سۋرەتتەردە: باتىس قازاقستان وبلىسىندا ۇبت-دان ەڭ جوعارى بالل جيناعان قۇرالاي ەسەنعوجينا مەن ءالي احمەت. سۋرەت بقو ءبىلىم باسقارماسىنىڭ ءباسپاسوز قىزمەتىنەن الىندى.
«بيىل مەكتەپ ءبىتىرۋشى تۇلەكتەردىڭ 233-ءى «التىن بەلگىگە», ال 328 وقۋشى «ۇزدىك اتتەستات» الۋعا ۇمىتكەر», دەيدى وبلىستىق ءبىلىم باسقارماسىنىڭ باسشىسى ايگۇل مىڭباەۆا.
وڭىردە بولعان الاپات سۋ تاسقىنىنا بايلانىستى وقۋشىلاردىڭ ۇلتتىق بىرىڭعاي تەستىلەۋدەن ءوتۋ كۇندەرى ءبىر اپتاعا شەگەرىلگەن ەدى.
«ۇبت تاپسىرۋعا نيەت بىلدىرگەن مەكتەپ بىتىرۋشىلەر ۇلتتىق تەستىلەۋ ورتالىعىنىڭ سايتىنا ەلەكتروندى تۇردە ونلاين تىركەلەدى جانە تەستىلەۋدەن ءوتۋ ورنىن, كۇنىن, ۋاقىتىن وزدەرى تاڭدايدى. ءبىزدىڭ وبلىستا ۇلتتىق بىرىڭعاي تەستىلەۋ «UStudy» ورتالىعىنىڭ 2 پۋنكتىندە – ورال جانە اقساي قالالارىندا 27 مامىر – 12 شىلدە ارالىعىندا ءوتىپ جاتىر», دەيدى ورال قالاسىنىڭ ۇلتتىق تەستىلەۋ ورتالىعى فيليالىنىڭ جەتەكشىسى الىبەك سۇپىعالي ۇلى.
وبلىستىق ءبىلىم باسقارماسى ۇسىنعان اقپاراتقا قاراعاندا, قازىرگى تاڭدا 2300-دەن استام تۇلەك تەستىلەۋدەن وتكەن. 14 وقۋشى 130 بالل جانە ودان جوعارى بالل جيناعان. وبلىستا ازىرشە ەڭ جوعارى بالل – 136. وسى بالدى جيناعان «Abyroi school» جەكە مەكتەبىن ءبىتىرۋشى قۇرالاي ەسەنعوجينا. شاكىرتىنىڭ جەتىستىگىنە ۇستازدارى ەسبولات ناسيەۆ, ايگۇل قۇرمانعاليەۆا, نۇربولات ەرعاليەۆ, اسەل ءابسالاموۆا دا ەرەكشە قۋانىپ جاتىر. گەوگرافيا-ماتەماتيكا باعىتىن تاڭداعان قۇرالاي بۇعان دەيىن گەوگرافيا پانىنەن وتكەن قالالىق وليمپيادادا 1-ورىنعا, وبلىستىق وليمپيادادا 2-ورىنعا يە بولعان ەكەن. ياعني وڭىردەگى ەڭ جوعارى ۇپايدى قانجىعاسىنا بايلاۋى كەزدەيسوق ەمەس.
ءسوز رەتى كەلگەندە ايتا كەتەيىك, ءدال وسى «Abyroi school» مەكتەبىنىڭ تۇلەكتەرى ءالي احمەت – 135, اماندىق بايان – 132, ايىم پاڭگەرەي مەن ايدا قاجىمۇراتوۆا – 131, ديجان ماشيروۆ 130 ۇپاي جيناپ, ۇزدىك ناتيجە كورسەتكەن. «بۇل – ءبىزدىڭ شاكىرتتەرىمىز بەن ۇستازدارىمىزدىڭ تىنىمسىز ەڭبەگى مەن كۇش-جىگەرىنىڭ ناتيجەسى», دەيدى مەكتەپ ديرەكتورىنىڭ وقۋ ءىسى جونىندەگى ورىنباسارى جادىرا بولاتقىزى.
ەلىمىزدىڭ عىلىم جانە جوعارى ءبىلىم مينيسترلىگى سۋ تاسقىنىنان زارداپ شەككەن ايماقتاردىڭ 11-سىنىپ وقۋشىلارى ۇبت كەزىندە تومەن بالل الىپ قالعان جاعدايدا, اقىلى ۇبت كەزىندە العان جوعارى ۇپايى ءبىلىم گرانتىن تاعايىنداۋ كەزىندە ەسەپكە الىناتىنى جونىندە حابارلاعان بولاتىن. بۇل جەڭىلدىك باتىس قازاقستان وبلىسىنا دا قاتىستى. جىل سايىن جۇزدەگەن جاس ءۇشىن وبلىس اكىمىنىڭ گرانتى بولىنەدى. ونىڭ باسىم كوپشىلىگى – وڭىرگە وتە قاجەتتى جالپى مەديتسينا, پەداگوگيكالىق ماماندىقتار. قازىرگى تاڭدا وبلىستىڭ ەڭبەك نارىعىندا تاپشى بولىپ تۇرعان ماماندىقتار جونىندە اقپارات جيناقتالىپ, وڭدەلىپ جاتىر. سودان كەيىن جەرگىلىكتى گرانتتار تۋرالى اقپارات وبلىس اكىمدىگىنىڭ جانە ءبىلىم باسقارماسىنىڭ رەسمي سايتىندا جاريالانادى.
ايتا كەتەيىك, باتىسقازاقستاندىق مەكتەپ تۇلەكتەرىنە ورتا ءبىلىم تۋرالى اتتەستات تابىستاۋ ءراسىمى «جولىڭ بولسىن, جاس تۇلەك!» دەگەن اتاۋمەن 14 ماۋسىم كۇنى وتەدى.
باتىس قازاقستان وبلىسى
