جالپى, ورال قالاسىندا كۇنى بۇگىنگە ساياجايداعى جالعىز ۇيلەرىن سۋ باسقان 71 وتباسىنا باسپانا بەرىلدى. «بۇل جۇمىس ءارى قاراي جالعاسادى», دەيدى ورال قالاسى اكىمىنىڭ ورىنباسارى جاندوس دۇيسەنعاليەۆ.
بيىل كوكتەمدە سۋ تاسقىنى كەزىندە ورال قالاسى ماڭىنداعى 8 732 ساياجاي ءۇيى سۋ استىندا قالدى. مەملەكەت باسشىسى سۋ تاسقىنىنان زارداپ شەككەن تۇرعىندارعا ءتيىستى كومەك كورسەتۋدى تاپسىرعان بولاتىن.
ۇكىمەت باسشىسىنىڭ تاپسىرماسىنا سايكەس, قارجىلىق ۇيىمدار مەن دەمەۋشىلەر وڭىردەگى زارداپ شەككەن تۇرعىندارعا قولۇشىن سوزدى. ساياجاي اۋماعىنداعى جالعىز باسپاناسى سۋعا كەتىپ, اپاتتى دەپ تانىلعان تۇرعىندارعا جاڭا ۇيلەر ساتىپ الۋ جانە سالۋ بويىنشا جۇمىس قىزۋ ءجۇرىپ جاتىر. سۋعا كەتكەن ساياجاي ۇيلەرىنىڭ 2 579-ى – «جالعىز باسپانا» دەپ تانىلعان بولاتىن.
سۋعا كەتكەن ساياجاي ءۇيىنىڭ ءبىرى قالا ىرگەسىندەگى كوماروۆو ساياجاي قوعامىنىڭ تۇرعىنى ايناش سامەنوۆانىڭ جالعىز باسپاناسى ەدى. كوميسسيا شەشىمىمەن ونىڭ ءۇيى «جارامسىز» دەپ تانىلعان. بۇگىن ول جاڭا پاتەرىنە كىردى.
«2017 جىلى كوماروۆو ساياجايىنان ءۇي سالىپ, وتباسىمىزبەن تۇرىپ جاتقان ەدىك. كوكتەمگى تاسقىن كەزىندە ءۇيىمىزدى سۋ باستى. قازىر, مىنە, جاڭا پاتەردىڭ كىلتىن قولىمىزعا الدىق. قالانىڭ ورتالىعىندا جاڭا ۇيدە تۇرامىز دەپ كۇتكەن جوقپىز. وسىنداي جاعداي جاساعان مەملەكەت باسشىسىنا العىسىمدى بىلدىرەمىن», – دەدى ول.
باتىس قازاقستان وبلىسى
