سەنات «ماسس-مەديا تۋرالى» زاڭدى ماقۇلدادى

پالاتانىڭ الەۋمەتتىك-مادەني دامۋ جانە عىلىم كوميتەتىنىڭ مۇشەسى ايگۇل قاپباروۆانىڭ ايتۋىنشا, بۇل زاڭ جاڭا تاۋەكەلدەردى ەڭسەرۋ, زامان تالابىنا ساي مەديا كەڭىستىكتى قالىپتاستىرۋ ءۇشىن بىرقاتار جاعداي جاسايدى.

زاڭدا بىرنەشە جاڭاشىلدىق كوزدەلگەن. دالىرەك ايتقاندا, مەملەكەتتىك ەمەس باق-قا وتاندىق كونتەنتتى دامىتۋ, قازاقستاننىڭ اقپاراتتىق ەگەمەندىگىن نىعايتۋ جانە قورعاۋ ءۇشىن گرانتتىق قارجىلاندىرۋ بەرىلەدى. باق-تا جاريالانعان اقپاراتتار بويىنشا جەكە نەمەسە زاڭدى تۇلعالاردىڭ تالاپ قويۋ مەرزىمى ءبىر جىل بولىپ بەلگىلەندى.

«مەملەكەتتىك تىلدەگى تەلە, راديوباعدارلامالاردىڭ اپتا سايىنعى كولەمىن 50%-دان 60% -عا دەيىن كەزەڭ-كەزەڭىمەن ۇلعايتۋ بەلگىلەندى (2025 جىلدان باستاپ 55%, 2027 جىلدان باستاپ 60%). سونداي-اق وتاندىق تەلە, راديو باعدارلامالاردىڭ جانە قازاقستاندىق اۆتورلاردىڭ/ورىنداۋشىلاردىڭ مۋزىكالىق شىعارمالارىنىڭ وتاندىق تەلە, راديوارنالارداعى كولەمىن 50%-دان 60%-عا دەيىن كەزەڭ-كەزەڭىمەن ۇلعايتۋ كوزدەلدى», دەدى قاپباروۆا سەناتتىڭ جالپى وتىرىسىندا.

ال وتاندىق تەلە, راديوارنالارداعى شەتەلدىك باعدارلامالاردىڭ رەترانسلياتسياسى 20%-دان 10%-عا دەيىن ازايتىلادى. بۇعان قوسا, باق سۇراۋلارىن قاراۋ مەرزىمى 7 جۇمىس كۇننەن 5 جۇمىس كۇنىنە دەيىن قىسقارتىلدى.

سونىمەن قاتار سۋيتسيد جاساۋ تاسىلدەرى جانە سۋيتسيد جاساۋعا شاقىرۋ تۋرالى اقپارات تاراتۋعا تىيىم سالىنادى.

باق قىزمەتىنە ءوزىن-ءوزى رەتتەۋگە, مەديا سالانى دامىتۋعا مۇمكىندىك بەرۋ ماقساتىندا ەرىكتى نەگىزدە قوعامدىق-كاسىپتىك كەڭەس قۇرۋعا جانە جۋرناليستەردىڭ ادەپ كودەكسىن ازىرلەۋگە مۇمكىندىك بەرىلەدى. ءجۋرناليستىڭ كاسىبي قىزمەتىنىڭ قۇقىقتىق كەپىلدىكتەرىن قامتاماسىز ەتۋ جونىندە نورمالار ەنگىزىلدى.