بيىلعى كوكتەمدە اتىراۋ قالاسىندا وتكەن ۇلتتىق قۇرىلتايدىڭ ءۇشىنشى وتىرىسىندا ەل پرەزيدەنتى قاسىم-جومارت توقاەۆ جاستاردى كىتاپ وقۋعا شاقىرىپ, ونەر-ءبىلىمنىڭ قاجەتتىلىگىن ەرەكشە اتاپ وتكەن بولاتىن.
مەملەكەت باسشىسىنىڭ باستاماسىن قولداۋ ماقساتىندا مادەنيەت جانە اقپارات مينيسترلىگى «اۋىل كىتاپحانالارىنا 100 كىتاپ» الەۋمەتتىك اكتسياسىن جاريالادى. باستاما كوپتەگەن مەملەكەتتىك ۇيىمنىڭ تاراپىنان قولداۋ تاپتى. سولاردىڭ ءبىرى – باتىس قازاقستان وبلىستىق پوليتسيا دەپارتامەنتى.
جاقىندا دەپارتامەنت باسشىسى, پوليتسيا پولكوۆنيگى ارمان ورازاليەۆ جازۋشى مۇقادەس ەسلامعالي ۇلى اتىنداعى سىرىم اۋداندىق ورتالىقتاندىرىلعان كىتاپحانا قورىنا 100 كىتاپ تارتۋ ەتتى. بۇعان دەيىن دە 335 مىڭ كىتاپ قورى بار رۋحانيات وشاعى ءتۇرلى جانرداعى جيناقتارمەن باي ءتۇستى.
بۇگىن ءبىز «اۋىل كىتاپحانالارىنا 100 كىتاپ» اتتى الەۋمەتتىك اكتسياعا ءوز ۇلەسىمىزدى قوسىپ وتىرمىز. «الاش» تاريحىمەن تىكەلەي بايلانىستى بۇل ەلدى مەكەن – تاريحي تۇلعالار شوعىرى شىققان قاسيەتتى دە تاعىلىمدى توپىراق. بۇگىن كىتاپحانا قورىنا تاپسىرىلىپ وتىرعان بۇل كىتاپتار ءوز وقىرمانىن تاباتىنىنا سەنىمدىمىز. جاستار اراسىندا كىتاپ وقۋ مادەنيەتىن ناسيحاتتاۋ جولىنداعى جۇمىستارىڭىز جەمىستى بولسىن», دەدى ارمان مولديار ۇلى.
كىتاپحانادا وتكەن كەزدەسۋگە ارنايى كەلگەن سىرىم اۋدانىنىڭ اكىمى جۇماگەلدى باتىرنيازوۆ تا اۋدان تۇرعىندارى اتىنان دەپارتامەنت باستىعىنا ريزاشىلىعىن ءبىلدىرىپ, العىسحات تارتۋ ەتتى. ءىس-شاراعا قاتىسقاندار ساياسي قۋعىن-سۇرگىن قۇرباندارىنىڭ ەسكەرتكىشىنە گۇل شوعىن قويدى. جاقىندا جاڭا عيماراتتا جاڭارىپ اشىلعان اۋداندىق مۇراجاي جادىگەرلەرىمەن تانىستى.
باتىس قازاقستان وبلىسى
