الايدا بۇل پروتسەسستى قالاي دۇرىس جۇزەگە اسىرۋ كەرەك؟ نەسيەگە الىنعان كولىكتى ساتۋعا بولا ما؟ Massaget.kz ءتىلشىسى تاقىرىپتى زاڭگەرلەرمەن تىلدەسە وتىرىپ زەرتتەپ كوردى.
تەوريادا بانكتىڭ كليەنتى ءاۆتوموبيلدىڭ يەسى بولعانىمەن, بىراق ءىس جۇزىندە ونىڭ قۇقىقتارى قارىز تولىق وتەلىپ بىتكەنشە شەكتەلەدى. ياعني, مەنشىك يەسى ءاۆتوموبيلدى ساتۋعا, ونى باسقا تۇسكە بوياۋعا مۇمكىندىگى جوق. ءتىپتى اي سايىنعى تولەمدەردى كەشىكتىرگەن جاعدايدا بانك مەنشىك يەسىنەن ماشينانى الىپ, كولىكتى وزگە ادامعا ساتا الادى.
نەلىكتەن ادامدار نەسيەگە العان كولىكتەرىن ساتادى؟
ءبىزدىڭ ەلدە اۆتونەسيەنى 7 جىلعا دەيىن راسىمدەۋگە بولادى. الايدا وسى ۋاقىت ارالىعىندا ادامداردىڭ ومىرىندە ءتۇرلى وزگەرىستەر ورىن الۋى مۇمكىن. كەيدە پروبلەمالاردى تەك تەمىر تۇلپارىن ساتۋ ارقىلى شەشۋگە بولادى. نەسيەگە الىنعان كولىكتى ساتۋعا نەگىزگى سەبەپتەر:
قارجىلىق جاعدايدىڭ ناشارلاۋى;
تۇراقتى تولەمدەردىڭ تىم كوپ بولۋى;
وتباسىنداعى كىرىستى ارتتىرۋ;
باستاپقى جارناعا اقشا سالىپ, جاڭا اۋقىمدى كولىك الۋ;
ءتيىمدى ۇسىنىستار (ارزان ءۇي, جەر تەلىمىنىڭ پايدا بولۋى);
كلينيكادا ەمدەلۋ نەمەسە بالاسىنىڭ وقۋىنا اقشا تولەۋ.
فوتو: instagram.com \ zanger.berdimurat
- نەسيەگە الىنعان كەز كەلگەن كولىك قۇرالى بانكتە كەپىلدە تۇرادى. مەنشىك يەسىنە ماشينانى وزگە ادامنىڭ اتىنا اۋدارۋعا مۇمكىندىك جوق. بۇل كولىكتى ساتۋ كەزىندە ساتىپ الۋشى بانكتەگى بەرەشەكتى تولىق جاۋىپ, بۇعاتتان شىعارىلعان كولىكتى ءوز اتىنا اۋدارىپ جاتادى. كەيبىر جاعدايلاردا عانا بانكتەگى نەسيەنى وزگە ادامنىڭ اتىنا وزگەرتۋ, ياعني بانكتىك ساتۋ-ساتىپ الۋ شارتىن, بانكتىك نەسيە شارتىن ۇيلەستىرە وتىرا 3 جاقتى كەلىسىمىنەن ءوتىپ, قايتا جاساقتالىپ جاتادى. بىراق بۇل وتە قيىن, ۇزاق پروتسەسس. سوندىقتان نەسيەدە تۇرعان كولىكتى ساتۋشى اۆتوكولىكتىڭ نەسيەدە تۇرعانىن الدىن الا ەسكەرتىپ جازىپ قويۋى ءتيىس, - دەيدى زاڭگەر بەردىمۇرات حاسەن ۇلى.
سونداي-اق زاڭگەر كولىكتى كەپىلدەن شىعارۋ كەزىندەگى بارلىق پروتسەسستى تولىق ءبىلۋ كەرەك دەيدى. سەبەبى كەيبىر جاعدايلاردا اۆتوكولىكتى نەسيەدەن شىعارىپ بەرەمىن دەپ الداپ كەتەتىن ادامدار بار. اقشانى الىپ ءىزىم-عايىم جوعالادى نەمەسە بەلگىلى ءبىر سەبەپتەرمەن بانكتەن كولىك شىقپاي قالاتىن سەبەپتەر كوپ. سوندىقتان سەنىمدى ادام بولماسا, نەسيەدە تۇرعان كولىكتى كەپىلدەن شىعارۋ ءۇشىن تاۋەكەلگە بارۋدىڭ قاجەتى جوق.
بانكتىڭ الدىنداعى بەرەشەكتى سوڭعى تيىنىنا دەيىن وتەپ بولعان جاعدايدا كەپىلدەن شىعارادى. مۇنداي جاعدايدا كولىكتى ساتۋدىڭ بىرنەشە نۇسقاسى بار.
كولىكتى ساتۋشى ساتىپ الۋشىنى ءوزى تابا الادى;
نەسيەنى قايتا رەسىمدەۋگە مۇمكىندىك;
بانك ارقىلى اۆتوكولىكتى ساتۋ;
اۆتوكولىك ديلەرىندەگى ساۋدا قىزمەتتەرى.
الايدا زاڭگەر وسى كەزگە دەيىن كەپىلدە تۇرعان كولىكتى الامىن دەپ الدانىپ قالعان ادامدار كوپ ەكەنىن ايتتى. الاياقتىققا سەبەپ ەكىنشى دەڭگەيلى بانكتەر ەمەس اۆتولومباردتار. ولاردىڭ مەحانيزىمىن بەردىمۇرات حاسەن ۇلى بىلاي ءتۇسىندىردى.
- اسحات دەگەن ازامات ءوزىنىڭ كولىگىن اپارىپ لومباردقا كەپىلگە قويادى. بىراق ول كولىكتى بۇعان دەيىن باسقا ادامنىڭ اتىنان ساتىپ الىپ ءوز اتىنا اۋدارماعان. ول كولىك باسقا ادامنىڭ اتىندا, ماسەلەن مەدەتتىڭ اتىندا بولۋى مۇمكىن. مەدەتتەن ول كولىكتى ساتىپ الۋ شارتىن جاساپ ايلىق ءبولىپ تولەۋگە كەلىسىپ العان بولۋى ىقتيمال. اپارىپ سول كولىكتى لومباردقا وتكىزەدى. لومبارد ول كولىكتى قابىلداپ الادى. نەگە؟ سەبەبى ول اۆتوكولىكتىڭ كىلتى, قۇجاتى جانە كولىك قۇرالى سول ادامنىڭ يەلىگىندە ءجۇر. ال كولىكتىڭ قۇجاتى مەن كىلتى ءبىر ادامعا سەنىپ تاپسىرىلعان بولسا ول ۇرلانعان بولىپ ەسەپتەلمەيدى. وسىلايشا لومبارد ول اۆتوكولىكتى حقكو ارقىلى بلوكقا قويادى. وسى كەزدە مەدەت كولىگىن سۇراپ اسحاتقا حابارلاسادى. ال اسحات مەن سەنى تانىمايمىن, كولىك قايدا ەكەنىن بىلمەيمىن دەپ الاياقتىق جاسايدى. مەدەت ول كولىكتى ىزدەپ لومباردقا بارادى. بىراق ول كولىكتى الا المايدى. نەگە؟ ويتكەنى ونى اسحات دەگەن ازاماتتان قابىلداپ العان. زارداپ شەگۋشى مەدەت بولىپ شىعادى.
سودان كەيىن ول كولىكتى لومبارد مەدەتتىڭ قارسىلىعىنا قاراماستان كەپىلدەن شىعارىپ ساتىپ جىبەرەدى. سودان بەلگىلى ءبىر ۋاقىت وتكەننەن كەيىن مەدەت ارىز جازادى. وسى كەزدە كولىكتى ساتىپ العان ءۇشىنشى ادام, اينۇر دەلىك اياق استىنان ونىڭ كەپىلدە تۇرعانىن تۇسىنەدى. ول كولىكتىڭ بۇعان دەيىنگى داۋلى وقيعالارىن بىلەدى. وسىنداي الاياقتىق سحەمامەن ءوزىنىڭ اتىنا زاڭدى تۇردە حقكو ءنومىر العان ادامداردىڭ ءوزى كەيىن كولىكتى ساتا الماي, ءجاي عانا ءمىنىپ ءجۇر. ياعني ول كولىكتى ءسىز قولدانا الاسىز, بىراق ءوزىڭىزدىڭ اتىڭىزدان شىعارىپ تاستاي المايسىز.
بۇل جەردە العاشقىدا كولىكتى ءبولىپ تولەۋگە بەرگەن مەدەت پەن كولىكتى ساتىپ السادا باسىبايلى مەنشىكتەي الماي جۇرگەن اينۇر زارداپ شەگەدى. ال لومبارد ءوزىنىڭ اقشاسىن الادى. سەبەبى اينۇر ودان كولىكتى ساتىپ الدى. وسى سىندى كەيستەر قوعامدا وتە كوپ. سوندىقتان كولىكتى ساتىپ الماس بۇرىن ونىڭ بۇعان دەيىنگى تاريحىن تەحنيكالىق قۇجاتى ارقىلى جاقسىلاپ زەرتتەۋ كەرەك, - دەيدى زاڭگەر.
