استانادا بيىل جوباعا 4 200 استانالىق جاس قاتىسادى. تاياۋدا عانا «ستۋدەنتتىك قۇرىلىس» جانە «جاسىل ەل» جاستار ەڭبەك جاساقتارىنىڭ حX ەڭبەك ماۋسىمىنىڭ سالتاناتتى اشىلۋى ءوتتى. ءىس-شارانى جەرگىلىكتى جاستار ساياساتى ماسەلەلەرى باسقارماسىنىڭ قولداۋىمەن, رەسپۋبليكالىق ستۋدەنتتىك قۇرىلىس جانە جاستار جاساقتارى قوزعالىسى قوعامدىق قورى ۇيىمداستىردى.
– 20 جىل ىشىندە استانا قالالىق «جاسىل ەل» شتابى ەلەۋلى ۇلەس قوسىپ كەلەدى. ەڭبەك جاساقتارىنا قوسىلعاندارعا ارنايى كيىم, قۇرال-جابدىقتان بولەك, ءبىر ايلىق مولشەردەگى جالاقى قامتاماسىز ەتىلەدى. 14-16 جاس ارالىعىنداعى بالالار جاس ەرەكشەلىكتەرىنە قاراي اپتاسىنا 5 كۇننەن, ال كۇنىنە 4 ساعاتتان كوپ ەمەس جۇمىس ىستەيدى. 14 جاسقا تولعان وقۋشى بالالار ءوز ءبىلىم وردالارى ماڭىندا, ودان بولەك جازعى مەزگىلدە ساياباقتاردا اعاشتارعا كۇتىم جاساپ, ارامشوپتەرىن تازالايدى. جوباعا قاتىسۋعا نيەت بىلدىرگەندەر تولىق اقپاراتتاردى الەۋمەتتىك جەلىدەگى پاراقشالارىمىزدان وقي الادى, – دەيدى «جاسىل ەل» جوباسى جەتەكشىسىنىڭ ورىنباسارى باقىتبەك ءابدىراشيد.
سونداي-اق جوبا اياسىندا كوپبالالى, الەۋمەتتىك از قامتىلعان وتباسىلاردىڭ بالالارىن جازعى ۋاقىتتا جۇمىسقا ورنالاستىرۋ كوزدەلگەن. وسىنداي ىلكىمدى ءىستىڭ يگىلىگىن كورۋگە قاراعاندى جاستارى دا اسىققان. بيىلعى ماۋسىمدا وڭىردە ەڭبەككە ارالاسۋعا نيەت بىلدىرگەندەردىڭ سانى بىلتىرمەن سالىستىرعاندا ەكى ەسە كوبەيىپتى. جاستار قوزعالىسىنداعى وزگەرىستەر تۋرالى قاراعاندى جاستار رەسۋرستىق ورتالىعىنىڭ باسشىسى ياكۋب دجامالوۆ ايتىپ ءوتتى.
– قاتارعا قوسىلۋعا 65 وقۋ ورنى ءوتىنىم بەردى. ايلىعى ەڭ تومەنگى جالاقىعا بايلانىستى بەرىلەدى. سونداي-اق جۇمىس ىستەگەن ساعاتتارىنا قاراي ەسەپتەلەدى. ماسەلەن, 14 جاستان 16 جاسقا دەيىنگى جاۋىنگەرلەرگە ءتورت ساعاتتىق جۇمىسپەن قامتىلعان جاعدايدا ايىنا 85 مىڭ تەڭگە ۇلەستىرىلەدى. ال 16 جاستان 35 جاسقا دەيىنگى ازاماتتارعا ايىنا 127 500 تەڭگە تابۋعا مۇمكىندىك بار, – دەدى ول.
«جاسىل ەل» ەڭبەك ماۋسىمى 31 تامىزعا دەيىن جالعاسادى. ماۋسىمدىق جۇمىسقا قوسىلۋعا نيەت بىلدىرگەندەردىڭ اراسىندا 400 اقتاۋلىق جاس تا بار. ولار ەكى لەككە بولىنەدى. 16 توپتان قۇرالعان جاستار اقتاۋدا ەكى اي بويى قالا تازالىعىنىڭ ساقتالۋىنا ءوز ۇلەسىن قوسادى.
– بۇل جوبا 2005 جىلى باستالعان بولاتىن. «جاسىل ەل» جاستارى كوگالداندىرۋ مەن تازالىق جۇمىستارىنا عانا ەمەس, قالانىڭ كوركەيۋىنە دە ۇلەستەرىن قوسىپ جاتىر. مۇنداعى باستى ماقسات – ەلىمىزدى كوگالداندىرۋ ارقىلى جاستاردىڭ ەڭبەكقورلىققا باۋلۋ, – دەدى اقتاۋ قالالىق ىشكى ساياسات جانە تىلدەردى دامىتۋ ءبولىمىنىڭ باسشىسى گۇلميرا بالعوجاەۆا.
جاس ساربازدار جۇمىستارىنا بىردەن بىلەك سىبانا كىرىسىپ كەتتى. 14 جاسار بەسميل مۇحاماد بىزگە قوعامدىق جوبانىڭ وزىندىك ءمان-ماڭىزىن ايتىپ بەردى.
– «جاسىل ەلگە» جۇمىسقا قابىلداۋ تۋرالى تانىستارىمنان ءبىلدىم. العاش رەت قاتىسىپ وتىرمىن. جاۋاپتىلار بىزگە نە ىستەۋ كەرەگىن ءجىتى ءتۇسىندىردى. جۇمىسقا ساقاداي ساي دايىنمىن. بۇل ءوز بەتىنشە اقشا تابۋعا جانە جاڭا دوستار تابۋعا تاماشا مۇمكىندىك قوي. ونىڭ ۇستىنە جاز مەزگىلىندە بوس ۋاقىتىڭدى ءتيىمدى ۇيىمداستىرۋعا مۇمكىندىك بەرەدى, – دەدى جاس سارباز.
سونداي-اق ماۋسىمدىق جۇمىسپەن قامتۋ جانە سۋ تاسقىنى بولعان ايماقتارعا كومەك كورسەتۋ ماقساتىندا «اۋىل» پارتياسى جانىنداعى «اۋىل جاستارى» جاستار قاناتى قۇرىلىس جاساقتارىن ىسكە قوستى. قازىرگى ۋاقىتتا, سولتۇستىك قازاقستان وبلىسىندا 40-قا جۋىق جاس تابيعي اپاتتان زارداپ شەككەندەرگە تۇرعىن ءۇي سالۋعا قولعابىس ەتىپ جاتىر.
ايتا كەتەيىك, «جاسىل ەل» جاستار ەڭبەك جاساعىنىڭ قىزمەتى جەرگىلىكتى بيۋدجەت ەسەبىنەن جۇزەگە اسىرىلادى.
