فوتو: قر ۇلتتىق سپورت تۇرلەرى قاۋىمداستىعى
توپتاردىڭ قۇرامىنا جەتەكشى عالىمدار, ۆەتەرينارلار, بيولوگتار, گەنەتيكتەر, سونداي-اق سپورتتىق پسيحولوگيا جانە مەديتسينا ماماندارى كىردى. عالىمدار وقۋ-جاتتىعۋ جيىندارى مەن جارىستار وتكىزىلەتىن جەرلەردە سپورتشىلار مەن سپورتتىق جىلقىلاردىڭ فۋنكتسيونالدىق جانە پسيحولوگيالىق جاي-كۇيىنە مونيتورينگ جۇرگىزەدى.
«ۇلتتىق سپورت قاۋىمداستىعىنىڭ باستاماسىمەن جانە تۋريزم جانە سپورت مينيسترلىگىنىڭ قولداۋىمەن العاش رەت كەشەندى عىلىمي توپتار قۇرىلدى. ءبىرىنشى توپ تىكەلەي سپورتشىلارمەن اينالىسادى – ولاردىڭ فۋنكتسيونالدىق جاعدايى, جالپى دەنە شىنىقتىرۋ دايىندىعى تەكسەرىلەدى, پسيحودياگنوستيكا جۇرگىزىلەدى, سودان كەيىن بارىپ جالپى جاي-كۇيىنىڭ قورىتىندىسى جاسالادى. ەگەر دەنساۋلىعىندا قانداي دا ءبىر وزگەرىستەر بولسا, پسيحودياگنوستيكا جانە سپورتتىق مەديتسينا بويىنشا ەم-شارا جاسايمىز. باستى ماقسات – سپورتشىلارىمىز كۇزدە استانادا وتەتىن دۇنيەجۇزىلىك كوشپەندىلەر ويىندارىنا جوعارى دەڭگەيدە دايىندالۋى ءۇشىن ولاردىڭ دەنساۋلىعىن تەكسەرۋ», دەدى قر ۇلتتىق سپورت تۇرلەرى قاۋىمداستىعىنىڭ كەشەندى عىلىمي توبىنىڭ ۇيلەستىرۋشىسى باقىتجان ەسجانوۆ.
عالىمدار جانۋارلاردىڭ جاعدايىن, دايىندىق بارىسىن جاقسارتۋعا مۇمكىندىك بەرەتىن زەرتتەۋلەر جۇرگىزىلەتىنىن اتاپ ءوتتى. سونىمەن قاتار سپورتشىلاردىڭ دەنساۋلىعىن ءجىتى باقىلاپ, ولارعا ارنالعان تاماقتانۋ كەشەنى ۇيىمداستىرىلاتىنىن تىلگە تيەك ەتتى.
«سپورتتىق جىلقىلاردىڭ جاعدايىنا كەلسەك, بەلگىلى وتاندىق عالىمداردىڭ تۇتاس توبى جىلقىلاردىڭ جەم-ءشوبىن جاقسارتۋعا, جانۋارلاردىڭ فۋنكتسيونالدىق جاعدايىن تەكسەرۋگە مۇمكىندىك بەرەتىن زەرتتەۋلەر جۇرگىزە باستادى. بۇل توپ جاقسى ناتيجە كورسەتۋ ءۇشىن جارىسقا قاتىساتىن جىلقىلاردىڭ دايىندىعى مەن توزىمدىلىگىن تەكسەرەدى», دەدى كەشەندى عىلىمي توپتىڭ جەتەكشىسى, ا.ش.ع دوكتورى نابيدۋللا كيكەباەۆ.
قازىرگى تاڭدا كەشەندى عىلىمي توپتار كوكپار, تەڭگە ءىلۋ, اۋدارىسپاق, جامبى اتۋ, ءداستۇرلى ساداق اتۋ سپورتشىلارىنىڭ قۇراما كوماندالارىمەن قىزۋ جۇمىس ىستەپ جاتىر.
ء«بىز سپورتشىلاردىڭ اعزاسىن تەكسەرىپ, جوعارى ناتيجەگە جەتۋ ءۇشىن قانداي دارۋمەندەر قابىلداۋ كەرەك, قالاي تاماقتانعانى دۇرىس ەكەنىن انىقتايمىز. سپورتشىلاردىڭ جۇرەك جانە ىشكى ورگاندارىنىڭ ءبيوريتىمىن تەكسەرىپ, تاماقتارىن دا سوعان ساي ۇيىمداستىرامىز», دەدى كەشەندى عىلىمي توپتىڭ جەتەكشىسى, پ.ع.د., پروفەسسور اناتولي قۇلنازاروۆ.
عىلىمي توپتار سپورتشىلار مەن جىلقىلارعا وليمپيادالىق دايارلاۋ ورتالىعىنىڭ بازاسىندا ءۇش اي بويى تەكسەرۋ جۇرگىزەدى.
قىرمىزى جۇماعاليقىزى,
ەۇۋ ستۋدەنتى
