فوتولار: ultsport.kz ينستاگرام
جارىسقا قازاقستان, وزبەكستان, قىرعىزستان, ۆەنگريا, تاجىكستان, تۇركىمەنستان, موڭعوليا, قىتاي, اۋعانستان, رەسەي سپورتشىلارى قاتىستى.
«بۇل – ءۇش ستيلدە ءوتىپ جاتقان ءبىرىنشى ازيا چەمپيوناتى. بۇنى 5-ءشى دۇنيەجۇزىلىك كوشپەندىلەر ويىندارىنا دايىندىق دەسەك تە بولادى», دەدى تەڭگە ءىلۋ حالىقارالىق فەدەراتسياسىنىڭ پرەزيدەنتى امانگەلدى ابدىقادىروۆ.
«شەتەلدىكتەر ايتارلىقتاي شەبەرلىك كورسەتىپ جاتىر دەپ ايتا المايمىز, دەگەنمەن, قىرعىزستان مەن موڭعوليا سپورتشىلارى جاقسى ويىن كورسەتىپ, باستى باسەكەلەس بولىپ جاتىر», دەدى ات سپورتى تۇرلەرىنەن مەملەكەتتىك جاتتىقتىرۋشى نۇركەن بايبوريەۆ.
تەڭگە ءىلۋ سپورتىنان وتكەن العاشقى ازيا چەمپيوناتىندا «بەس بەلەس» ءستيلى بويىنشا 1-ورىندى عالىمجان ءىزجانوۆ (قازاقستان) الدى. 2-ورىندى ايبولات ۇناتحان (مونعوليا), ال 3-ورىندى اسحات تالايبەكوۆ (قىرعىزستان) يەلەندى.
«قوس قۇلاش» ستيلىندە 1-ورىندى قازاقستان سپورتشىسى راحات قامباروۆ (قازاقستان) قانجىعاعا بايلادى. 2-ورىندى الىي نازاروۆ (قىرعىزستان) ەنشىلەپ, 3-ورىن ازيزبەك زاكيرجانوۆقا (وزبەكستان) بۇيىردى.
«جەتى قۇت» ستيلىندە دە جەرلەستەرىمىز ۇزدىك بولىپ, 1-ورىندى باقىت ءتولتاي جەڭىپ الدى. 2-ورىن مونعوليالىق سپورتشى سەرىك جەڭىسبەكتىڭ ەنشىسىنە تيسە, 3-ورىندى وزبەكستاننان كەلگەن قوديرجون ەگەمبەرديەۆ يەلەندى.
وسىلايشا, تەڭگە ىلۋدەن سارى قۇرلىق چەمپيوناتىندا قازاقستان كومانداسى ۇزدىك قۇراما اتاندى. وتانداسىمىز راحات قامباروۆ سايىستىڭ ۇزدىك تەڭگە ءىلۋشىسى اتاعىن يەلەندى.
جارىستى تۋريزم جانە سپورت مينيسترلىگى, ۇلتتىق سپورت قاۋىمداستىعى, الماتى وبلىسى اكىمدىگىنىڭ جانە ۇلتتىق جانە ات سپورتى ورتالىعىنىڭ قولداۋىمەن رەسپۋبليكالىق تەڭگە ءىلۋ فەدەراتسياسى ۇيىمداستىردى. ءىس-شارانىڭ باس سەرىكتەسى – «سامۇرىق قازىنا» اق, سەرىكتەسى – Sport Qory جانە Alem Agro كومپانياسى.
ەسكە سالايىق, رەسپۋبليكالىق تەڭگە ءىلۋ فەدەراتسياسى ۇلتتىق سپورت قاۋىمداستىعىنىڭ قۇرامىنا كىرەدى, اتالعان قاۋىمداستىقتى بەلگىلى كاسىپكەر, مەتسەنات, «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.
