فوتو: liter.kz
پالاتا توراعاسى اتاپ وتكەندەي, 2029 جىلعا قاراي جالپى ىشكى ءونىمدى ەكى ەسەگە ۇلعايتۋ – اسا ماڭىزدى مىندەت. ءىس جۇزىندە – بۇل قازاقستاننىڭ ەكونوميكاسىن ەكى ەسەگە ارتتىرادى. الايدا, قازىرگى قالىپتاسقان جاعدايدا ونىڭ جۇزەگە اسۋى قيىن. سەنات سپيكەرى بۇل رەتتە, ەڭ الدىمەن, كۆازيمەملەكەتتىك سەكتوردىڭ, ونىڭ ىشىندە ەكونوميكاداعى وراسان زور سەكتوردى باسىپ العان مىڭداعان ءتيىمسىز كومپانيالاردىڭ ۇلەسىن قىسقارتۋ قاجەت ەكەنىن ايتتى.
«پاراديگمانى وزگەرتۋ ءۇشىن پرەزيدەنتىمىز قاسىم-جومارت كەمەل ۇلى توقاەۆتىڭ جارلىعى اياسىندا بەلسەندى ءارى ماقساتقا ساي ارەكەت ەتۋ ماڭىزدى. ياعني, ەكونوميكامىزدى ىرىقتاندىرۋ قاجەت. ەگەر قازىر بۇكىل كۆازيمەملەكەتتىك سەكتوردىڭ ۇلەسىن كۇرت قىسقارتپاساق, مەملەكەت ولاردى ءتيىمدى باسقارا المايدى. ولار – «سامۇرىق-قازىنا» مەن «بايتەرەك» حولدينگىنىڭ كوپ بولىگى. بۇدان باسقا, اكىمدىكتەر مەن مەملەكەتتىك ورگانداردا شارۋاشىلىق جۇرگىزەتىن تاعى 6 مىڭ مەملەكەتتىك كومپانيا بار. كوپتەگەن سەكتور بويىنشا جەكەشەلەندىرۋ پروتسەسى بەلسەندى جۇرگىزىلمەسە, جالپى ىشكى ءونىمدى ەكى ەسەلەي المايمىز. ەكى ەكونوميكا بولۋى كەرەك. بىزدە بىرەۋى بار. ەكىنشىسىن قۇرۋ ءۇشىن جاڭا پاراديگمالىق تاسىلدەر قاجەت. بۇل تەك جەكەشەلەندىرۋ, جەكە باستامالار, جاڭا ينۆەستورلار تارتۋ ارقىلى جۇزەگە اسۋى مۇمكىن. وسى باعىتتا دەپۋتاتتار مەن ۇكىمەت بەلسەندى ارەكەت ەتىپ, مەملەكەت باسشىسىنىڭ تاپسىرمالارىن جەدەل ورىندايدى دەپ ۇمىتتەنەمىز», دەدى سەنات توراعاسى.
ايتا كەتەيىك, بۇگىن سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا دەپۋتاتتار ۇكىمەتتىڭ جانە جوعارى اۋديتورلىق پالاتانىڭ 2023 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قارادى.
