1 ماۋسىم – بالالاردى قورعاۋ كۇنىنە وراي ەلوردالىق ترياتلون ساياباعىندا وتكەن «Charity Samruk Marathon – 2024» قايىرىمدىلىق مارافونى سالاماتتى ءومىر سالتىن ۇستاناتىن ءارى جومارت جۇرەكتى وتانداستارىمىزدىڭ باسىن قوستى.
بۇقارالىق جۇگىرۋگە باس-اياعى 1200-دەن استام جەلاياق قاتىستى. ولاردىڭ باسىم كوپشىلىگى – «سامۇرىق-قازىنا» اق كومپانيالار توبىنىڭ قىزمەتكەرلەرى.
ەرەسەكتەر 5 جانە 10 شاقىرىمداردى باعىندىرسا, 200-دەن استام بالالار مەن جاسوسپىرىمدەر 400 جانە 1000 مەترگە جۇگىردى.
«بۇگىنگى شارا سالاماتتى ءومىر سالتى مەن بۇقارالىق سپورتتى ناسيحاتتاپ قانا قويمايدى. ەڭ باستىسى, ءبىز ءبىر ايدىڭ كولەمىندە 125 ملن تەڭگەدەن استام قاراجات جينادىق, بۇل قاراجاتتىڭ بارلىعى استانا قالاسىنداعى مەكتەپتەر مەن بالاباقشالاردا ينكليۋزيۆتى كابينەتتەر اشۋعا جۇمسالادى», دەپ اتاپ ءوتتى «سامۇرىق-قازىنا» اق باسقارما توراعاسى نۇرلان جاقىپوۆ.
جالپى, «سامۇرىق-قازىنا» – ەلىمىزدە قايىرىمدىلىققا ەرەكشە كوڭىل ءبولىپ وتىرعان قۇرىلىم.
«بيىل سۋ تاسقىنىنان زارداپ شەككەن وڭىرلەرگە ءبىز 22 ملرد-تان استام قاراجات بولدىك. ونىڭ ىشىندە 10 ملرد «قازمۇنايگاز», 3 ملرد «قازاتومپروم», 3 ملرد «قازاقستانتەمىرجولى», 2 ملرد «سامۇرىق-قازىنا», 1 ملرد «KEGOC», 1 ملرد «سامۇرىق-ەنەرگو», 1 ملرد «قازاقگاز», 1 ملرد «Air Astana». بۇدان بولەك, قارجىلاي كومەكپەن قاتار قور كومپانيالار توبى تەگىن جانارماي, ارنايى تەحنيكا, جۇمىسشىلار كۇشىن بولسە, «قتج», «Air Astana», «قازاقەير» ارقىلى تەگىن تاسىمالداۋ قىزمەتى كورسەتىلدى, دەيدى «سامۇرىق-قازىنا» قورىنىڭ باسشىسى.
جىل سايىن «سامۇرىق-قازىنا» كومپانيالار توبى اتىنان جارتى ميلليوننان استام وتانداسىمىزعا الەۋمەتتىك كومەك كورسەتىلەدى. ولاردىڭ 97 مىڭعا جۋىعى – بالالار مەن انالار.
مارافون قاتىسۋشىلارىن قولداۋ ءۇشىن ولاردىڭ وتباسى مۇشەلەرى دە كەلدى, جالپى سپورتتىق شاراعا بارلىعى 2 مىڭنان استام ادام قاتىستى.
قور جۇگىرۋگە نيەت بىلدىرگەن جاندارعا مارافونعا دەيىن ءبىر اي بويى ءار سەنبى سايىن تاجىريبەلى جاتتىقتىرۋشىمەن دايىندالۋعا مۇمكىندىك جاساعان.
وسىلايشا, سالاماتتى ءومىر سالتىنا دەن قويعان ازاماتتار مەن جومارت جانداردىڭ ارقاسىندا كىشكەنتاي بالدىرعاندار جارقىن بولاشاققا, سالاماتتى جانە باقىتتى ءومىر سۇرۋگە مۇمكىندىك الدى.
جاپپاي جۇگىرۋ اياقتالعان سوڭ مارافون قاتىسۋشىلارى مەن ەرىكتىلەر توبى مەملەكەت باسشىسىنىڭ «تازا قازاقستان» جالپىۇلتتىق ەكولوگيالىق اكتسياسىن قولداۋ ماقساتىندا ساياباق اۋماعىن قوقىستان تازالاپ شىقتى.
اقمارال بايازيتوۆا
