فوتو: dknews.kz
ساقتاندىرۋ ءپوليسىن رەسىمدەۋ ءۇشىن قاجەتتى نەگىزگى دەرەكتەر بىرىڭعاي ساقتاندىرۋ دەرەكقورىنىڭ ءتۇرلى مەملەكەتتىك دەرەكقورلارمەن ىقپالداسۋى ەسەبىنەن اۆتوماتتى تۇردە تولتىرىلادى. سونىمەن قاتار بيىلدان باستاپ مىندەتتى اۆتوساقتاندىرۋ بويىنشا ۇساق جول-كولىك وقيعالارىن (جكو) جول پوليتسياسىن شاقىرماي جانە سوتقا جۇگىنبەي-اق ونلاين رەسىمدەۋگە بولادى. مۇنداي وڭايلاتىلعان ءتارتىپ ەۋروحاتتاما دەپ اتالادى.
ەۋروحاتتاما زالال مولشەرى 100 اەك-تەن (شامامەن 370 مىڭ تەڭگە) اسپاعان جانە جكو قاتىسۋشىلارىندا اپاتقا كىم كىنالى, كىمنىڭ زارداپ شەككەنى تۋرالى ءوزارا كەلىسپەۋشىلىكتەر بولماعان كەزدە رەسىمدەلەدى. وسى ۋاقىتقا دەيىن مۇنداي جاعدايلاردا جكو قاتىسۋشىلارى جول پوليتسياسىن شاقىرماي جانە ساقتاندىرۋ تولەمىنە جۇگىنبەي, وقيعا ورنىندا ۋاعدالاسقان. كەلتىرىلگەن زالالدى اپاتقا كىنالى ادام دەربەس وتەگەن.
قازىر ەۋروحاتتامانى رەسىمدەۋ ءۇشىن جكو-عا قاتىسۋشىلاردىڭ ەكەۋىنە دە سمارتفوندارعا ءموبيلدى قوسىمشانى جۇكتەۋ, يدەنتيفيكاتتاۋدان ءوتۋ, دەكلاراتسيا تولتىرۋ, اپات ورنىنان فوتوسۋرەتتەر مەن بەينەتۇسىرىلىم جاساۋ قاجەت, سودان كەيىن ءوتىنىش اۆتوماتتى تۇردە ساقتاندىرۋ ۇيىمىنا جىبەرىلەدى. وسىدان كەيىن عانا اپات ورنىنان كەتۋگە بولادى. جول پوليتسياسىن شاقىرۋدىڭ جانە سوتقا جۇگىنۋدىڭ قاجەتى جوق.
مۇنداي حاتتامانى رەسىمدەۋ ءۇشىن ەۋروحاتتامانىڭ ءموبيلدى قوسىمشاسىن پايدالانۋ كەرەك. الايدا بۇل جالعىز نۇسقا ەمەس. جەكەلەگەن ساقتاندىرۋ ۇيىمدارى وزدەرىنىڭ تسيفرلىق سەرۆيستەرىن ازىرلەدى. ەۋروحاتتامانى رەسىمدەۋ ءۇشىن ولاردى دا پايدالانۋعا بولادى.
ماسەلەن, «Freedom Insurance» اق-دا – «DTP.kz» سەرۆيسى, «حالىق» سك» اق-دا – «Halyk» قوسىمشاسى, «نوماد ينشۋرانس» سك» اق-دا – «Nomad.kz» قوسىمشاسى بار. كەي ساقتاندىرۋ ۇيىمدارى ەۋروحاتتامانى وزدەرىنىڭ رەسمي ينتەرنەت-رەسۋرستارىندا («Basel» سك» اق, «مۇناي ساقتاندىرۋ كومپانياسى» اق) رەسىمدەۋ مۇمكىندىگىن ۇسىنادى.
