ينۆەستيتسيا تارتۋدىڭ مۇمكىندىگى مەن ءتاسىلى

ءۇش ماڭىزدى كريتەري

كونسالتينگ اگەنتتىگىنىڭ پايىمىنشا, جوبانى باعالاۋ كەزىندە ينۆەستور وزىنە كاپيتالدى سالۋ نەمەسە سالماۋ تۋرالى شەشىم قابىلداۋعا كومەكتەسەتىن بىرنەشە ماڭىزدى كريتەريدى نازارعا الادى:

• رەنتابەلدىلىك. ينۆەستور ءبىرىنشى كەزەكتە جوبانىڭ كۇتىلەتىن كىرىستىلىگىنە تالداۋ جاسايدى. ولار بيزنەستىڭ رەنتابەلدىلىك يندەكسىنە (PI), ءوسىم الەۋەتىنە, اقشا اعىنىنا, ينۆەستيتسيا قايتارىمىنا (ROI) جانە باسقا دا ماڭىزدى قارجىلىق كورسەتكىشتەرگە باعالاۋ جۇرگىزەدى.
• وتەۋ مەرزىمى. ينۆەستورلار ءۇشىن سال­عان كاپيتالدان تۇسكەن تازا كىرىستىڭ شى­عىنمەن تەڭەسەتىن مەرزىمىن ءبىلۋ وتە ماڭىزدى. مەر­زىمدى باعالاۋ كەزىندە ەسەپتەۋدىڭ قاراپايىم نەمەسە ديناميكالىق ءتاسىلى قولدانىلادى. قاراپايىم باعالاۋ كوپ جاعدايدا وتەلۋ مەرزىمى 1-3 جىل ارالىعىن قۇرايتىن قىسقا­مەرزىمدى جوبالاردى ەسەپتەۋ ءۇشىن قاجەت بولادى. ال ديناميكالىق تاسىلمەن ەسەپتەگەن جاعدايدا كىرىستىڭ ارقالاي ءتۇسىمى جانە مۇمكىن تاۋەكەلدەر ەسكەرىلەدى, سوندىقتان بۇل ءتاسىل الدەقايدا ءدال بولىپ سانالادى.
• تاۋەكەل دەڭگەيى. تاۋەكەلدەر ءارتۇرلى بولۋى مۇمكىن: قارجىلىق, نارىقتىق, وپەراتسيالىق, قۇقىقتىق جانە تاعى باسقا.

ينۆەستورلاردى قايدان تابۋعا بولادى؟

رەسپۋبليكادا ءارتۇرلى جەكە جانە مەم­لەكەتتىك ينۆەستيتسيالىق اگەنتتىكتەر بار. سونىمەن بىرگە, جوبا ءۇشىن الەۋەتتى ينۆەس­تورلاردى ىزدەۋمەن اينالىساتىن ۇيىمدار دا جۇمىس ىستەيدى. كومپانيا سولاردىڭ ەڭ ماڭىزدىسى مەن تانىمالدارىن تىزبەلەيدى.

• «دامۋ» كاسىپكەرلىكتى دامىتۋ قورى». شاعىن جانە ورتا بيزنەستى دامىتۋعا جانە قولداۋعا ارنالعان مەملەكەتتىك قور كاسىپ­كەرلىكتى دامىتۋ ءۇشىن گرانت پەن ينۆەستي­تسيالاردى قوسا العاندا, ءتۇرلى باعدارلاما مەن قۇرال ۇسىنادى.
• «عىلىم قورى» اق. قوردى ءبىلىم جانە عىلىم مينيسترلىگى قۇرعان (كەيىن بۇل ۆەدوم­ستۆونىڭ اتاۋى جانە قۇرىلىمى اۋىسىپ كەتتى). ول جوعارى كوممەرتسيالىق تابىس اكەلۋى مۇمكىن پەرسپەكتيۆالى عىلىمي جوبا­لاردى گرانتتىق قارجىلاندىرۋمەن قام­تاماسىز ەتەدى. كانديداتتارعا قويىلاتىن باستى تالاپ – ەل ەكونوميكاسىنىڭ باسىم سالالارىنداعى ماڭىزدى مىندەتتەردى شەشۋ. قور قىزمەتى شەڭبەرىندە 140-تان استام جوبا جۇزەگە اسىپ ۇلگەردى.

ASER ساراپشىلارى ءتۇرلى جوبالاردى قارجىلاندىراتىن نەگىزگى بانكتىك ۇيىم رەتىندە ەۋروپالىق قايتا قۇرۋ جانە دامۋ بانكىن ايتادى.

«بانك ءتۇرلى سالاداعى (ەنەرگەتيكا, ينفرا­­قۇرىلىم, حيميا ونەركاسىبى, تۋ­ريزم, اگرو­ونەركاسىپ كەشەنى, «جاسىل» تەحنولو­گيالار) شاعىن جانە ورتا بيزنەستى قول­داي­دى جانە قارجىلاندىرادى. ەلدەگى جۇمىس ىستە­گەن ۋاقىتىندا بانك جالپى سوماسى ­­10 ملرد دول­لاردان اساتىن 300-دەن اسا جو­بانى قارجىلاندىردى. قازىر دە بۇل قار­جى ۇيىمىمەن ىنتىماقتاستىق ءساتتى جالعاسىپ جاتىر», دەلىنەدى زەرتتەۋدە.

ەلدە سونداي-اق ستارتاپتار ءۇشىن رەسۋرس پەن قولداۋ ۇسىناتىن بيزنەس ينكۋباتورلار مەن اكسەلەراتورلار بار. سونىڭ ىشىندەگى ەڭ تانىمالدارى:

• Astana Hub. حاب Techpreneurs, Scalerator, Startup Academy, Seed Money دەپ اتالاتىن ءتۇرلى ينۆەستيتسيالىق باعدارلامالار كومەگىمەن ستارتاپتار مەن يننوۆاتسيالىق جوبالارعا قارجىلىق قولداۋ كورسەتەدى.
• Tech Garden. بۇل – يننوۆاتسيالىق جوبالار مەن تەحنولوگيالىق ستارتاپتاردى قولداۋعا مامانداندىرىلعان بيزنەس ينكۋباتورى مەن اكسەلەراتورى. مۇندا تابيعي جەر قويناۋىن پايدالانۋشىلار ينۆەستور بولادى.
• Nuris Technopark. تەحنوپاركتىڭ ماق­ساتى – تەحنولوگيالىق جوبالار مەن يننوۆا­تسيالىق ستارتاپتاردى قولداۋ جانە دامىتۋ. رەزيدەنتتەرگە 2 باعدارلاما قولجەتىمدى, ولار – 12 اپتاعا سوزىلاتىن «ABC Incubation» جانە 10 اپتاعا ەسەپتەلگەن «QUICK START XIV».

ەلىمىزدە ءوسىم الەۋەتى جوعارى جاس كومپانيالار مەن ستارتاپتاردى قارجىلاندىراتىن بىرنەشە ۆەنچۋرلىق قور جۇمىس ىستەيدى. 

• MyVentures. كومپانيانىڭ باسىمدىق بەرەتىن باعىتتارى – fintech, e-commerce, جاساندى ينتەللەكت, مەديتسينا, كورپوراتيۆتىك باعدارلامالىق قامتاماسىز ەتۋ.
• Activat VC. قور ءالى دامۋ ساتىسىندا تۇرعان پەرسپەكتيۆالى IT-ستارتاپتاردى ىزدەيدى.
• Sturgeon Capital. جوعارى تەحنولوگيالىق ستارتاپتاردى ىزدەۋمەن جانە دامىتۋمەن اينالىساتىن بريتانيالىق ينۆەستيتسيالىق كومپانيا.
• Falconry. IT سالاسىنداعى جوبالاردى قولداۋعا ماماندانعان قور. كاسىبىن ەندى باستاعان جاس كاسىپكەرلەرگە ەكسپەرتتىك قولداۋ كورسەتۋمەن اينالىسادى.

كەدەرگىلەر مەن تاۋەكەلدەر

• سالالار مەن وڭىرلەردى دامىتۋدىڭ جالپى ستراتەگياسىنىڭ بولماۋى;
• وڭىرگە ينۆەستيتسيا تارتۋ جونىندەگى جۇمىستىڭ قارالىپ وتىرعان ءوڭىردىڭ ناقتى قاجەتتىلىكتەرىمەن ۇيلەسپەۋى;
• جەر ۋچاسكەلەرىن ءبولۋ ۇدەرىسىندە ينفرا­قۇرىلىم مەن اشىقتىقتىڭ جوقتىعى;
• تەحنيكالىق جاعداي جانە قاجەتتى ينجە­نەرلىك-كوممۋنيكاتسيالىق ينفرا­قۇرى­لىممەن قامتاماسىز ەتۋدىڭ السىزدىگى;
• گازداندىرۋدىڭ جۇيەسىنىڭ باياۋلىعى, ەلەكتر ەنەرگياسىنىڭ تاپشىلىعى جانە قويما ءۇي-جايلارىنىڭ بولماۋى.

ەلىمىز 2029 جىلعا تامان ەكونوميكا اينالىمىن 450 ملرد دوللارعا جەتكىزەمىز جانە سوعان دەيىن 150 ملرد دوللار تىكەلەي شەتەلدىك ينۆەستيتسيا تارتامىز دەپ جوسپارلاپ وتىر.