فوتو: اقوردا
– Pfizer, Roche, GE Healthcare جانە Philips سەكىلدى الەمگە ايگىلى كومپانيالار ەلىمىزدە ءدارى-دارمەك پەن مەديتسينالىق قۇرال-جابدىقتاردىڭ جەرگىلىكتى ءوندىرىسىن اشپاق. وڭتۇستىك كورەيانىڭ GL Rapha كومپانياسى الماتىداعى بيوفارماتسەۆتيكا زاۋىتىنىڭ قۇرىلىسىنا كوپ ۇزاماي كىرىسەدى دەپ ۇمىتتەنەمىن. بۇل نارىق ستاندارتتارىن ەداۋىر جوعارىلاتادى. سونداي-اق ەلىمىزدە وڭتۇستىك كورەيانىڭ دياگنوستيكا ورتالىقتارى مەن كوپبەيىندى زەرتحانالارىن اشۋدىڭ كەلەشەگى زور, – دەدى مەملەكەت باسشىسى.
ەل پرەزيدەنتى قازاقستاننىڭ كورەيالىق سەرىكتەستەرىمەن جاساندى ينتەللەكت تەحنولوگياسىن دامىتۋ, داتا-ورتالىقتار سالۋ جانە كيبەرقاۋىپسىزدىكتى قامتاماسىز ەتۋ باعىتتارى بويىنشا بىرلەسە جۇمىس ىستەۋگە دايىن ەكەنىن اتاپ ءوتتى.
– استانا حالىقارالىق قارجى ورتالىعى ءبىزدىڭ باسەكەگە قابىلەتتى ينۆەستيتسيالىق ورتامىزدىڭ بەرىك نەگىزى سانالادى. ءبىزدىڭ ايماقتاعى بۇل بىرەگەي الاڭدا الەمدەگى جەتەكشى قارجى ورتالىقتارىنىڭ ارتىقشىلىقتارى بارىنشا ەسكەرىلگەن. بۇگىندە احقو-دا الەمنىڭ ونداعان ەلىنەن ەكى مىڭنان استام كومپانيا تابىستى جۇمىس ىستەپ جاتىر. ونىڭ ىشىندە وڭتۇستىك كورەيادان 20-عا جۋىق كومپانيا بار. ءبىز قارجى تەحنولوگياسى, IT, اكتيۆتەردى باسقارۋ جانە ليزينگ سالالارىندا مۇنداي كومپانيالاردىڭ سانى كوبىرەك بولعانىن قالايمىز. بۇل رەتتە وڭتۇستىك كورەيانىڭ BNK Finance Kazakhstan ميكروقارجى ۇيىمى تولىققاندى ەكىنشى دەڭگەيلى بانككە اينالۋىن قۇپتايمىز, – دەدى قاسىم-جومارت توقاەۆ.
مەملەكەت باسشىسى ءوز ءسوزىن قورىتىندىلاي كەلە, بۇگىنگى فورۋم ەكى ەلدىڭ كۇش-جىگەرىن بىرىكتىرۋگە جانە تابىستى كووپەراتسياسىنا تىڭ سەرپىن بەرەتىنىنە سەنىم ءبىلدىردى.
– بۇگىن مەن K-Silk Road تۇجىرىمداماسىن تولىق قولدايتىنىمىزدى ايتتىم. شىن مانىندە, بۇل – وتە ماڭىزدى تۇجىرىمداما. قازاقستان اتالعان باعدارلامانى ىسكە اسىرۋ ءۇشىن قولدان كەلگەننىڭ ءبارىن جاسايدى. پرەزيدەنتتىڭ ايتۋىنشا, كەلەسى جىلى وسى تۇجىرىمدامانىڭ اياسىندا كورەيادا سامميت وتكىزۋ جوسپارلانىپ وتىر. قازاقستان بۇل جيىنعا جان-جاقتى اتسالىسادى دەپ ويلايمىن. قازاقستان ۇكىمەتى ەلىمىزدە جۇمىس ىستەۋگە نيەتتى وڭتۇستىككورەيالىق كومپانيالار مەن ينۆەستورلارعا قاجەتتى قولداۋ كورسەتەدى, – دەدى پرەزيدەنت.
فورۋمدا كورەيا رەسپۋبليكاسىنىڭ پرەزيدەنتى يۋن سوك يول, كورەيانىڭ حالىقارالىق ساۋدا قاۋىمداستىعىنىڭ توراعاسى (ىسكەرلىك كەڭەستىڭ تەڭ توراعاسى) دجين سيك يۋن, «سامۇرىق-قازىنا» اق باسقارما توراعاسى نۇرلان جاقىپوۆ, Hyundai Motor Russia & CIS وڭىرلىك شتاب-پاتەرى باسشىسىنىڭ ورىنباسارى يم دجە ۋ, Astana Motors كومپانياسىنىڭ باس ديرەكتورى بەكنۇر نەسىپباەۆ, Doosan Enerbility كومپانياسىنىڭ ۆيتسە-پرەزيدەنتى يانگ يۋن حو, «قازاقستان تەمىر جولى» ۇك» اق باسقارما توراعاسىنىڭ ستراتەگيا جانە تسيفرلاندىرۋ جونىندەگى ورىنباسارى ءانۋار احمەتجانوۆ, SK Ecoplant كومپانياسىنىڭ الماتى قالاسىنداعى فيليالىنىڭ ديرەكتورى لي دجۋن حەك, قىزىلوردا وبلىسى اكىمىنىڭ ورىنباسارى ارداق زەبەشەۆ جانە تاعى باسقالار ءسوز سويلەدى.
قىرمىزى جۇماعاليقىزى,
ەۇۋ ستۋدەنتى
