«بيىل باتىس قازاقستان وبلىسىندا ءبىلىم بەرۋ ينفراقۇرىلىمىن قولداۋ قورى ەسەبىنەن اپاتتى مەكتەپتەر ماسەلەسىن شەشۋ ماقساتىندا ورال قالاسىندا №31 مەكتەپتىڭ قۇرىلىسى باستالدى» دەيدى وبلىستىق قۇرىلىس باسقارماسى باسشىسىنىڭ ورىنباسارى دارحان ابدراشيتوۆ. وسى ماقساتقا 2,5 ملرد تەڭگە ءبولىنىپ, مەردىگەر «التاير» جشس ىسكە كىرىسىپ تە كەتكەن. بۇگىندە عيماراتتىڭ قابىرعاسى قالانىپ, ەدەن پليتالارى ورناتىلىپ جاتىر.
ءبىر ءتاۋىرى, الەۋمەتتىك عيماراتتار بىرنەشە مەملەكەتتىك باعدارلاما اياسىندا سالىنىپ جاتىر. ماسەلەن, «جايلى مەكتەپ» ۇلتتىق جوباسىمەن عانا وڭىردە 2023-2025 جىلدارى 18 مەكتەپ سالىنباق.
سونىڭ ىشىندە وتكەن جىلى 9 مەكتەپتىڭ قۇرىلىسى باستالىپ تا كەتتى. ولار – ورال قالاسىنداعى №53, №60 جانە №65 مەكتەپ عيماراتتارى. سوڭعىسى مەديتسينالىق كوللەدج ايماعىنا سالىنىپ, «قۇس فابريكاسى» دەپ اتالاتىن اۋداندا تۇراتىن تۇرعىنداردىڭ بالالارىنا قىزمەت كورسەتەدى. بۇرىن ساياجاي جەرى سانالعان بۇل اۋداندا بۇگىندە مىڭداعان حالىق تۇراقتى تۇرعانىمەن, ءدال وسى مەكتەپ ماسەلەسىندە كوپ جىلدان بەرى قاعاجۋ كورىپ كەلە جاتقان ەدى. مىنە, حالىقتىڭ ءوتىنىشى ەسكەرىلدى.
ءبورلى اۋدانىندا دا 3 «جايلى مەكتەپ» بوي كوتەرەدى. ونىڭ ەكەۋى اقساي قالاسىندا بولسا, ەندى ءبىرى پۋگاچەۆو اۋلىنداعى ورتا مەكتەپ عيماراتى. بايتەرەك اۋدانىنىڭ دوستىق جانە بايقونىس اۋىلدارىندا, تەرەكتى اۋدانىنىڭ پودستەپنوە كەنتىندە دە مەكتەپ قۇرىلىسى باستالدى.
«بيىل ۇلتتىق قوردان باتىس قازاقستان وبلىسىندا جاڭا 9 جايلى مەكتەپ قۇرىلىسى ءۇشىن تاعى دا 19,2 ملرد تەڭگە ءبولىندى» دەگەن قۋانىشتى حاباردى قۇرىلىس باسقارماسى جانە جاريا ەتىپ وتىر.
بۇدان باسقا, جايلى مەكتەپتەرگە سىرتقى ينجەنەرلىك جەلىلەردى جۇرگىزۋ ءۇشىن جوبالىق-سمەتالىق قۇجات ازىرلەنگەن, 8 مەكتەپ بويىنشا ساراپتاما جاسالىپ, ماقۇلدانعان, جەرگىلىكتى بيۋدجەتتەن 1,5 ملرد تەڭگە بولىنگەن.
باتىس قازاقستان وبلىسىنىڭ ءبىر ەرەكشەلىگى – وڭىردە شاعىن ەلدى مەكەندەر سانى وتە كوپ. بۇل شاعىنجيناقتى مەكتەپكە ۇلكەن سۇرانىس تۋدىرىپ وتىر. ماسەلەن, وڭىردەگى الپاۋىت قاراشىعاناق پەترولەۋم وپەرەيتينگ ب.ۆ. كومپانياسىنىڭ قاراجاتى ەسەبىنەن ءبورلى اۋدانىنداعى جارسۋات اۋلىندا جانە قازتالوۆ اۋدانىنىڭ سارالجىن اۋلىندا شاعىنجيناقتى مەكتەپ قۇرىلىسى ءجۇرىپ جاتىر. تاياۋ بولاشاقتا ءدال وسىنداي 8 مەكتەپ قۇرىلىسى باستالماق. قازىرگى ۋاقىتتا جوبالىق-سمەتالىق قۇجاتتار ازىرلەنىپ جاتىر ەكەن.
الەۋمەتتىك قۇرىلىس دەگەندە, وعان تەك ءبىلىم وشاقتارى ەمەس, مادەني-سپورتتىق نىساندار دا كىرەتىنى انىق قوي. اۋىلدىق جەردە سپورتتىق ينفراقۇرىلىمدى دامىتۋ ماقساتىندا قازتالوۆ جانە تاسقالا اۋداندارىندا 2 دەنەشىنىقتىرۋ-ساۋىقتىرۋ كەشەنى سالىنىپ جاتىر. قۇرىلىسشىلار ۋادەسىندە تۇرسا, وسى جىلدىڭ ءىىى توقسانىندا اتالعان اۋىل حالقى سۋ جاڭا سپورت كەشەنىنىڭ قىزىعىن كورە باستايدى.
ال جوعارىدا ايتقان قپو ب.ۆ. كومپانياسىنىڭ قاراجاتى ەسەبىنەن وڭىردە 4 مادەني-سپورت كەشەنى, 2 مادەنيەت ءۇيى, 2 دەنەشىنىقتىرۋ-ساۋىقتىرۋ كەشەنى, 5 مەملەكەتتىك مۇراعات سالۋ جوسپارلانعان.
ايتپاقشى, «اۋىل – ەل بەسىگى» دەپ اتالاتىن تاعى ءبىر تاماشا باعدارلاما بار. وسى ۇلتتىق جوبا اياسىندا بۇگىندە وبلىستىڭ 5 اۋدانىندا 6 مادەنيەت نىسانى سالىنىپ جاتىر. ولار – قازتالوۆ اۋدانىنىڭ قايىڭدى, جاڭاقالا اۋدانىنىڭ قىرقوپا, سىرىم اۋدانىنىڭ توعاناس, بايتەرەك اۋدانىنىڭ ششاپوۆ, تاسقالا اۋدانى مەرەي اۋىلدارىنداعى جاڭا مادەنيەت ءۇيى جانە تاسقالا اۋدانى ورتالىعىنداعى مۇراجاي عيماراتى.
– بۇلاردان بولەك, تاعى دا 4 مادەنيەت نىسانى قۇرىلىسىن بيىل باستايمىز دەپ وتىرمىز. وسى ماقساتقا رەسپۋبليكا قازىناسىنان – 0,9 ملرد تەڭگە, جەرگىلىكتى بيۋدجەتتەن – 0,2 ملرد تەڭگە, بارلىعى 1,1 ملرد تەڭگە ءبولىندى. جالپى, جىل سوڭىنا دەيىن 7 مادەنيەت نىسانى قۇرىلىسىن اياقتاپ, حالىقتىڭ پايدالانۋىنا بەرەمىز, – دەيدى دارحان ەرەجەپ ۇلى.
الەۋمەت ەرەكشە كۇتىپ جۇرگەن قۇرىلىستىڭ ءبىر پاراسى دەنساۋلىق ساقتاۋ سالاسىنا تيەسىلى. بيىل تەرەكتى اۋدانىندا سالىنىپ جاتقان 200 ورىندىق ەمحانا قۇرىلىسىن اياقتاۋ ءۇشىن ۇلتتىق قور مەن جەرگىلىكتى بيۋدجەتتەن قوسا العاندا 0,5 ملرد تەڭگە بولىنگەن ەدى. مەردىگەر «وڭداسىن ستروي» جشس قازىر جۇمىس ۇستىندە.
سونىمەن قاتار وبلىستا وڭالتۋ ورتالىعىنىڭ قۇرىلىسى دا جالعاسىپ جاتىر. بيىل بۇعان 2,2 ملرد تەڭگە بولىنگەن. مەردىگەر – «التاير» جشس.
وڭىردە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى دا قىزۋ ءجۇرىپ جاتىر. وسى جوبا شەڭبەرىندە باتىس قازاقستان وبلىسىنىڭ اۋىلدىق ەلدى مەكەندەرىندە 2025 جىلعا دەيىن 50 نىسان – العاشقى مەديتسينالىق-سانيتارلىق كومەك كورسەتەتىن امبۋلاتوريا سالۋ جوسپارلانعان بولاتىن. وتكەن 2023 جىلى وڭىردە 12 مەديتسينا نىسانى – 4 امبۋلاتوريا, 8 فەلدشەرلىك-اكۋشەرلىك پۋنكت سالىنىپ, پايدالانۋعا بەرىلدى. ونىڭ كەيبىرى گازەت وقىرماندارىنا جاقسى تانىس, ويتكەنى بۇل نىسانداردىڭ اشىلۋ سالتاناتىنا ءوزىمىز قاتىسىپ, ەگجەي-تەگجەي اقپارات بەرگەن بولاتىنبىز.
قازىردىڭ وزىندە جاڭاقالا اۋدانىنىڭ ماشتەكساي اۋلىندا, سىرىم اۋدانىنىڭ بۇلدىرتى اۋلىندا جەرگىلىكتى بيۋدجەت قاراجاتى ەسەبىنەن قۇرىلىس باستالىپ تا كەتتى. جالپى, 2024 جىلعا ارنالعان جوسپار بويىنشا 38 مەديتسينالىق نىساننىڭ قۇجاتى ماقۇلدانىپ, 18 نىساننىڭ قۇرىلىس-مونتاج جۇمىسىن جۇرگىزۋ ءۇشىن رەسپۋبليكا بيۋدجەتى ەسەبىنەن 2,1 ملرد تەڭگە, جەرگىلىكتى بيۋدجەتتەن 650 ملن تەڭگە بولىنگەن ەكەن. قازىر 11 جوبانىڭ مەردىگەرى انىقتالدى, قۇرىلىس-مونتاج جۇمىسى باستالدى. تاعى 24 جوبا بويىنشا مەردىگەردى انىقتاۋ ءۇشىن بايقاۋ وتكىزىلەدى.
بۇل ايتىلعانداردان بولەك, ورال قالاسىندا سالىنىپ جاتقان اكىمشىلىك عيمارات قۇرىلىسىن جالعاستىرۋ ءۇشىن جەرگىلىكتى بيۋدجەت قاراجاتى ەسەبىنەن 1,5 ملرد تەڭگە بولىنگەن ەكەن. 2023 جىلى بولىنگەن 350,0 ملن تەڭگەنى مەردىگەر «KazConstructionGroup» جشس ساتىمەن يگەرگەن بولاتىن. جۇمىس جالعاسادى.
ايتپاقشى, تەرەكتى اۋدانىندا 99250 اسكەري ءبولىمىنىڭ اسكەري قالاشىعى قۇرىلىسى باستالعان. سونداي-اق بوكەي ورداسى اۋدانىنىڭ ورتالىعى سايحىن اۋلىندا دا جاڭا اكىمشىلىك عيمارات بوي كوتەرىپ جاتىر. بۇلاردىڭ ءبارى ەلدىڭ, ءوڭىردىڭ الەۋمەتتىك تۇرمىسىن جاقسارتۋعا ەرەكشە سەرپىن بەرەرى انىق.
باتىس قازاقستان وبلىسى
