استانا-الماتى تاسجولىنىڭ باسىم بولىگى قوقىستان تازارتىلدى

استانا قالاسىنىڭ جانە قاراعاندى, جامبىل وبلىستارى قاتىسۋشىلارىنان بولەك, ولارعا الماتى وبلىسىنىڭ ەرىكتىلەرى قوسىلدى.

«استانا – الماتى» تاسجولىنىڭ جامبىل وبلىسى اۋماعىنداعى ۇزىندىعى 224 شاقىرىمدى قۇرايتىن ۋچاسكەسىندە «جاستار رۋحىنىڭ» بەلسەندىلەرى مەن ۆولونتەرلەرى جول جيەگىنەن 10 توننادان استام قوقىس جينادى. بۇگىن ەرىكتىلەر توبى الماتى وبلىسىنا جەتتى. وسىلايشا, باس-اياعى 1 مىڭ شاقىرىمنان استام جول تازارتىلدى.

ء«بىز ەستافەتانى جامبىل وبلىسىنان قابىلداپ الدىق. قازىردىڭ وزىندە ەكى وبلىستىڭ شەكاراسىندا, ياعني قانشەڭگەل اۋىلى ماڭىندا جامبىل اۋدانىنىڭ 250 تۇرعىنى اكتسياعا قوسىلدى. ءارى قاراي ءبىز تازالىق جۇمىسىن ىلە اۋدانىنىڭ اقشي اۋىلىندا جالعاستىردىق. وندا بەلسەندىلەر مەن ۆولونتەرلەردەن بولەك, جەرگىلىكتى تۇرعىندار دا تازالىق جۇمىسىن جۇرگىزىپ جاتىر», دەدى «AMANAT» پارتياسى الماتى وبلىستىق فيليالى توراعاسى قۋات بايعوجاەۆ.

ايتا كەتەيىك, «قاراعاندى – بالقاش» تاسجولى بويىنان جينالعان قوقىس پوليگوندارعا شىعارىلادى. بۇل باعىتتا «قازاۆتوجول» ۇك» اق جاردەمدەسىپ جاتىر.

ء«بىز تازالاماساق, كىم تازالايدى؟ ادامداردىڭ ءوتىپ بارا جاتىپ, جول بويىنا قوقىس تاستاپ كەتەتىنى جانىما باتادى. سوندىقتان وسى ەستافەتاعا ادامداردىڭ كوپتەپ قىزىعۋشىلىق تانىتۋىندا تاڭعالارلىق ەشتەڭە جوق دەپ سانايمىن», دەدى الماتى وبلىسى جامبىل اۋدانى قانشەڭگەل اۋىلىنىڭ تۇرعىنى بايان نۇرجانقىزى.

ەسكە سالايىق, بۇعان دەيىن پرەزيدەنتتىڭ «تازا قازاقستان» جالپىۇلتتىق باستاماسى اياسىندا «AMANAT» پارتياسى ءار اپتا سايىن ۇيىمداستىرىلاتىن «تازا بەيسەنبى» ەكولوگيالىق اكتسياسىن باستاعان بولاتىن. ەلدى مەكەندەردەگى لاستانعان اۋماقتار بويىنشا ازىرلەنگەن كارتا نەگىزىندە ەل اۋماعىندا جول بويىنداعى اۋماقتاردان, ونەركاسىپتىك ايماقتاردان, تۇرعىن اۋدانداردان, الەۋمەتتىك نىسانداردان جانە باسقا دا كوپتەگەن اۋماقتاردان 475 ۋچاسكە انىقتالدى.