جىلى سالاعا 513 ملن تەڭگەگە 25 جاڭا سانيتارلىق اۆتوكولىك تابىستالسا, بيىل بارلىق ەلدى مەكەندەگى دەنساۋلىق ساقتاۋ مەكەمەلەرىنە 200 سانيتارلىق اۆتوكولىك الىنادى. سونىڭ العاشقى لەگىن بۇگىن تابىستاساق, قالعان 150-ءى جىل سوڭىنا دەيىن بەرىلەدى. وسىلايشا, بيىل ەلدى مەكەندەردى سانيتارلىق اۆتوكولىكپەن قامتۋ ماسەلەسىن تۇبەگەيلى شەشەمىز», دەدى نۇرلىبەك ماشبەك ۇلى.
ەل ساۋلىعىن ساقتاۋعا ەڭبەك ەتىپ جۇرگەن ارىپتەستەرىن كاسىبي مەرەكەمەن دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ, ا.ن.سىزعانوۆ اتىنداعى حيرۋرگيا عىلىمي ورتالىعىنىڭ باسقارما توراعاسى بولاتبەك بايماحانوۆ قۇتتىقتاپ, سالا ارداگەرى تۇرعانباي ماحانوۆ باتا بەردى.
بيىل ءوڭىردىڭ مەديتسينا سالاسىندا اۋقىمدى جوبالار بار. مەملەكەت باسشىسىنىڭ باستاماسىمەن قولعا الىنعان «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جالپى قۇنى 11 ملرد تەڭگە بولاتىن 27 نىسان سالۋ كوزدەلگەن. وتكەن جىلى ەلدى مەكەندەردە 15 جاڭا دارىگەرلىك امبۋلاتوريا, 1 مەديتسينالىق بەكەت پايدالانۋعا بەرىلدى. قالعان 11 نىسان جىل سوڭىنا دەيىن حالىق يگىلىگىنە تابىستالادى.
«اۋىل – ەل بەسىگى» باعدارلاماسى شەڭبەرىندە قىزىلوردا قالاسىنىڭ دوسان ەلدى مەكەنىندە مەديتسينالىق بەكەت, بايمۇرات باتىر اۋىلىندا دارىگەرلىك امبۋلاتوريا قولدانىسقا بەرىلىپ, كوپتى قۋانتتى. كوپبەيىندى وبلىستىق اۋرۋحانادا جاڭا مرت اپپاراتى ىسكە قوسىلىپ, 70 ورىندىق پەريناتالدىق ءبولىم اشىلدى. وبلىس ورتالىعىندا 36 ملرد 400 ملن تەڭگەگە ءبىر اۋىسىمدا 100 كەلۋشىگە ارنالعان ەمحاناسى مەن ونكولوگيالىق بولىمشەسى بار 300 ورىندىق كوپبەيىندى اۋرۋحانانىڭ قۇرىلىسى ءجۇرىپ جاتىر.
وسى كەزگە دەيىن قان ورتالىعىنىڭ جەكە عيماراتى بولماعان ەدى. قۇرىلىسىنا رەسپۋبليكالىق بيۋدجەتتەن 2 ملرد 900 ملن تەڭگە ءبولىنىپ, قالانىڭ سول جاعالاۋىنان سالىنىپ جاتقان ورتالىق عيماراتى جاقىن كۇندەرى ەل يگىلىگىنە بەرىلەدى. جەرگىلىكتى بيۋدجەت ەسەبىنەن 922 ملن تەڭگەگە جاڭاقورعان اۋدانى, تومەنارىق اۋىلىندا دارىگەرلىك امبۋلاتورياسىمەن قوسا 15 توسەكتىك اۋىلدىق اۋرۋحانا سالىنىپ جاتىر. شيەلى اۋدانىندا دا 30 توسەكتىك ينفەكتسيالىق بولىمشە قۇرىلىسى باستالادى.
ايماق مەديتسيناسىن دامىتۋعا بيۋدجەتتەن تىس قولداۋ اياسى دا ارتىپ وتىر. «قازاقستان حالقىنا» قوعامدىق قورى ەكى جىلدا ءوڭىردىڭ دەنساۋلىق ساقتاۋ سالاسىنا 2 ملرد تەڭگەدەن استام قارجى باعىتتاپتى. بۇل قارجىعا وبلىستىق بالالار اۋرۋحاناسى بازاسىندا «قامقورلىق» رەابيليتاتسيا ورتالىعى اشىلىپ, اسا قىمبات ءدارى-دارمەك الىندى. قور وبلىستىق ونكولوگيا ورتالىعىن 1 ملرد 100 ملن تەڭگە تۇراتىن ونكولوگيالىق سكرينينگ جۇرگىزۋگە ارنالعان جىلجىمالى مەديتسينالىق كەشەنمەن قامتاماسىز ەتتى. ماماندار قازىر رەسپۋبليكانىڭ 3 وڭىرىندە عانا كەزدەسەتىن كەشەننىڭ بىرىمەن وبلىستىڭ شالعاي ەلدى مەكەندەرىن ارالاپ, 1 300-دەن استام تۇرعىن ونكولوگ كەڭەسىن الدى.
حالىققا ساپالى مەديتسينالىق قىزمەت كورسەتۋ ءۇشىن ماماندار بىلىكتىلىگىن ارتتىرۋ دا ماڭىزدى ەكەنى بەلگىلى. وسى باعىتتاعى جۇمىستار جالعاسىن تاۋىپ, بيىل 10 رەانيماتولوگ جانە 5 كارديولوگ مامان تۇركيادا جەتەكشى مەديتسينالىق ۇيىم سانالاتىن «مەموريال» كلينيكاسىندا ءبىلىم جەتىلدىرىپ كەلدى. 2018 جىلدان بۇگىنگى كۇنگە دەيىن سۇرانىسقا يە ماماندىقتار بويىنشا 155 رەزيدەنتكە, 162 جالپى تاجىريبەلىك دارىگەردى دايارلاۋعا وبلىس اكىمىنىڭ ارنايى گرانتى ءبولىنiپ, 2023 جىلى 590 دارىگەر, 738 ورتا بۋىندى مەديتسينا قىزمەتكەرلەرى بىلىكتىلىگىن ارتتىرىپتى. بيىل سىر دارىگەرلەرىنىڭ ەلىمىزدەگى الدىڭعى قاتارلى مەديتسينا ورتالىقتارىمەن قاتار, شەت ەلدەردە دە بىلىكتىلىگىن ارتتىرۋ كوزدەلىپ وتىر.
جىل كولەمىندە حيرۋرگيالىق سالا بويىنشا 14 شەبەرلىك ساعاتى وتكىزىلىپ, 21 ءتۇرلى وپەراتسيا جاڭادان ەنگىزىلدi. اراعا 9 جىل سالىپ بۇيرەك ترانسپلانتاتسياسى وپەراتسياسى جاسالدى.
قىزىلوردا
