بۇل ءىس-شارا 2018 جىلى قازاقستان ۇكىمەتى باستاعان ءۇش ءتىلدى ءبىلىم بەرۋ باستاماسىنا قولداۋ كورسەتۋگە باعىتتالعان. كەيىنگى جىلدارى اقش ديپلوماتيالىق وكىلدىگى اعىلشىن تىلىندەگى باعدارلامالاردىڭ كەڭ اۋقىمىن ۇسىنىپ كەلەدى. سونىڭ ىشىندە «Fulbright» باعدارلاماسى جەمىستى جۇمىس ىستەپ جاتىر. ماسەلەن, بيىلعى وقۋ جىلىندا دا ەلىمىزدىڭ ۋنيۆەرسيتەتتەرىندە اعىلشىن ءتىلىن وقىتاتىن «15 Fulbright ETA» مەن «7 ELF» جوباسىنا قاتىسقان ستۋدەنتتەردىڭ قاتارى كوپ. جوعارى وقۋ ورىندارىنداعى ستۋدەنتتەرگە اعىلشىن ءتىلىن وقىتۋ مەن دامىتۋعا تىكەلەي ۇلەس قوسۋدى كوزدەيتىن جوباعا بيىل امەريكالىق 22 وقىتۋشى قاتىسقان. ولار ستۋدەنتتەرگە ءتىل ۇيرەتىپ قانا قويماي, ەلىمىزدە ءبىر جىلعا جۋىق ۋاقىتتا جەرگىلىكتى حالىقتىڭ تۇرمىس-تىرشىلىگىمەن تانىسۋعا مۇمكىندىك الدى.
وتكەن اپتادا وسى باعدارلاماعا قاتىسقان 80 ستۋدەنت پەن وقىتۋشى اقش ەلشىلىگى ۇيىمداستىرعان ءۇش كۇندىك جارىستا باق سىنادى. پىكىرتالاس جەكە, كاسىبي جانە جاھاندىق ماسەلەلەر تاقىرىپتارىن قامتىدى. ولاردىڭ دەباتتىق جارىسىنا قازاقستانداعى اقش ەلشىسى دەنيەل روزەنبليۋم تورەلىك ەتىپ, جەڭىمپازداردى ماراپاتتاۋ راسىمىنە قاتىستى.
«پىكىرتالاسقا ەلدىڭ تۇكپىر-تۇكپىرىندەگى 19 ۋنيۆەرسيتەتتىڭ ستۋدەنتى قاتىسىپ جاتىر. ولار بەرىلگەن تاقىرىپ بويىنشا جوسپار قۇرىپ, اعىلشىن تىلىندە وي-پىكىرىن ەركىن ءارى ناقتى دالەلمەن جەتكىزە بىلۋگە ءتيىس. سونداي-اق ايتىلىپ وتىرعان تاقىرىپقا قاتىستى ءبىر-ءبىرىن تولىقتىرۋ تاپسىرىلدى. ايتا كەتۋ كەرەك, بۇل باعدارلاما ورتا مەكتەپتەردە دە جۇمىس ىستەدى. امەريكالىق وقىتۋشىلار ون اي بويى وسى ەلگە كەلىپ, وقۋشىلار مەن ستۋدەنتتەرگە, مۇعالىمدەرگە اعىلشىن تىلىنەن ساباق بەردى», دەيدى ەلشى. ونىڭ ايتۋىنشا, باعدارلاما الداعى ۋاقىتتا دا جالعاسادى. سونداي-اق جوبا قاتىسۋشىلارى اراسىنداعى بايقاۋدىڭ قورىتىندىسىن شىعارۋ ءۇشىن پىكىرسايىستى تۇراقتى وتكىزۋ دە كوزدەلىپ وتىر. بۇل جولعى جارىستا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتتەرى توپ جاردى.
