فوتو: اقوردا ءباسپاسوز قىزمەتى
پرەزيدەنتتىڭ ايتۋىنشا, قازىر ەلىمىزدە الەمنىڭ بەدەلدى 12 جوعارى وقۋ ورنىنىڭ فيليالى جۇمىس ىستەپ تۇر. ودان بولەك, جىل سايىن 500 عالىم شەتەلدە تاعىلىمدامادان وتەدى.
«وزدەرىڭىزگە ءمالىم, عىلىمعا بولىنەتىن قارجى ۇدايى ارتىپ كەلەدى. بىلىكتى كادرلار ازىرلەۋگە ارنالعان گرانت سانى سوڭعى جىلدارى ءبىر جارىم ەسە كوبەيدى. قازاقستاندا الەمنىڭ بەدەلدى 12 جوعارى وقۋ ورنىنىڭ فيليالى جۇمىس ىستەپ تۇر. كوپ ۇزاماي تاعى بىرنەشەۋى اشىلادى. زەرتتەۋ جۇمىستارىمەن اينالىساتىن ۋنيۆەرسيتەتتەر كوبەيۋدە. تەحنولوگيا پاركتەرى جانە ينجينيرينگ ورتالىقتارى اشىلىپ جاتىر. جىل سايىن 500 عالىم شەتەلدە تاعىلىمدامادان وتەدى. مينيسترلىك جاس عالىمدارعا مىڭداعان گرانت ءبولىپ جاتىر. مۇنىڭ ءبارى عىلىمدى دامىتۋعا وڭ ىقپالىن تيگىزەدى دەپ ويلايمىن», دەدى قاسىم-جومارت كەمەل ۇلى.
مەملەكەت باسشىسىنىڭ پايىمىنشا, وتاندىق عالىمدار شەتەلدىك عالىمدارمەن ىنتىماقتاستىق ورناتىپ, تىعىز بايلانىستا بولۋ كەرەك. سەبەبى, بۇل - تاجىريبە الماسۋدىڭ ءتيىمدى جولى.
«مەن شەتەلگە ساپارلارىم كەزىندە عالىمدارمەن ءجيى كەزدەسەمىن. ولاردى قازاق عالىمدارىمەن تىعىز بايلانىس ورناتۋعا شاقىرامىن. وتكەن اپتادا سينگاپۋرلىق عالىمدارمەن جانە ونداعى جوعارى وقۋ ورىندارىنىڭ رەكتورلارىمەن ارنايى جۇزدەستىم. ەندى سينگاپۋردا عىلىمي كادرلارىمىزدى وقىتاتىن بولدىق. جالپى, سينگاپۋر سياقتى ەكونوميكاسى وزىق ەلدەردەن كوپ نارسە ۇيرەنۋگە بولادى. پوستيندۋستريالدى داۋىردە الەمگە اشىق بولۋ جانە يننوۆاتسياعا ۇمتىلۋ كەز كەلگەن ەلدىڭ تابىسقا جەتۋى ءۇشىن اسا ماڭىزدى فاكتور سانالادى. سوندىقتان ۇزدىك حالىقارالىق تاجىريبەنى مۇقيات زەرتتەيمىز جانە ودان ۇلگى الامىز. وزىق تەحنولوگيالار مەن يدەيالاردى ەنگىزەمىز», دەدى ەل پرەزيدەنتى.
