ەلىمىزدىڭ دەنساۋلىق ساقتاۋ جۇيەسىن دامىتۋدىڭ جاڭا كەزەڭى

ەلىمىزدە دەنساۋلىق ساقتاۋ سالاسىنىڭ دامۋى پرەزيدەنت قاسىم-جومارت كەمەل ۇلى توقاەۆتىڭ باستى نازارىندا. جاقىندا مەملەكەت باسشىسى ەكى ماڭىزدى مەديتسينالىق نىساندى ارالادى: اعىمداعى جىلدىڭ تامىز ايىندا اشىلۋى جوسپارلانىپ وتىرعان ۇلتتىق عىلىمي ونكولوگيا ورتالىعىنىڭ جاڭا كورپۋسى جانە ۇلتتىق شۇعىل مەديتسينانى ۇيلەستىرۋ ورتالىعى, مەديتسينالىق قىزمەتتەردىڭ ساپاسىن ارتتىرۋعا جانە ازاماتتاردىڭ دەنساۋلىعىن نىعايتۋعا ءوزىنىڭ دايىن ەكەنىن كورسەتتى.

قازاقستاندا 3323 امبۋلاتوريالىق-ەمحانالىق ۇيىمدا جانە 872 ستاتسيوناردا 81,3 مىڭ دارىگەر, جوعارى مەديتسينالىق ءبىلىمى بار 5,2 مىڭ مەيىرگەر جانە 190,6 مىڭ ورتا مەديتسينا قىزمەتكەرى جۇمىس ىستەيدى. ءدال وسىنداي ۇيىمداردىڭ كەڭ جەلىسى جانە مەديتسينا قىزمەتكەرلەرىنىڭ ۇلكەن توبى ءومىر ءسۇرۋ ۇزاقتىعىنىڭ كورسەتكىشتەرىن ارتتىرۋعا, اۋرۋلاردان بولاتىن ءولىمدى ازايتۋعا جانە قازاقستاندىقتاردىڭ ءومىر ءسۇرۋ ساپاسىن جاقسارتۋعا باستى ۇلەس قوسادى.

سوڭعى 5 جىلدىڭ ىشىندە ەلىمىزدە ءومىر ءسۇرۋ ۇزاقتىعى 2 جاسقا (73-تەن 75 جاسقا دەيىن) ارتقانىن, جالپى ءولىم – 9%-عا, انا ءولىمى – 16,8%-عا, نارەستە ءولىمى – 8,5%-عا, قاناينالىم جۇيەسىنىڭ اۋرۋلارىنان بولاتىن ءولىم – 11,9%-عا جانە قاتەرلى ىسىكتەردەن بولاتىن ءولىم – 15,3%-عا تومەندەگەنىن اتاپ وتەمىن. 

سالانى قارجىلاندىرۋ كولەمى دە جوسپارلى تۇردە وسۋدە, وتكەن جىلى ءبىز 4,7 ترلن.تەڭگە ناقتى بەلگىگە نەمەسە جالپى ىشكى ءونىمنىڭ 4%-ىنا جەتتىك.  بۇل سومانىڭ 67%-ى مەملەكەتكە, 33%-ى جەكە شىعىستارعا تيەسىلى. مۇنداي شىعىستاردىڭ قۇرىلىمى مەديتسينالىق كومەكتىڭ ەكونوميكالىق قولجەتىمدىلىگىن قامتاماسىز ەتۋدە بەلگىلى ءبىر الاڭداۋشىلىق تۋدىرادى.

دەنساۋلىق ساقتاۋ مينيسترلىگى مەن بۇكىل مەملەكەتتىك اپپارات مەملەكەتتىك كوزدەردەن بولىنەتىن قاراجاتتىڭ ازاماتتاردىڭ قالتالارىنا تۇسەتىن اۋىرتپالىقتى جوسپارلى تۇردە تومەندەتۋگە جانە كومەكتىڭ قولجەتىمدىلىگىنە كەپىلدىك بەرۋگە ىقپال ەتۋىن قامتاماسىز ەتۋ ءۇشىن جۇمىس ىستەۋدە. وسىلايشا, نەگىزگى باسىمدىق مەديتسينالىق كومەك كورسەتۋدىڭ جانە اۋرۋلار پروفيلاكتيكاسىنىڭ بارلىق دەڭگەيلەرىندە قاراجاتتى پايدالانۋدىڭ تيىمدىلىگى مەن اشىقتىعىن ارتتىرۋ بولىپ تابىلادى.

تاپسىرمالار جاڭا, ماقسات ءبىر

دەنساۋلىق ساقتاۋ – مەملەكەت كوپ كوڭىل بولەتىن الەۋمەتتىك ماڭىزدى سالالاردىڭ ءبىرى. سوڭعى جىلدارى كوپتەگەن رەفورمالار بولدى, الايدا حالىقتا مىندەتتى مەديتسينالىق ساقتاندىرۋ جۇيەسىنە قاتىستى كوپتەگەن سۇراقتار تۋىندادى.

«حالىق ۇنىنە قۇلاق اساتىن مەملەكەت» تۇجىرىمداماسىنا سايكەس بارلىق تاراپتار مۇددەلەرىنىڭ تەپە-تەڭدىگىن ساقتاۋدى ەسكەرە وتىرىپ, ءبىز قوعامنىڭ سۇرانىستارى مەن ازاماتتاردىڭ مۇددەلەرىنە ۋاقتىلى جاۋاپ بەرۋگە تىرىسامىز.  سوندىقتان, ءاربىر ارىز-شاعىم ءبىز ءۇشىن وتە ماڭىزدى.

مەملەكەت باسشىسى 2024 جىلعى 7 اقپاندا جاڭا ۇكىمەتتىڭ الدىنا مەملەكەتتىك قاراجاتتىڭ جۇمسالۋىنا ءتيىستى باقىلاۋدى قامتاماسىز ەتۋ, ولاردى پايدالانۋدىڭ جوعارى اشىقتىعى مەن تيىمدىلىگىن, مەديتسينالىق كومەك ساپاسىنىڭ جوعارى بولۋىن قامتاماسىز ەتۋ, مەديتسينالىق كومەكتىڭ بىرىڭعاي پاكەتىن ەنگىزۋ جانە ازاماتتاردىڭ جەكەلەگەن الەۋمەتتىك ءالسىز ساناتتارىن مەديتسينالىق ساقتاندىرۋمەن, اسىرەسە اۋىلدىق جەرلەردە قامتۋدى كەڭەيتۋ مىندەتتەرىن قويعانى بەلگىلى.

دەنساۋلىق ساقتاۋ مينيسترلىگى تەرەڭ جۇيەلى دياگنوستيكا جۇرگىزىپ, مىندەتتى مەديتسينالىق ساقتاندىرۋ جۇيەسىندەگى جانە جالپى سالاداعى پروبلەمالاردىڭ سەبەپتەرىن انىقتادى.

قازىرگى ۋاقىتتا ءبىز دەنساۋلىق ساقتاۋ جۇيەسىنىڭ بارلىق باسقارۋ بۋىندارىنىڭ جۇمىسىنداعى جۇيەلىك ىركىلىستى جويۋ بويىنشا جۇمىس ىستەپ جاتىرمىز, ماتەريالدىق جانە قارجىلىق رەسۋرستاردى باسقارۋ بويىنشا ينستيتۋتسيونالدىق نەگىز قۇرۋدامىز, ناتيجەلەرگە قول جەتكىزۋ ءۇشىن باسقارۋدىڭ بارلىق دەڭگەيلەرىندە دەربەس جاۋاپكەرشىلىكتى ارتتىردىق.

پروبلەمالاردى شەشۋ ءۇشىن نە قاجەت؟                                                 مەديتسينالىق كومەك كورسەتۋدىڭ بۇكىل جۇيەسىن قايتا قۇرۋ, بولىنەتىن قاراجاتتىڭ اشىقتىعى مەن تيىمدىلىگىنىڭ جوعارى دەڭگەيىن قامتاماسىز ەتۋ, دەنساۋلىق ساقتاۋ جۇيەسىن مەملەكەتتىك باسقارۋ ساپاسىن ەلەۋلى ارتتىرۋ, بىرىڭعاي پاكەتتى قالىپتاستىرۋ جانە قارجىلاندىرۋدىڭ ارالاس مودەلىنەن ساقتاندىرۋ مودەلىنە ءوتۋ تالاپ ەتىلەتىنى انىق.

كوپتەگەن مىندەتتەر بار. مىسالى, دەنساۋلىق ساقتاۋ جۇيەسىنىڭ ازاماتتاردىڭ قاجەتتىلىكتەرى مەن مۇددەلەرىنە جاۋاپتىلىعىن قامتاماسىز ەتۋ, ساقتاندىرىلماعان ازاماتتار ءۇشىن دياگنوستيكا مەن ەمدەۋدىڭ جەكەلەگەن تۇرلەرىنىڭ قولجەتىمدىلىگىن جانە مەديتسينالىق ساقتاندىرۋ قورى قىزمەتىنىڭ اشىقتىعىن ارتتىرۋ تۇر.

دەنساۋلىق ساقتاۋ مينيسترلىگى تولىققاندى ۆەدومستۆولىق ستاتيستيكانى جەتىلدىرۋ بويىنشا جۇمىس ىستەۋدە, بۇل ەلىمىزدىڭ دەنساۋلىق ساقتاۋ جۇيەسىن دامىتۋداعى ترەندتەردى جانە مەملەكەتتىك كىرىستەردىڭ ەلەۋلى كولەمىنىڭ تۇپكىلىكتى ناتيجەسىن سەنىمدى باعالاۋعا مۇمكىندىك بەرەدى.

مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىستى ايتىلعان سىنعا قاراماستان, ونى ساقتاۋ قاجەت, ويتكەنى ول سالاعا  جىلىنا 1,4 ترلن. تەڭگەدەن استام, ونىڭ ىشىندە رەسپۋبليكالىق بيۋدجەتتەن تىس 1,0 ترلن. تەڭگە تابىس اكەلەدى. مەملەكەتكە سالانى قارجىلاندىرۋدىڭ وسى كوزىنىڭ شىعىندارىن وتەۋ قيىنعا سوعادى.  

قوعامنىڭ سالا قاراجاتىن پايدالانۋدىڭ اشىقتىعى مەن تيىمدىلىگىنە قاتىستى سىنى نەگىزدى. ەكونوميكالىق جانە قارجىلىق مەنەدجمەنت پەن ۇيلەستىرۋ دەڭگەيىن ارتتىرۋ ءۇشىن دەنساۋلىق ساقتاۋ مينيسترلىگىنىڭ وزىندە باسقارۋ قۇرىلىمى جەتىلدىرىلدى.

مەديتسينالىق كومەكتىڭ بىرىڭعاي پاكەتىن قالىپتاستىرۋ بويىنشا جۇمىس باستالدى, ول مەملەكەت كەپىلدىك بەرگەن بازالىق بولىكتەن جانە سالانىڭ قولدا بار رەسۋرستارىن ەسكەرە وتىرىپ, جۇمىس بەرۋشىلەر مەن ازاماتتاردىڭ ءوز اۋدارىمدارىنىڭ ەسەبىنەن قالىپتاستىرىلاتىن ساقتاندىرۋ بولىگىنەن تۇرادى.  بۇل شارا 2027 جىلعا دەيىن كەزەڭ-كەزەڭىمەن ىسكە اسىرىلاتىن بولادى.

دارىگەرلەردىڭ مىندەتتەرىنە كوپتەگەن مەديتسينالىق اقپاراتتىق جۇيەلەرگە دەرەكتەردى ەنگىزۋ فۋنكتسياسىن ەنگىزۋ دارىگەردىڭ پاتسيەنتتەردىڭ پروبلەمالارىن شەشۋدەگى باستى ميسسياسىنان ايىردى. بۇگىنگى تاڭدا دارىگەر العاشقى قابىلداۋ كەزىندە پاتسيەنتتى قابىلداۋعا ارنالعان نورماتيۆ بويىنشا 15-20 مينۋتتان تۇراتىن اقپاراتتىق جۇيەلەرگە مالىمەتتەردى ەنگىزۋگە شامامەن 13 مينۋت جۇمسايدى. بۇل حالىقتىڭ قاتتى نارازىلىعىن تۋدىرادى.

بىراق دەنساۋلىق ساقتاۋ جۇيەسىنىڭ باستى وسال جەرى جالپى پراكتيكا دارىگەرىنىڭ نەمەسە تەراپەۆتتىڭ ديسپەتچەردى مىندەتتى ءوتۋىن ەنگىزۋ بولدى. قىزمەتتەردى تۇتىنۋدى باقىلاۋ جۇيەسىن تسيفرلىق سۇيەمەلدەۋدىڭ بولماۋى ازاماتتاردىڭ ۋاقىتىن ءتيىمسىز وتككىزۋىن كۇشەيتتى.   

وسىعان بايلانىستى, ستاندارتتاردى, كلينيكالىق حاتتامالاردى, پاتسيەنتتەردىڭ مارشرۋتتارىن جانە «الەۋمەتتىك مەديتسينالىق ساقتاندىرۋ قورى» كەاق-پەن ءوزارا ءىس-قيمىل ءتارتىبى مەن قاعيدالارىن قايتا قاراۋ بويىنشا جۇمىس باستالدى.

اۋىلدا مەديتسينالىق  كومەكتىڭ قولجەتىمدىلىگى مەن ساپاسىن جاقسارتۋ ءۇشىن 2023 جىلدان باستاپ اۋىلدىق ەلدى مەكەندەردى 655 جاڭا مەديتسينالىق-سانيتاريالىق العاشقى كومەك نىسانىمەن قامتاماسىز ەتۋدى,  32 اۋداندىق ورتالىق اۋرۋحانانى  جاڭعىرتۋ  جولىمەن شۇعىل مەديتسينالىق كومەكتىڭ  ۋاقتىلىعىن ارتتىرۋدى, اۋىلدىق وڭىرلەردە 1100 مەديتسينا قىزمەتكەرىن جۇمىس ىستەۋ ءۇشىن دايارلاۋدى قامتيتىن  «اۋىلدىق دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى ىسكە اسىرىلۋدا.  بۇل شارالار اۋرۋلاردى ەرتە انىقتاۋدى ارتتىرۋعا, پروفيلاكتيكا مەن سكرينينگتىك باعدارلامالاردى جاقسارتۋعا, سونداي-اق اۋىل تۇرعىندارىنا مەديتسينالىق كومەك كورسەتۋدىڭ جاڭا تاسىلدەرىن ەنگىزۋگە مۇمكىندىك بەرەدى.

دەنساۋلىق ساقتاۋ ينفراقۇرىلىمىن دامىتۋدىڭ 2030 جىلعا دەيىنگى ۇزاق مەرزىمدى تۇجىرىمداماسى بەكىتىلدى, تۇجىرىمدامانى ىسكە اسىرۋدىڭ ءبىرىنشى كەزەڭى 34 باستى جوبادا كوزدەلگەن دەنساۋلىق ساقتاۋدىڭ نەگىزگى نىساندارىن  جوبالاۋ مەن سالۋدى قامتيدى.  سونداي-اق, 2024-2026 جىلدارعا بولىنگەن قارجىلاندىرۋ شەگىندە مەديتسينالىق مەكەمەلەردى كۇردەلى جوندەۋ جانە جاراقتاندىرۋ جونىندەگى جۇمىس جالعاستىرىلاتىن بولادى. ەكىنشى كەزەڭدە جاڭا قۇرىلىس, جوندەۋ جانە تولىق جاراقتاندىرۋ جولىمەن 2,5 مىڭ مەديتسينالىق نىساندى جاڭعىرتۋ جوسپارلانۋدا.

اعىمداعى جىلعى 1 ماۋسىمنان باستاپ بوساندىرۋ, نەوناتولوگيا, بالالار نەۆرولوگياسى, بالالار اللەرگولوگياسى, رەۆماتولوگيا بويىنشا مەديتسينالىق كومەك كورسەتەتىن ۇيىمدار ءۇشىن تاريفتەردىڭ مولشەرى ارتىپ كەلەدى.

1 قىركۇيەككە قاراي قاجەتتى راسىمدەردىڭ اياقتالۋىنا قاراي ابدومينالدىق حيرۋرگيا, ينفەكتسيا, نەۆرولوگيا, گاستروەنتەرولوگيا, كارديولوگيا, تراۆماتولوگيا جانە ورتوپەديا, نەفرولوگيا, ەندوكرينولوگيا, ونكوگەماتولوگيا سياقتى باعىتتار بويىنشا تاريفتەردى كوتەرۋ جوسپارلانۋدا.  

قابىلدانعان شارالار حالىقتىڭ ساپالى مەديتسينالىق كومەككە جوعارى قولجەتىمدىلىگىن قامتاماسىز ەتۋگە, ازاماتتاردىڭ قالتا شىعىستارىن ازايتۋعا, سونداي-اق مەديتسينالىق ۇيىمداردىڭ شىعىن قاۋپىنىڭ دەڭگەيىن تومەندەتۋگە ارنالعان.

تاريفتىك ساياساتتاعى جاڭا تاسىلدەر جەكەلەگەن نوزولوگيالار بويىنشا كومەكتىڭ جوعارى قولجەتىمسىزدىگى, سونداي-اق قىزمەتتەر كورسەتۋدى از شىعىندى كەزەڭدەرگە اۋىستىرۋدى ىنتالاندىرۋ مىندەتىن شەشەدى.

ستاتيستيكانىڭ  قولجەتىمدىلىگى مەن  دۇرىستىعى, ونىڭ ىشىندە كادر جانە ماتەريالدىق-تەحنيكالىق رەسۋرستاردى باسقارۋ جۇيەسى بويىنشا پروبلەمالاردى  شەشۋ تالاپ ەتىلەدى,  بۇل سالانىڭ وسى باعىتتارىن ساپالى جوسپارلاۋعا جانە باسقارۋعا مۇمكىندىك بەرەدى.

بوساندىرۋ جانە بالالار قىزمەتىن جەتىلدىرۋگە ەرەكشە نازار اۋدارىلادى. ءبىر تاۋلىكتە ەلدە 1000-عا جۋىق جاڭا تۋعان نارەستە دۇنيەگە كەلەدى. جىل سايىن 400 مىڭنان استام جۇكتى ايەل امبۋلاتوريالىق قىزمەت ماماندارىندا باقىلاۋدا بولادى.

جۇكتى ايەلدەر مەن جاڭا تۋعان نارەستەلەردىڭ دەنساۋلىعىن ساقتاۋ جانە پاتولوگيالارىن ەرتە انىقتاۋ ءۇشىن 11 ميلليوننان استام نارەستەنى قامتيتىن سكرينينگتەر جۇرگىزىلەدى. ء«بىر كۇندىك كلينيكا» پيلوتتىق جوباسى ەنگىزىلۋدە. جوبا بارلىق وڭىرلەردە كەزەڭ-كەزەڭىمەن جۇزەگە اسىرىلادى, بۇل پرەناتالدىق دياگنوستيكانىڭ يننوۆاتسيالىق ادىستەرىن قولدانۋعا جانە پاتولوگياسى بار بالالاردىڭ تۋ قاۋپىن ۋاقتىلى انىقتاۋعا مۇمكىندىك بەرەدى.

حالقىمىزعا مامانداندىرىلعان مەديتسينالىق كومەك  كورسەتۋ تاسىلدەرى قايتا قارالاتىن بولادى. العاشقى شارالار قازىردىڭ وزىندە قابىلداندى – اعىمداعى جىلدىڭ ناۋرىز ايىنان باستاپ جوسپارلى ەمدەۋگە جاتقىزۋعا ارنالعان تالداۋلاردىڭ تىزبەسى 42 زەرتتەۋگە قىسقارتىلدى, تالداۋلاردىڭ جارامدىلىق مەرزىمى 3-6 ەسەگە ۇلعايدى, سونداي-اق پاتسيەنتتەردىڭ مارشرۋتتارىن وڭتايلاندىرۋ بويىنشا شارالار قابىلداندى.

دەنساۋلىق ساقتاۋ جۇيەسىن ودان ءارى دامىتۋ جانە اعىمداعى جاعدايلاردا قالىپتى جۇمىس ىستەۋدى قامتاماسىز ەتۋ تەتىكتەرىن ازىرلەۋ بويىنشا جۇمىس جۇرگىزىلۋدە. حالىقارالىق وزىق تاجىريبەنى, مەديتسينالىق ۇيىمداردىڭ باسشىلارىن ىرىكتەۋ جۇيەسىن ەسكەرە وتىرىپ, اۋرۋحانالىق مەنەدجمەنتتىڭ جاڭا ستاندارتتارىن ازىرلەۋ جانە ەنگىزۋ, بولىنەتىن رەسۋرستاردى پايدالانۋ تيىمدىلىگى مەن قارجىلىق تۇراقتىلىعى ءۇشىن جەرگىلىكتى اتقارۋشى ورگانداردىڭ جاۋاپكەرشىلىگى مەن تارتىلۋىن ودان ءارى ارتتىرۋ بويىنشا جۇمىس جۇرگىزىلۋدە.

كادرلار كوپ نارسەنى شەشەدى

دارىگەرلەردىڭ جەتىسپەۋشىلىگى, اسىرەسە ارنايى مامانداندىرۋ تۋرالى كوپ ايتىلادى.  بىراق, وسى ۋاقىتقا دەيىن سالادا مەديتسينالىق قىزمەتتەر مەن سەرۆيستەردىڭ جوعارى ساپاسىنا باعىتتالعان مەديتسينا قىزمەتكەرلەرىنە ەڭبەكاقى تولەۋدىڭ ىنتالاندىرۋشى مودەلى جاسالماعان.

ءبىز كادرلاردى دايارلاۋ جانە وقىتۋ ساپاسى سالاسىنداعى ساياساتقا, ولاردىڭ ساپالى جانە ناتيجەلى قىزمەتىن قامتاماسىز ەتۋدىڭ قولدانىستاعى تەتىكتەرىن قايتا باعالاۋعا, سونداي-اق وندىرگىش كۇشتەردى ورنالاستىرۋداعى گەوگرافيالىق تەڭگەرىمسىزدىكتەرگە تالداۋ جۇرگىزدىك.

وكىنىشكە وراي, مەديتسينالىق ۇيىمداردىڭ شتاتتارىنىڭ جەتكىلىكسىز جۇمىس ىستەۋ ماسەلەسى ءالى دە بار جانە بۇل اسىرەسە اۋىلدىق ەلدى مەكەندەر دەڭگەيىندە سەزىلەدى. تاپشىلىقتىڭ نەگىزگى سەبەپتەرى – موتيۆاتسيانىڭ تومەندىگىنە, قۇقىقتىق سەنىمسىزدىكپەن, جوعارى پسيحوەموتسيونالدىق جۇكتەمەگە جانە الەۋمەتتىك كەپىلدىكتەردىڭ جەتكىلىكسىزدىگىنە بايلانىستى مەديتسينالىق كادرلاردىڭ جۇمىستان كەتۋى.

دەنساۋلىق ساقتاۋدىڭ كادرلىق ساياساتىن دامىتۋ تۇجىرىمداماسى, ەڭ الدىمەن, كاسىپتىڭ ءيميدجى مەن بەدەلىن ارتتىرۋعا باعىتتالاتىن بولادى.

ەسەپكە  الۋ پروتسەسىن تسيفرلاندىرۋ  جانە بىرىڭعاي جۇيەنى قۇرۋ امالدارى  بۇرىندا قولعا الىنعان بولاتىن, الايدا  اياعىنا دەيىن جەتكىزىلگەن جوق. قازىرگى تاڭدا مەنىڭ ارىپتەستەرىم اي سايىن دارىگەرلىك ستاۆكالاردىڭ بولۋىنا قاراي دەرەرەكتەردى قولمەن جينايدى. دەنساۋلىق ساقتاۋدىڭ كادر رەسۋرستارىن ەسەپكە الۋدىڭ بىرىڭعاي ۇلتتىق جۇيەسىن قۇرۋدى اياقتاۋ جوسپارلانۋدا, وندا ءبىرىنشى كۋرس ستۋدەنتىنەن باستاپ جۇمىس ىستەيتىن دەنساۋلىق ساقتاۋ مامانىنا دەيىنگى بارلىق دەرلىك اقپارات مەملەكەتتىك تاپسىرىستى ءبولۋ, ءتۇسۋ, وقىتۋ, جۇمىسقا ورنالاستىرۋ جانە بۇكىل كاسىبي قىزمەت بويى ۇزدىكسىز دامۋ راسىمىنەن باستاپ تسيفرلاندىرىلاتىن بولادى.

مەديتسينالىق-سانيتاريالىق العاشقى كومەك جۇيەسىن جەتىلدىرۋ ماقساتىندا ەمحانالىق بۋىن دارىگەرلەرى مەن مەيىرگەرلەرىنىڭ بىلىكتىلىگىن ارتتىرۋعا باعىتتالعان شارالار كەشەنى ىسكە اسىرىلۋدا.

ماماندىقتىڭ بەدەلىن ارتتىرۋ بويىنشا شارالار قاراستىرىلۋدا (جالاقىنى كوتەرۋ, تولەمدەردى ىنتالاندىرۋ, كاسىبي ءوسۋ, ەڭبەك جانە الەۋمەتتىك جەڭىلدىكتەر, قولايلى ەڭبەك جاعدايلارىن جاساۋ).

قورىتىندىلاي كەلە, سالا الدىنا قويىلعان مىندەتتەردى شەشۋ ءۇشىن دەنساۋلىق ساقتاۋ مينيسترلىگى ساقتاندىرۋ جۇيەسىن جاڭعىرتۋعا جانە مەديتسينالىق كومەكتى ۇيىمداستىرۋعا, بيزنەس-پروتسەستەردى قايتا قۇرۋعا, اشىقتىقتى, تيىمدىلىك پەن ۇتىمدىلىقتى, بولىنەتىن قارجىلىق جانە ماتەريالدىق رەسۋرستاردى قامتاماسىز ەتۋگە, سونداي-اق ازاماتتار مەن پاتسيەنتتەردىڭ قاجەتتىلىكتەرىنە باستى نازاردى اۋدارا وتىرىپ, سالا كادرلارىن سالا الدىندا تۇرعان سىن-قاتەرلەردى شەشۋگە باعدارلاۋعا كىرىسكەنىن اتاپ وتكىم كەلەدى. حالىقتىڭ قاجەتتىلىكتەرى مەن تىلەكتەرىنە جۇيەنىڭ جاۋاپتىلىعىن ارتتىرۋ ماڭىزدى باعىت بولىپ ايقىندالدى. مەديتسينا قىزمەتكەرلەرىمەن بىرگە ءبىز بارلىق ماقساتتارعا قول جەتكىزەمىز.

ناتيجەسىندە ءبىز پاتسيەنتتىڭ مۇقتاجدارى مەن قاجەتتىلىكتەرىنە باعدارلانعان حالىققا مەديتسينالىق كومەك كورسەتۋدىڭ جەتىلدىرىلگەن مودەلىن الامىز, دارىگەرلەرگە نەگىزسىز بارۋ مەن زەرتتەۋلەردى بارىنشا الىپ تاستايمىز, پاتسيەنتتەردىڭ مارشرۋتتارى قايتا قۇرىلادى, ال مەديتسينالىق كومەك كورسەتۋدىڭ بارلىق بۋىندارىنىڭ جۇمىسى جاقسى ۇيلەستىرىلەدى جانە ءوزارا ينتەگراتسيالانادى, مەملەكەتتىڭ مىندەتتەمەلەرى تەڭگەرىمدىلىككە قول جەتكىزۋ ءۇشىن سالانىڭ قولدا بار رەسۋرستارىنا سايكەس كەلتىرىلەدى, تەگىن مەديتسينالىق كومەكتىڭ كەپىلدىك بەرىلگەن كولەمى شىنايىلىق قاعيداتتارىنا نەگىزدەلەتىن بولادى, مەديتسينالىق ۇيىمدار قىزمەتىنىڭ تۇراقتىلىعى قامتاماسىز ەتىلەدى, مەديتسينالىق تەحنولوگيالار مەن دارىلىك فورمۋليار دالەلدەنگەن تيىمدىلىككە نەگىزدەلەتىن بولادى, مىندەتتى الەۋمەتتىك مەديتسينالىق ساقتاندىرۋ  مەن  تەگىن مەديتسينالىق كومەكتىڭ كەپىلدىك بەرىلگەن كولەمىنىڭ پاكەتى بويىنشا اقىلى قىزمەتتەردىڭ كومەگىنە قولجەتىمدىلىكتى ارتتىرۋ ەسەبىنەن ازاماتتاردىڭ قالتاسىنا جۇكتەمەنى ءبىر مەزگىلدە تومەندەتە وتىرىپ, بىرقاتار دارىلىك زاتتار مەن مەديتسينالىق قىزمەتتەر بويىنشا قوسىمشا تولەمدى ەنگىزۋ پىسىقتالاتىن بولادى.

مەديتسينا جۇرتشىلىعىنا كوپتەگەن مىندەتتەر مەن جوسپارلار قويىلدى, جاۋاپكەرشىلىك ودان دا كوپ. كاسىبي مەرەكە قارساڭىندا بارلىق ارىپتەستەرىمدى مەديتسينا قىزمەتكەرى كۇنىمەن شىن جۇرەكتەن قۇتتىقتايمىن!

سىزدەردىڭ ەڭبەكتەرىڭىز – قايسارلىقتىڭ, بىلىكتىلىك پەن مەيىرىمدىلىكتىڭ ۇلگىسى. كۇن سايىن سىزدەر كوپتەگەن ءومىردى ساقتاپ قالاسىزدار, دەنساۋلىقتى قالپىنا كەلتىرەسىزدەر جانە ميلليونداعان ادامداردىڭ جۇرەگىنە ءۇمىت ۇيالاتاسىزدار. سىزدەردىڭ جۇمىستارىڭىز ۇلكەن شىدامدىلىقتى, ءبىلىمدى جانە كۇش-جىگەردى قاجەت ەتەدى. سىزدەرگە زور دەنساۋلىق, اماندىق, كاسىبي تابىس جانە جاڭا جەتىستىكتەر تىلەيمىن. سىزدەردىڭ جۇمىستارىڭىز ارقاشان جوعارى باعالانسىن جانە ءاربىر جۇمىس كۇنى ادامدارعا كومەكتەسۋدەن قاناعات پەن قۋانىش اكەلسىن. ماماندىققا دەگەن ادالدىقتارىڭىز بەن ادامگەرشىلىكتەرىڭىز ءۇشىن راحمەت!

اقمارال ءالنازاروۆا,

قازاقستان رەسپۋبليكاسىنىڭ

دەنساۋلىق ساقتاۋ ءمينيسترى