فوتو: azattyq-ruhy.kz
قۇرباندىق دۇرىس بولۋ ءۇشىن باۋىزدالاتىن مالعا قاتىستى شاريعاتىمىزدا مىناداي تالاپتار قويىلادى:
- قۇرباندىققا قوي, ەشكى, ءىرى قارا نەمەسە تۇيە شالۋ. مالدىڭ ەركەگى دە, ۇرعاشىسى دا جارايدى. ەتى كوپ, ءدامى جاقسى بولعانى ابزال.
قوي مەن ەشكى ءبىر ادامنىڭ اتىنان باۋىزدالادى. ءبىر ادام ەكى قوي باۋىزداسا, ەكەۋى دە قۇرباندىق بولادى جانە ەكى قۇرباندىقتىڭ ساۋابىن الادى. ال, تۇيە مەن ءىرى قارانى ءبىر ادامنان جەتى ادامعا دەيىن شالۋعا بولادى. مۇندا جەتى ادامنىڭ دا نيەتى قۇرباندىق شالۋ نەمەسە ەتىن ساداقا ەتۋ بولۋ كەرەك.
- اقاۋى جوق, ءمىنسىز مالدى قۇرباندىققا شالۋ. كوزى كورمەيتىن, ءبىر كوزى جوق, اقساق, تىم ارىق, تىستەرى جوق, قۇلاعى كەسىلگەن, جەلىنى كەپكەن, قۇيرىعى نەمەسە قۇلاعىنىڭ ۇشتەن ءبىر بولىگىنەن كوبى كەسىلگەن مالدى قۇرباندىققا شالۋ دۇرىس ەمەس.
ءمۇفتيات مالىمەتىنشە, ءمۇيىزى جوق نەمەسە ءمۇيىزى سىنعان, قۇلاعى جارىلعان نەمەسە تەسىلگەن مالدى قۇرباندىققا شالۋعا بولادى. سونىمەن قاتار پىشتىرىلگەن مالدى دا قۇرباندىققا شالادى. ونداي مالدىڭ ەتى مول ءارى ءدامى ءتاتتى بولادى جانە ول ايىپ بولىپ ەسەپتەلمەيدى.
ساتىپ العان قۇرباندىق مالى ايىپتى بولىپ قالسا, ونى ساۋ مالعا اۋىستىرادى. مالدى باۋىزدايتىن كەزدە نە باۋىزداۋ سەبەبىمەن كوزىن شۇقىپ السا نەمەسە سويۋعا اپارا جاتىپ اياعىن سىندىرىپ السا, ونىڭ وقاسى جوق.
- بەلگىلى جاسقا جەتكەن مالدى قۇرباندىققا شالۋ. قوي مەن ەشكى ءبىر جاسقا جەتۋ كەرەك. ۇلكەندىگى ءبىر جاسار قويعا ۇقساس التى ايعا تولعان سەمىز ءارى ءىرى قويدى دا قۇرباندىققا شالۋعا رۇقسات ەتىلەدى. ال, ءىرى قارا ەكى جاسقا, تۇيە بەس جاسقا تولۋى شارت.
پايعامبارىمىز (وعان اللانىڭ سالاۋاتى مەن سالەمى بولسىن): «مۋسيننادان باسقاسىن سويماڭدار. سەندەرگە قيىندىق تۋعاندا عانا قويدىڭ جازاعاسىن سويىڭدار», دەگەن. مۇنداعى «مۋسيننا» دەپ بەس جاسار تۇيەگە, ەكى جاسار ءىرى قاراعا, ءبىر جاسار قويعا ايتىلادى. ءابۋ حانيفا, قويدىڭ جازاعاسى ونىڭ التى ايلىعى دەپ تۇسىندىرەدى.
