فوتو: يۋري بەككەر
ەرلان قاريننىڭ جازۋىنشا ء«ارتۇرلى پىكىر – ءبىرتۇتاس ۇلت» اتتى العاشقى تۇجىرىم «ادىلدىك جانە ادىلەتتى قازاقستان دەگەنىمىز نە؟» دەگەن ساۋالعا جاۋاپ بەرەدى. ادىلەتتى قازاقستاندى قۇرۋ جولىندا تەڭقۇقىلىق قاعيداتى وتە ماڭىزدى. «حالىق ۇنىنە قۇلاق اساتىن مەملەكەت» اتتى ەكىنشى تۇجىرىم «ادىلدىك قالاي ورنايدى؟» دەگەن ساۋالعا «ەل-جۇرتپەن تىعىز بايلانىستا بولىپ, ولاردىڭ مۇڭ-مۇقتاجىن تىڭداي ءبىلۋ ارقىلى ورنىعادى» دەپ جاۋاپ بەرۋگە نەگىزدەلگەن. تۇجىرىمداما ەلىمىزدى دامىتۋعا قاتىستى باستى ماسەلەلەر بويىنشا قوعامنىڭ بارلىق وكىلىنىڭ پىكىرىن ەسكەرە وتىرىپ, بايىپتى ءارى ورتاق شەشىم قابىلداناتىنىن اڭعارتادى. «حالىق ۇنىنە قۇلاق اساتىن مەملەكەتتىڭ» جارقىن مىسالى رەتىندە كونستيتۋتسياعا وزگەرىستەر ەنگىزۋ ءۇشىن وتكىزىلگەن رەفەرەندۋمدى ايتۋعا بولادى.
ء«ۇشىنشى تۇجىرىم – «زاڭ جانە ءتارتىپ» ادىلدىك ورناتۋدىڭ ءادىس-تاسىلدەرىن ايقىندايدى, ياعني «ادىلدىكتى قانداي جولمەن ورناتامىز؟» دەگەن ساۋالعا جاۋاپ بەرەدى. زاڭدى مۇلتىكسىز ساقتاۋ, بارشانىڭ زاڭ الدىندا تەڭ بولۋى, ەڭ باستىسى زاڭ بۇزعان ادامنىڭ قالايدا جازاسىن الۋى – قوعامدا ادىلدىكتى ورنىقتىرۋدىڭ باستى شارتى. وسىنىڭ ءبارىن ءىس جۇزىندە ورىنداۋ وتە ماڭىزدى. بۇل, اسىرەسە, تۇرمىستىق-وتباسىلىق زورلىق-زومبىلىققا, جەمقورلىققا قارسى كۇرەسكە قاتىستى وقيعالاردان ايقىن كورىنەدى», دەيدى اۆتور.
ء«تورتىنشى تۇجىرىم – «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» ادىلەتتى قازاقستاننىڭ ينستيتۋتسيونالدىق اۋقىمىن ايقىندايدى, ياعني «ادىلەتتى قازاقستان» قانداي بولۋى كەرەك؟» دەگەن سۇراققا جاۋاپ بەرەدى. 2019–2021 جىلدارداعى ساياسي رەفورمالاردىڭ ءتورت توپتاماسى جانە 2022 جىلعى ساياسي جاڭعىرۋ باعدارلاماسى وسى تۇجىرىمدى ناقتى جۇزەگە اسىرۋعا ارنالدى. سونىڭ ناتيجەسىندە بيلىك تارماقتارى اراسىندا ءتيىمدى تەپە-تەڭدىك جۇيەسى بار مەملەكەتتىك قۇرىلىمنىڭ جاڭا ينستيتۋتسيونالدىق ۇلگىسى قالىپتاستى», دەپ جازعان.
مەملەكەتتىك كەڭەسشىنىڭ جازۋىنشا بەسىنشى تۇجىرىم – «ادال ازامات» ۇعىمى «ادىلەتتى قازاقستاندى كىم قالىپتاستىرادى؟» دەگەن ساۋالعا جاۋاپ بەرە وتىرىپ, ەل-جۇرتىمىزدىڭ رۋحاني-ادامي كەلبەتى بولاشاقتا قانداي بولاتىنىن جانە ازاماتتىق قوعام قالاي داميتىنىن كورسەتەدى. يدەولوگيالىق تۇعىرناما تۋرالى ايتقاندا مىنا ماسەلەگە نازار اۋدارعان ءجون. بۇل – قانداي دا ءبىر قاتىپ قالعان قاعيدالاردى ۇگىت-ناسيحات ارقىلى جاساندى تۇردە جاپپاي ساناعا ءسىڭىرۋ ەمەس, كەرىسىنشە, ءبىزدىڭ قوعامنىڭ رۋحاني بىرلىگىن نىعايتا تۇسەتىن شىنايى قۇندىلىقتاردى دارىپتەۋ دەگەن ءسوز.
«جالپى, مەملەكەت باسشىسى ۇسىنعان يدەولوگيالىق تۇعىرناما ەلىمىزدى ودان ءارى جان-جاقتى جاڭعىرتۋعا قاتىسى بار سالالاردىڭ بارىنە تىڭ سەرپىن بەرەدى», دەپ تۇيىندەيدى ەرلان قارين.
