فوتو: ms.pngtree.com
سونىڭ ىشىندە, ەرلان سايروۆتىڭ 6 ناۋرىز كۇنى وتكەن ءماجىلىستىڭ جالپى وتىرىسىندا تامارا دۇيسەنوۆاعا قاراتا قويعان ساۋالى دا بار.
«ەكونوميكانى دامىتۋدىڭ باستى قاينار كوزى - ادام. سول ادامدى دۇنيەگە اكەلەتىن نازىك جاندى ايەلدەر. مەملەكەتتىڭ باستى قۇندىلىعى - ادامدى دۇنيەگە اكەلەتىن ايەلدەرگە مەملەكەتتىك دەڭگەيدە قامقورلىق جاساپ, ولاردىڭ جان دۇنيەسىن ايالاپ, دەنساۋلىعىنا ءمان بەرۋ – باستى مىندەت! كورشى رەسەيدە انا كاپيتالىنىڭ سوماسى ءبىرىنشى بالاعا – 639 مىڭ رۋبل نەمەسە شامامەن 3 ملن 195 مىڭ تەڭگەگە, ەكىنشى بالاعا – 883 مىڭ رۋبل نەمەسە 7 ملن تەڭگەگە تەڭ. مۇنى قازاقستاندىق جاردەماقىمەن سالىستىرۋعا كەلە مە؟ ارينە, جوق. قازاقستانعا دا لايىقتى, ادىلەتتى انالىق كاپيتالدى جاساقتايتىن ۋاقىت جەتتى, بۇل كەزەك كۇتتىرمەيتىن ماسەلە», دەگەن ەدى دەپۋتات.
ماجىلىسمەندەر كورشىلەس رەسەيدەگى «انا كاپيتالى» سەكىلدى كومەكپەن قوسا, كوپبالالى انالاردىڭ ءتىسىن ەمدەۋگە دە قارجى ءبولۋ ماسەلەسىن قوزعاعان بولاتىن.
«ەلىمىزدە ۇزاق مەرزىمدى دەموگرافيانى قامتۋ ستراتەگياسىنىڭ باس اسپەكتىسى - لايىقتى انا كاپيتالىن قالىپتاستىرۋ. انا جۇكتى بولعان كەزدە قۇرساقتا بالانىڭ قالىپتاسۋىنا كالتسيدى كوپتەپ جۇمساپ, ءوزىنىڭ تىسىنەن ايىرىلاتىندىعى مەديتسينالىق فاكت. قازاقستاندا ستوماتولوگيالىق قىزمەت اقىسى كۇيىپ تۇرعانى بارشامىزعا بەلگىلى. سوندىقتان ءبىرىنشى كەزەكتە كوپبالالى ءزارۋ انالارعا ءتىسىن جوندەۋ ءۇشىن بىررەتتىك قارجىلىق تولەم قالىپتاستىرۋ ماڭىزدى. بالا تاپقان كەلىنشەكتەردىڭ دەنساۋلىعىن كۇتىپ, قالپىندا ۇستاپ وتىرۋدىڭ مەملەكەتتىك ستاندارتتارىن ازىرلەۋ كەرەك», دەدى ەرلان سايروۆ.
دەپۋتاتتار ساۋالىنا جاۋاپ بەرگەن پرەمەر-ءمينيستردىڭ ورىنباسارى قازاقستانداعى الەۋمەتتىك جاردەماقىلاردىڭ ەداۋىر تيىمدىلىگىن العا تارتتى.
«رەسەيدىڭ انا كاپيتالى دەگەنى تۇراقتى تەتىك ەمەس, ۋاقىتشا شارا بولىپ تابىلادى جانە حالىقتىڭ تۋ كورسەتكىشىن ءوسىرۋ ءۇشىن جۇزەگە اسىرىلادى. ول تولەم سەرتيفيكات تۇرىندە راسىمدەلەدى جانە ونى اتا-اناسى بالا 3 جاسقا تولعاننان كەيىن عانا بەلگىلى ءبىر ماقساتتارعا – تەك تۇرعىن ءۇي ساتىپ الۋعا, نە بالانىڭ ءبىلىم الۋىنا جۇمساي الادى. الايدا انالىق كاپيتالدى پايدالانۋى ءۇشىن تولەم قابىلەتتىلىگىن راستاۋى قاجەت. ءبىزدىڭ ەلىمىزدە قاراستىرىلعان جاردەماقىنىڭ رەسەيدەگى جۇيەدەن ايىرماشىلىعى سول, قازاقستاندا تولەم اناعا اي سايىن تولەنەدى جانە ونى قولدانۋ باعىتىندا ەشقانداي شەكتەۋ جوق. مىسالى, 2024 جىلى 4 بالاسى بار وتباسىنا اي سايىن 59 183 تەڭگە تولەنىپ تۇرادى. سوندا ورتا ەسەپپەن 18 جىلدا, ياعني بالا كامەلەتتىك جاسقا تولعانعا دەيىن ونىڭ اناسىنا بيۋدجەتتەن جالپى سوماسى كەم دەگەندە 12,8 ميلليون تەڭگە بەرىلەدى. بۇل – كورشى ەلدىڭ تولەماقىسىنان بىرنەشە ەسەگە ارتىق! الدەقايدا ءتيىمدى, ءارى جاردەماقى تولەمدەرىنىڭ ۋاقىتىلى ءارى تۇراقتى تولەنەتىنىنە كەپىلدىك بەرىلگەن», دەلىنگەن تامارا دۇيسەنوۆانىڭ جاۋابىندا.
سونداي-اق ول كوپبالالى انالاردىڭ ءتىسىن ەمدەۋگە بىررەتتىك تولەم قاراستىرۋ ماسەلەسى دە ۇكىمەت تاراپىنان قۇپتالمايتىنىن اتاپ ءوتتى.
