سۋرەتتى تۇسىرگەن – ياسيپا راباەۆا
بيىلعى سۋ تاسقىنى كەزىندە ورال قالاسى قاپشىق-قاپشىق قۇم, ۇيىلگەن توپىراققا تولىپ كەتتى. جاعالاۋدى بەكىتۋ ءۇشىن مىڭداعان ادام, جۇزدەگەن تەحنيكا دامىلسىز جۇمىس ىستەپ, قالانى قورعاپ قالدى. ول كەزدە قالانىڭ كوشە-جول جەلىسىن, اۋلا-اۋماقتارىن تازارتۋ, اباتتاندىرۋ جانە كوگالداندىرۋ ءىسى كەيىنگە شەگەرىلدى.
الايدا تاسقىننىڭ بەتى قايتىپ, ءومىر اعىسى قالىپتى جاعدايعا تۇسكەن سوڭ, ياعني بيىلعى 22 ساۋىردەن باستاپ وبلىس بويىنشا سانيتارلىق تازالىق ايلىعى جاريالانىپ, اپتا سايىن سەنبىلىك وتكىزىلىپ كەلەدى.
جوسپارعا سايكەس «تازا قازاقستان» رەسپۋبليكالىق ەكولوگيالىق اكتسياسى جىل سوڭىنا دەيىن جالعاسادى.
بۇگىنگە دەيىن اكتسياعا وڭىردە 90 مىڭنان اسا تۇرعىن جانە 3 مىڭنان اسا مەكەمە-كاسىپورىن قاتىسقان.
«وبلىستىڭ ءتۇرلى ەلدى مەكەنىندە 44 مىڭنان اسا اعاش-كوشەت وتىرعىزىلىپ, مەملەكەتتىك ورمان قورىنىڭ 1,5 مىڭ گەكتارىنا 3,3 ملن دانا جاسىل جەلەك ەگىلدى. نەگىزى بيىلعى جوسپار 14,7 ملن دانا بولسا, قالعان 11,4 ملن دانا جەلەك كۇز مەزگىلىندە ەگىلەدى», دەيدى باتىس قازاقستان وبلىسى ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ميراس مۇلكاي.
سانيتارلىق تازالىق ايلىعى اياسىندا بارلىعى 60 مىڭ اۋلا, 2,5 مىڭنان اسا كوپپاتەرلى تۇرعىن ءۇي مەن 60 مىڭ جەكە تۇرعىن ءۇي, 231 ساياباق پەن تىنىمباق تازالانىپ, جيناقتالعان. سونداي-اق 2 717 شارشى مەتر تروتۋار جوندەلىپ, اۋىستىرىلىپتى. 165 سۋ نىسانى تازارتىلعان. ونىڭ ىشىندە وزەن-كولدەر مەن جاساندى سۋ ايدىندارىنىڭ اۋماعى – 9 807 شارشى مەتر بولسا, 55 سۋبۇرقاق پەن ۇزىندىعى 134 017 مەتر بولاتىن ارىقتار تازالانىپ, رەتكە كەلتىرىلگەن.
سەنبىلىك كەزىندە 1 مىڭنان اسا الەۋمەتتىك نىسان, 3 مىڭ ونەركاسىپ وبەكتىسى, 525 تاريحي-مادەني ەسكەرتكىش قامتىلعان. تازالىق جۇمىسىنا 900-دەن اسا تەحنيكا جۇمىلدىرىلىپ, 16 مىڭ توننا تۇرمىستىق قالدىق ارنايى پوليگوندارعا شىعارىلعان.
ەلدى مەكەندەردى سانيتارلىق تازارتۋ ماقساتىندا 31 مامىردا وبلىستىق جالپى سەنبىلىك ۇيىمداستىرىلعان ەدى. ال 5 ماۋسىم – دۇنيەجۇزىلىك قورشاعان ورتانى قورعاۋ كۇنىنە وراي ەكولوگيالىق سەنبىلىك ءوتتى.
«سۋ تاسقىنىنان كەيىن وزەن ارنالارى مەن اۋماقتاردى قوقىستان تازالاۋ ماقساتىندا شىلدە ايىندا «تازا جاعالاۋ», قىركۇيەك ايىندا «تازا ورمان» اكتسيالارىن وتكىزۋدى جوسپارلاپ وتىرمىز» دەيدى «تازا قازاقستان» رەسپۋبليكالىق اكتسياسىنىڭ وڭىردەگى كۋراتورلارىنىڭ ءبىرى, وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى مارات مولداشەۆ.
«مەملەكەت باسشىسىنىڭ باستاۋىمەن قولعا الىنعان «تازا قازاقستان» ەكولوگيالىق اكتسياسىن باتىسقازاقستاندىقتار ءبىراۋىزدان قولداپ, بەلسەندى قاتىسادى. سەبەبى ءبىزدىڭ تۋعان قالامىز ەجەلدەن «جاسىل قالا» دەگەن اتاققا يە. وسى اتاققا لايىق بولىپ, ءار اۋىلدا تازالىق جۇمىسىن جۇرگىزۋىمىز كەرەك. ءبىزدىڭ ماقساتىمىز ءۇيىمىزدى, اۋلامىزدى, تۇرعان جەرىمىزدى تازا ۇستاۋ», دەدى جالپىحالىقتىق سەنبىلىككە قاتىسقان وبلىس اكىمى ناريمان تورەعاليەۆ.
باتىس قازاقستان وبلىسى
