فوتو:gov.kz
باس پروكۋراتۋرانىڭ حابارلاۋىنشا, دۋدنيك پروكۋرورلار شىعارعان قاداعالاۋ اكتىسىنەن كەيىن قىزمەتىنەن ايىرىلدى.
«مەملەكەت باسشىسىنىڭ تاپسىرماسى بويىنشا پروكۋراتۋرا ماڭىزدى ينۆەستيتسيالىق جوبالاردى قولداۋ بويىنشا جۇمىستى جالعاستىرۋدا. بۇل قاداعالاۋ قىزمەتىنىڭ باسىم باعىتتارىنىڭ ءبىرى, مۇنداعى باستى مىندەت ماسەلەلەردى ءتيىمدى شەشۋ, ينۆەستورلاردىڭ قۇقىقتارى مەن زاڭدى مۇددەلەرىن قورعاۋ. اتالعان جۇمىس اياسىندا دەنساۋلىق ساقتاۋ مينيسترلىگى 4 ينۆەستيتسيالىق جوبا بويىنشا باس پروكۋراتۋرانىڭ قاداعالاۋ اكتىسىنە قاتىستى 8 تاپسىرمانى ورىنداماعانى انىقتالدى. ينۆەستيتسيالىق شتابتىڭ نۇسقاۋى بويىنشا دەنساۋلىق ساقتاۋ ۆيتسە-ءمينيسترى ۆ.يۋ.دۋدنيك قىزمەتىنەن بوساتىلدى», دەپ حابارلادى قاداعالاۋ ورگانى.
بۇل رەتتە باس پروكۋراتۋرا پرەزيدەنتتىڭ «ەل ەكونوميكاسىنا ينۆەستيتسيالار تارتۋ جونىندەگى جۇمىستىڭ تيىمدىلىگىن ارتتىرۋ جونىندەگى شارالار تۋرالى» جارلىعىنا سايكەس ينۆەستيتسيالىق شتاب شەشىمدەرىن ورىنداماعانى نەمەسە تيىسىنشە ورىنداماعانى ءۇشىن ورتالىق مەملەكەتتىك ورگاندار باسشىلارىنىڭ بەلگىلەنگەن دەربەس جاۋاپكەرشىلىگى تۋرالى ەسكە سالدى.
«جالپى, بۇگىندە پروكۋرورلار ينۆەستورلاردىڭ 225 ماسەلەسىن شەشتى. اتالعان جۇمىس جالعاسىن تابادى جانە باس پروكۋراتۋرا باسشىلىعىنىڭ ەرەكشە باقىلاۋىندا بولادى», دەپ تولىقتىردى ۆەدومستۆو.
قىرمىزى جۇماعاليقىزى,
ەۇۋ ستۋدەنتى
