وسى قۇرمەتتى اتاق ءۇشىن ءتورت «ميراس» مەكتەبى مەن بەس بالاباقشانىڭ پەداگوگتەرى باق سىنادى. NNEF قورى ءۇشىن Teacher of the Year كونكۋرسى – مەكتەپتەر مەن بالاباقشالاردا كادرلىق رەزەرۆتى قالىپتاستىرۋ تەتىكتەرىنىڭ ءبىرى.
«بۇل كونكۋرس پەداگوگتىڭ وزىندىك ءىس-تاجىريبەسىن پەداگوگيكالىق قوعامداستىققا جاريا ەتۋگە مۇمكىندىك بەرەدى. ەڭ باستىسى, ءبىزدىڭ ارقايسىمىز جۇمىستا قوسىمشا تاجىريبە جيناقتادىق جانە ءوز ءىس-تاجىريبەمىزدى تۇجىرىمدادىق. قازىرگى ۋاقىتتا ءبىز, مۇعالىمدەر, «NNEF» قق باسشىلىعى تاراپىنان ەرەكشە قولداۋدى سەزىنەمىز. ( ... ) مۇعالىمدەر بويىندا وسكەلەڭ ۇرپاقتى وقىتۋ مەن تاربيەلەۋ مىندەتى ءۇشىن جان-تانىمەن بەرىلە جۇمىس ىستەۋگە دەگەن تابيعي تىلەك-نيەتى تۋىندايدى», دەدى Teacher of the Year 2021-2022 كونكۋرسىنىڭ جەڭىمپازى الميرا ايۋپوۆا.
ۇيىمداستىرۋشىلاردىڭ ايتۋىنشا, كونكۋرس وعان قاتىسۋشىلارعا ءوزىنىڭ كاسىبي شەبەرلىگى پەن شىعارماشىلىق تاسىلدەرىن كورسەتۋگە كومەكتەسەدى, سونىمەن قاتار ودان ءارى مانساپتىق ءوسۋ مەن دامۋعا دا ىقپال ەتەدى.
«وسى كونكۋرستىڭ ءادىل قازىلار القاسىنىڭ مۇشەلەرى رەتىندە قاتىسۋشىلاردىڭ جۇمىسىن باعالاۋدا ءبىز پەداگوگتەردىڭ كاسىبي قۇزىرەتتەرى مەن داعدىلارىن عانا ەمەس, ولاردىڭ يننوۆاتسياعا, شىعارماشىلىققا قابىلەتتىلىگىن, سونداي-اق ولاردىڭ بالالارعا ءبىلىم بەرۋ مەن تاربيەلەۋدى دامىتۋعا قوسقان ۇلەسىن دە ەسكەردىك. ۇسىنىلعان ادىستەر مەن تاسىلدەردىڭ وزىندىك ەرەكشەلىگى مەن تيىمدىلىگى دە ماڭىزدى كريتەريلەر بولدى. كونكۋرس ناتيجەلەرى وتە اسەرلى بولدى. ءبىز كوپتەگەن تاماشا جۇمىستاردى كوردىك», دەدى «ميراس» بوبەكجاي-باقشاسىنىڭ ادىسكەرى مارينا ۇمبەتاليەۆا.
كونكۋرستىق باعدارلامانىڭ ءۇش جىلىندا وعان ءتورت جۇزدەن استام پەداگوگ قاتىستى. وتكەن جىلدارداعى كونكۋرس جەڭىمپازدارى مەن فيناليستەرى قازىر ءوز مەكتەپتەرى مەن بالاباقشالارىندا جوعارى اكىمشىلىك قىزمەتتەر اتقارۋدا. ولاردىڭ قاتارىندا الماتى قالاسىنداعى «ميراس» مەكتەبىندە ديرەكتوردىڭ تاربيە ءىسى جونىندەگى ورىنباسارى گاۋحار يلاشەۆا, «ارىستان» مامانداندىرىلعان ليتسەيىنىڭ ادىسكەرى ءلاززات دەنەباەۆا, الماتى قالاسىنداعى «ميراس» بوبەكجاي-باقشاسىنىڭ ادىسكەرى التىناي پىرىمبەتوۆا, اتىراۋ قالاسىنداعى «ميراس» بوبەكجاي-باقشاسىنىڭ ادىسكەرى تويعان جاربوسىنوۆا جانە تاعى باسقالار بار.
«كونكۋرستاعى جەڭىسىم مەنىڭ باسقا كاسىبي ءىس-شارالار مەن بايقاۋلارعا قاتىسۋعا دەگەن ىنتامدى ارتتىرعانىن ەرەكشە اتاپ وتكىم كەلەدى. بۇل تاجىريبە مەنى جانە وقۋشىلارىمدى جاڭا جەتىستىكتەرگە شابىتتاندىردى. ەڭ ماڭىزدى ناتيجەلەردىڭ ءبىرى – مەنىڭ وقۋشىمنىڭ سۋ تۋرالى رەسپۋبليكالىق جوبالار بايقاۋىنداعى جەڭىسى بولدى. وسى جوبامەن جۇمىس ىستەي وتىرىپ, ءبىز ەكولوگيا جانە تۇراقتى دامۋ سالاسىنداعى ءبىلىمىمىزدى تەرەڭدەتىپ قانا قويماي, ءوڭىرىمىزدىڭ سۋ رەسۋرستارىن جاقسارتۋ بويىنشا ناقتى ۇسىنىستار ازىرلەي الدىق», دەدى الماتىداعى «ميراس» مەكتەبىنىڭ گەوگرافيا جانە بيولوگيا ءپانىنىڭ مۇعالىمى گاۋحار شايمەردەنوۆا.
ول بۇل جوبانى شاكىرتتەرىمەن بىرگە ستوكگولمدەگى حالىقارالىق كونكۋرستا ۇسىندى. كونكۋرسقا بارۋ مەن كاسىبي قارىم-قاتىناس جاساۋ ءتۇرلى ەلدەردەگى ارىپتەستەرمەن بايلانىس ورناتۋعا جانە ودان ءارى دامۋعا جول اشتى.
«بۇل تاجىريبە مەن ءۇشىن دە, وقۋشىلارىم ءۇشىن دە باعا جەتپەس دۇنيە بولدى. ءبىز جاڭا ءبىلىم مەن داعدىلاردى يگەرۋمەن قوسا, وزگە ەلدەردەگى ارىپتەستەرمەن جانە ماماندارمەن بايلانىس ورناتتىق, بۇل بىزگە تاجىريبە الماسۋعا جانە ۇزدىك تاجىريبەلەردى قابىلداۋعا مۇمكىندىك بەردى», دەپ اتاپ ءوتتى گاۋحار شايمەردەنوۆا.
جىلدار بويى Teacher of the year كونكۋرسى فيناليستەر ءۇشىن بەدەل مەن كاسىبي شەبەرلىك ساپاسىنىڭ بەلگىسىنە اينالدى. جىل سايىن جەڭىمپازدارعا 500 مىڭ تەڭگە بەرىلەدى, بىراق ولار ءۇشىن باستى ماراپات, ارينە, اقشالاي كوتەرمەلەۋ ەمەس, جاڭا بيىكتەرگە باستايتىن پەداگوگيكالىق سالاداعى بولاشاق دامۋ ەكەنى ءسوزسىز.
