سۋرەتتى تۇسىرگەن – اياۋجان مۇراتحانقىزى
ونىڭ «Altay Out Wear» دەپ اتالاتىن كۇرتەشەلەرى اينالدىرعان ءبىر جارىم جىل ىشىندە شىعىسقا تانىلىپ ۇلگەردى. اسىرەسە تۋريزممەن اينالىساتىن ازاماتتاردىڭ سۇرانىسىنا يە. سۋسىما ماتەريالى شەلەكتەپ توككەن جاڭبىردىڭ استىندا قالساڭ دا سۋ وتكىزبەيدى. تىم قالىڭ دا ەمەس. سونىڭ وزىندە تاۋ سالقىنىندا توڭدىرمايدى. بىلايشا ايتقاندا, دەنە تەمپەراتۋراسىن ۇستاپ تۇراتىن قاسيەتى بار. ساپاسىنا دا كوپشىلىكتىڭ كوڭىلى تولادى ەكەن.
شىعىس قازاقستاننىڭ تۇمسا تابيعاتىن تۋريستەرگە قىسى-جازى ارالاتىپ جۇرەتىن تۋريستىك وپەراتور ايگەرىم ابەدجانوۆانىڭ ايتۋىنشا, ساياتتىڭ قولىنان شىققان كۇرتەشەلەردىڭ ساپاسى مەن ءسانى ۇيلەسىپ تۇر. ءار ادامنىڭ ولشەمىنە قاراي دەنەسىنە قونا كەتەدى.
– وسكەمەندە تابيعاتقا ارنالعان كيىمدەردىڭ شىعارىلىپ جاتقانى شىن قۋانتتى. ءبىز الا جازداي التايدىڭ قويىن-قونىشىن ارالايمىز. سوندايدا كيۋگە قولايلى كۇرتەشەنى جەرلەسىمىزدەن ساتىپ الىپ ءجۇرمىز. شەتەلدىڭ برەندتەرىنەن اسىپ تۇسپەسە, كەم ەمەس. تەك قولداۋ كەرەك. قولداۋ دەپ وتىرعانىم, ەلىمىزدە جاسالعان ءونىمدى تۇتىنايىق دەگەنىم عوي. ناسيحاتتايىق. قاجەت بولسا, جارناماسىن دا جاسايمىز, – دەيدى شىن جاناشىرلىق تانىتىپ جۇرگەن ايگەرىم ابەدجانوۆا.
جارناما دەگەندەي, قازىر تىگىن تسەحى كيىم-كەشەكتى سۇرانىسقا قاراي تىگىپ وتىر. ەگەر قىزىعۋشىلىق تانىتىپ, سۇرانىس كولەمى ارتا باستاسا, تىگىنشى ماماندار جاعىنان ماسەلە تۋىنداۋى مۇمكىن.
– تسەحتا ءبىر تىگىنشى جۇمىس ىستەپ وتىر. ءوزىم ديزاينىن سىزىپ, كيىمدى ءپىشىپ بەرەمىن. ءسويتىپ, ەكى جاقتاپ تىگەمىز. كۇرتەشەدەن بولەك ارقاعا اساتىن سومكەلەر دە بار. جۋىقتا كوللەدج تۇلەكتەرىمەن كەزدەستىم. تسەحتا جۇمىس ىستەيمىز دەپ نيەت بىلدىرگەندەر بولسا, ۇيرەتۋگە ءازىرمىن, – دەيدى تىگىنشى سايات شاياحمەتوۆ.
ءبىر قىزىعى, ساياتتىڭ تىگىنشىلىك ارنايى ءبىلىمى جوق. كىشكەنتايىنان اناسىنىڭ قاسىندا ءجۇرىپ, تىگىن تىگۋگە قىزىققان. وزىنە كيىم تىگىپ, كەيىن حوببيىنە اينالدىرعان. قىزىعۋشىلىعى بۇل كۇندە كاسىبىنە اينالىپ وتىر.
– ءبىر جاقسىسى, سۇرانىس جىل ون ەكى اي بار. قىستا دۇكەنىمىزگە شاڭعىشىلار ءجيى باس سۇقسا, جازدىڭ كۇنى الپينيستەر كەلەدى. ايتەۋىر, كوپتىڭ كوڭىلىنەن شىعىپ جاتىر, – دەيدى كاسىپكەر.
كوڭىلدەن شىقپاعاندا شە؟ ونىمدەرى شەتەلدىك برەندتەردەن ەش كەم ەمەس. ايتۋىنشا, ايتۋلى موداداعى كيىمدەردىڭ ەلەمەنتتەرىن پايدالانادى, وعان ءوز قيالىن قوسادى. ءسويتىپ, قىزىلدى-جاسىل ءساندى دە ساپالى كيىم تىگەدى. ساننەن بۇرىن, تاۋ-تاستا جۇرۋگە وتە ىڭعايلى. شيكىزاتتى قىتايدان جەتكىزەدى. قىل اياعى جىپكە دەيىن شەتەلدەن ساتىپ الاتىنىن ايتتى سايات ءسال وكىنىشتى جۇزبەن. ءيا, وزىمىزدە وندىرىلەتىن شيكىزاتتىڭ كەمشىن ەكەنى بەلگىلى.
شىندىعىندا, ءجىپ ەسىپ, ماتا شىعارامىن دەگەن جاس ماماندار, كاسىپكەرلەر تابىلسا, مەملەكەت تاراپىنان قولداۋ بار كورىنەدى. ولاي دەيتىنىمىز, سايات شاياحمەت شاعىن تسەحىن كەڭەيتۋ ءۇشىن 2,5 پايىزبەن 5 ملن تەڭگە نەسيە العان. بىلتىر كۇزدە 5 ملن تەڭگەنىڭ گرانتىن جانە ۇتىپ العان. تۇسكەن قارجىنىڭ بارلىعىن كاسىبىنە سالىپ, ءونىم تۇرلەرىن ارتتىرا تۇسكەن. «Altay Out Wear» اتتى كۇرتەشەلەرىن الماتى مەن شىمكەنت قالالارىنا دا جىبەرىپ وتىرادى. الداعى ۋاقىتتا استانادان دا ساۋدا نۇكتەسىن اشىپ قويۋدى ماقسات ەتىپ ءجۇر. وسى اياق الىسىنان تانباسا, ءار قالادان دۇكەن اشۋ مۇمكىندىگى بار. تەك, ەرىنبەي ەڭبەكتەنۋ قاجەت.
ەڭ ۇلكەن ماقساتى – ءوزىنىڭ تۋعان اۋلى كاتونقاراعايدا, التاي تاۋىنىڭ باۋرايىندا تىگىن تسەحىنىڭ ىرگەتاسىن قالاپ, الىستان ات شالدىرىپ جەتكەن تۋريستەرگە تابيعاتقا ارنالعان كۇرتەشەلەرىن ۇسىنۋ. سەبەبى التايدى تانىتىپ جاتقان كيىم شىعىستىڭ تورىندە تىگىلۋى كەرەك دەپ ەسەپتەيدى.
شىعىس قازاقستان وبلىسى
