فوتو: ۇكىمەتتىڭ ءباسپاسوز قىزمەتى
قانات بوزىمباەۆ اقتوبەلىكتەرگە تاباندىلىق پەن شىدامدىلىق تانىتقانى ءۇشىن, سونداي-اق مەملەكەت باسشىسىنىڭ ۇندەۋىن قولداعان كاسىپكەرلەرگە العىسىن ءبىلدىردى.
وبلىس بويىنشا بارلىعى 4691 ءۇي زارداپ شەككەن, ونىڭ 992-ءسى اپاتتىق دەپ تانىلعان. 3095 ءۇي جوندەۋگە كەلەدى, 475 ءۇي مەن پاتەر ساتىپ الىنادى جانە تاعى 517 ءۇي سالىنباق. تۇرعىن ءۇيدى ساتىپ الۋ جانە سالۋ شىعىندارىنىڭ باسىم بولىگىن دەمەۋشىلەر مەن مەتسەناتتار وتەيدى.
اقتوبە وبلىسى اكىمى اسحات شاحاروۆتىڭ ايتۋىنشا, «قامقور-اقتوبە 2024» قوعامدىق قورى ويىل اۋدانىندا 175, ىرعىز اۋدانىندا 134 ءۇي سالادى. قوبدا اۋدانىندا 147 تۇرعىن ءۇيدى بولات وتەمۇراتوۆ اتىنداعى قور سالىپ جاتىر. تەمىر اۋدانىندا تاعى 21 تۇرعىن ءۇي «قازاقستان حالقىنا» قوعامدىق قورىنىڭ قاراجاتىنا سالىنىپ جاتىر. BI Group كومپانياسى ايتەكە بي اۋدانىندا 26, مۇعالجار اۋدانىندا 14 ءۇي سالادى.
Eurasian Resources Group كومپانيالار توبى مەن «قامقور-اقتوبە 2024» قوعامدىق قورى زارداپ شەككەندەرگە باسپانا ساتىپ الۋعا دايىن ەكەندىكتەرىن ءبىلدىردى. بۇگىندە ولاردىڭ وكىلدەرى 31 وتباسىنا پاتەر كىلتتەرىن تابىستادى.
«بۇگىنگى كۇن ءبىز ءۇشىن ەرەكشە ەستە قالماق. ءۇش اي بۇرىن ءبىزدى ەۆاكۋاتسيالاعاندا, تاعدىرىمىز ودان ءارى قالاي بولارىن بىلمەدىك. بۇگىن بىزگە قالا ورتالىعىنان پاتەر بەرىلىپ جاتىر. مۇنداي قۋانىشقا قالاي سەنەرىمدى بىلمەي تۇرمىن. قيىن كەزدە قول ۇشىن سوزىپ, دەمەۋ بولعان جاندارعا العىسىمىز شەكسىز», دەپ اقتوبەلىك نۇرلان بەكتاسوۆ ءوز قۋانىشىمەن ءبولىستى.
وبلىس اكىمدىگىنە 1000-عا جۋىق وتباسىن قونىستاندىرۋ كەرەك. ۆيتسە-پرەمەر قۇرىلىس قارقىنىن جەدەلدەتۋدى تاپسىردى.
«كوپ جۇمىس بار, كەيبىر اۋدانداردا قوسىمشا جۇمىس كۇشى مەن تەحنيكانى ەكى ەسەگە ارتتىرۋ قاجەت. تۇرعىن ءۇيدى قالپىنا كەلتىرۋ ماسەلەسى پرەزيدەنتتىڭ جەكە باقىلاۋىندا تۇر», دەپ اتاپ ءوتتى ۆيتسە-پرەمەر.
سۋ تاسقىنىنان زارداپ شەككەندەر ءۇشىن سالىنىپ جاتقان تۇرعىن ۇيلەردى مەردىگەر ۇيىمدار جاز مەزگىلىنىڭ سوڭىنا دەيىن تاپسىرۋعا ءتيىس. قۇرىلىس بارىسىن اقتوبە وبلىسى اكىمدىگىنىڭ رەسمي سايتىندا ونلاين رەجيمدە باقىلاۋعا بولادى.
