«ادامعا وسكەن ورتاسى ىقپال ەتپەي قويمايتىن ءتارىزدى. مىسالى, مەن تۇركىستان وبلىسىنان اسكەرگە شاقىرىلدىم. جالىندى ستۋدەنتتىك جىلداردان كەيىن زىرىلداعان ءومىر كۇرت وزگەرىسكە ۇشىرايتىنداي بولىپ كورىنەتىن دە تۇراتىن. ەڭسەلى ءبىلىم ورداسىن وزىڭمەن بىرگە تامامداعان ۇزەڭگىلەس قاتارلاستارىڭ جالاقىسى جوعارى جۇمىسقا كىرىپ, ازداعان ۋاقىتتان كەيىن باز بىرەۋى قىمبات كولىك تىزگىندەپ, كەيبىرەۋى بولسا ءۇيلى بولىپ شىعا كەلەدى. ال سەنىڭ ءالى دە شاي-پ ۇلىڭنان اسپايتىن جالاقىعا قاراپ كۇنەلتكەنىڭ شىنىمەن جانىڭا باتادى. ماردىمسىز ناپاقانى تالعاجاۋ ەتكەنىڭە بۋراداي بۋىرقانىپ الاسۇرعانىڭمەن, ىشتەي تىناسىڭ. مەن سياقتى قوماقتى اقشا تولەيتىن لايىقتى جۇمىس تاپسام دەگەن اۋدانداعى جولداس جىگىت تە تالاي كەڭسەلەردىڭ تابالدىرىعىن توزدىرىپ, كەنەۋى كەتتى. ەكەۋمىزدى بوكس ۇيىرمەسى تانىستىرعان. تالاي جىل اتاقتى بوكسشى بولامىن دەپ بىلعارى قولعاپ كيگەنىم بار», دەپ باستادى ءسوزىن كەيىپكەرىمىز.
ءومىردىڭ كۇيبەڭ تىرلىگى مەن اۋىرتپالىق ادام بالاسىن ءارتۇرلى جولعا سالادى. وكىنىشكە قاراي, از عانا ۋاقىتتىڭ ىشىندە استىنا سۋ جاڭا كولىك ءمىنىپ, شىقىرلاتىپ اقشا ساناپ جۇرگەن دوسىنىڭ ءىس-ارەكەتى كۇدىك تۋدىرا باستاعان. ارادا ءبىراز جىل وتكەندە جول ۇستىندە كەلە جاتقان ول «انانى ۇستاڭدار» دەپ كوشەنى باسىنا كوتەرگەن داۋىستان جالت قاراعان. كوز جۇگىرتىم جەردە مەديتسينالىق بەتپەردەمەن تۇمشالانعان بىرەۋ تۋرا الدىنان ورعي جۇگىرىپ بارا جاتىر. ارتىنان تۇرا ۇمتىلعاندارعا جەتكىزەر ەمەس. دەنە بولمىسى ءوزىنىڭ بۇرىنعى دوسىنا كەلىڭكىرەيدى ەكەن.
«كۇدىكتىدەن كوزجازىم جەردەن ايىرىلىپ, اشۋعا بۋلىققان قۋعىنشىلاردان جەتكىزبەي كەتكەن جەلاياقتىڭ كىم ەكەنىن سۇرادىم. ءۇي اۋلاسىنا ەسىرتكى جاسىرىپ جۇرگەن ءوزىمنىڭ تانىسىم ەكەنىن بىلگەندە, توبە شاشىم تىك تۇردى. ءبىر مەزەتتە مۇنداي قادامعا بارعان ادامدى سوڭىنا دەيىن ءوزىمنىڭ تانىسىم ەمەس ەكەنىنە سەندىرىپ تە كوردىم», دەيدى ورازبەك ەرمەكباي.
سول كۇنى جول بويى زامانداستارىنىڭ جامان ادەتكە قۇمار بولىپ, جەڭىل جولمەن اقشا تابۋعا ۇمتىلۋى ۇلتقا جاپا شەكتىرىپ جاتقانىن وي ەلەگىنەن وتكىزگەن ول وسى وقيعادان كەيىن قوعام دەرتىنە قارسى كۇرەسۋدى ماقسات ەتكەن ەكەن.
«وكىنىشتىسى سول, قازىر سينتەتيكالىق زاتتاردى تاسۋعا اۋەس جاستار كوپ. «كۋرەر قاجەت» دەپ شاقىرىپ الىپ, قىلمىسقا يتەرمەلەيتىندەردىڭ قۇرىعىنا ىلىنگەن تانىسىمنىڭ تاعدىرلاستارىنا توسقاۋىل بولۋ كەرەك دەپ ويلادىم. قازىر ۇلتتىق ۇلان قاتارىندا, ەسىرتكى تاسىمالداۋشىلاردى قۇرىقتاپ ءجۇرمىن. وسىلايشا, ەسىرتكىنىڭ تارالۋ جولدارىنا بالتا شابۋعا تىرىسىپ كەلەمىن. ۇلتتىق ۇلان ساپىندا قىزمەت ەتۋىمنىڭ دە سەبەبى وسىندا جاتىر. «اسكەري ءبولىم – ومىرلىك ماقساتتارىمنىڭ جۇزەگە اسۋىنا سەرپىن بەرگەن مەكەن» دەپ ءجيى ايتاتىنىم دا سوندىقتان», دەپ اعىنان جارىلدى ول.
الايدا سارباز اتانۋ ءۇشىن العا قويعان ماقسات ازدىق ەتەدى. بۇل ءۇشىن تاۋداي تالاپ, قاجىرلى ەڭبەك پەن جوعارى جاۋاپكەرشىلىك قاجەت. «قىلمىسقا توسقاۋىل بولۋ ءۇشىن جاياۋ جاساق قۇرامىنداعى مەرزىمدى اسكەري قىزمەتشىلەردىڭ جەكپە-جەك ۇرىس تاسىلدەردى جەتىك مەڭگەرۋ دەڭگەيلەرى ارقاشان سىن-سىناقتان ءوتىپ, ۇنەمى باقىلاۋدا بولادى. ويتكەنى جاۋىنگەرلىك قىزمەت كەزىندە بۇزاقى قول كوتەرىپ, سۋىق قارۋ پايدالانعان ساتتە تويتارىس بەرۋى كەرەك. شارشى الاڭدا تەر توگىپ, بايراقتى باسەكەدە توپ جارماسام دا, جۇدىرىقتاسۋ ونەرىنە ابدەن داعدىلانعانىم قىزمەت بارىسىندا كوپ كومەگىن تيگىزەدى. قازىر بۇل جەردە دە فيزيكالىق دايىندىعىمدى كۇن سايىن شىڭدايمىن. ويتكەنى قىلمىسكەردى قۇرىقتاۋدا شيراق قيمىل اسا قاجەت», دەيدى ورازبەك.
سارباز ءۇشىن تۇرعىنداردىڭ تىنىشتىعى, بەيبىت ومىردەن اسقان ماراپات جوق. سوندىقتان ورازبەك ەرمەكباي كۇندەلىكتى اسكەري مىندەتىن ابىرويمەن اتقارۋدى باستى پارىزى دەپ بىلەدى. ماسەلەن, ءساۋىر ايىنان باستاپ اسكەري ءبولىمىنىڭ جاۋىنگەرلەرىمەن, پوليتسيا قىزمەتكەرلەرىمەن, بىرلەسە وتىرىپ, ىشكى ىستەر ورگاندارىنا ءتۇرلى قۇقىق بۇزعانى ءۇشىن جۇزدەن اسا ادامدى جەتكىزگەن. قاتارداعى جاۋىنگەر ورازبەكتىڭ دە بۇل باعىتتا اتقارعان جۇمىسى جەتەرلىك.
