ياعني بۇل اپتا ولار ءۇشىن تانىمال ساحنا ساڭلاقتارىنىڭ شەبەرلىك ساباقتارىنا, لەكتسيالارعا, سەمينارلارعا, شىعارماشىلىق زەرتحانالار مەن ءتۇرلى تانىستىرىلىمعا تولى بولدى. سونداي-اق تەاتر ارتىستەرىنىڭ كاتالوگتەرى مەن جاس دراماتۋرگتەردىڭ پەسالارىنىڭ جيناقتارى دا ۇسىنىلدى.
فورۋمدى ۇيىمداستىرعان حالىقارالىق تەاتر وداقتارى كونفەدەراتسياسىنىڭ وكىلدەرىمەن جانە قاتىسۋشى ەلدەردىڭ تەاتر قايراتكەرلەرى كاسىپوداقتارىنىڭ توراعالارىمەن كەزدەسكەن مادەنيەت جانە اقپارات ءمينيسترى ايدا بالاەۆا مۇنداي ءىس-شارالاردىڭ ەلدەر مەن شىعارماشىلىق ۇجىمدار اراسىندا سەرىكتەستىك ورناتۋعا, ماماندىق بويىنشا تاجىريبە جانە ءبىلىم الماسىپ, ونەرلەرىن ورتاعا سالۋعا كوپ سەپتىگى تيەتىنىن اتاپ ءوتتى. كەزدەسۋ بارىسىندا مينيستر جاستار فورۋمىنىڭ بارلىق قاتىسۋشىسىنا مادەنيەت سالاسىن دامىتۋعا جانە نىعايتۋعا قوسقان ۇلەسى ءۇشىن العىسىن ءبىلدىردى.
وسىدان ون شاقتى جىل بۇرىن قولعا الىنعان يگى جوبا جىل سايىن تمد-نىڭ ءار ەلىندە كەزەكپەن اتالىپ ءوتىپ كەلەدى. جوبا جاس تەاتر قايراتكەرلەرىنىڭ شىعارماشىلىق بايلانىسىن ەتەنە جاقىنداستىرۋعا, رەجۋسسۋرا, دراماتۋرگيا, ستسەنوگرافيا جانە تەاترتانۋ سالاسىنداعى تالانتتار مەن كەلەشەگى زور كاسىپقويلاردى تاۋىپ, ولاردى ورتاق مۇددەگە ۇيىتۋعا, سونداي-اق تەاتر شىعارماشىلىعىنىڭ دامۋ ءۇردىسىن تالقىلاۋعا ۇندەيدى.
جاستاردىڭ بۇل ايتۋلى باسقوسۋى – ءداستۇرلى تۇردە تەاتر ءومىرىنىڭ وزەكتى ماسەلەلەرى, سونىڭ ىشىندە تەاتر ءداستۇرى مەن ورتاق مادەني كەڭىستىكتى ساقتاۋ, مادەني بايلانىستاردى دامىتۋ ماسەلەلەرى توڭىرەگىندەگى پىكىر الماسۋ الاڭى بولىپ قالا بەرەدى. وسى رەتتە ءبىزدىڭ ەلدەگى تىنىسى اشىلعان جاڭا كەزەڭى دە نازاردان تىس قالماي, ايرىقشا اتالدى.
جالپى, الماتىعا ءوزىمىزدىڭ تەاتر مايتالماندارىن قوسقاندا ازەربايجان, ارمەنيا, بەلارۋس, قىرعىزستان, مولدوۆا, رەسەي, تاجىكستان, وزبەكستان ەلدەرىنەن ەكى جۇزدەن استام رەجيسسەر, دراماتۋرگ, اكتەر, ساحنا شەبەرى, تەاتر سىنشىسى كەلدى. ال قازىلار القاسى فەستيۆالعا ۇسىنىلعان توعىز سپەكتاكلدىڭ ىشىنەن ەڭ ۇزدىگىن انىقتادى. بۇل ورىن ەۆگەني كورنياگتىڭ «پاچۋپكا» تۋىندىسىن قويعان بەلارۋس رەسپۋبليكالىق دراما تەاترىنا بۇيىردى. جەڭىمپاز ۇجىمعا اقشالاي سىيلىقپەن جانە التىن قولشاتىر تۇرىندەگى ەستەلىك سىيلىقپەن بىرگە تمد ەلدەرى جاستار تەاتر فورۋمىنىڭ بىرىكتىرۋشى ءرامىزى رەتىندە 2025 جىلى الەمدىك ساحنالاردىڭ ۇزدىك قويىلىمدارىن ءبىر ارناعا توعىستىراتىن جانە كەزەكتى مارتە ماسكەۋدە شىمىلدىعى تۇرىلەتىن ا.پ.چەحوۆ اتىنداعى XVII حالىقارالىق تەاتر فەستيۆالىنە شاقىرۋ قاعازى تاپسىرىلدى.
