فوتو: ن.بايبۋلين
سەناتورلار اۋەلى تالعات يبراشەۆتى جوعارعى سوت سۋدياسى قىزمەتىنەن بوساتۋ تۋرالى ەل پرەزيدەنتىنىڭ ۇسىنىسىن قارادى. اتالعان ماسەلەنى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىندە الدىن الا تالقىلاعان دەپۋتاتتار پالاتا وتىرىسىندا مەملەكەت باسشىسىنىڭ ۇسىنىمىن قولداۋ جونىندە شەشىم قابىلدادى.
سونىمەن قاتار وتىرىستا پارلامەنت دەپۋتاتتارى باستاماشى بولعان «ورگانيكالىق ءونىم ءوندىرىسى جانە اينالىمى تۋرالى» زاڭ قارالىپ, ماقۇلداندى. اتالعان زاڭ ورگانيكالىق ءونىمنىڭ ىشكى نارىعىن قالىپتاستىرىپ, دامىتۋعا, وتاندىق ازىق-ت ۇلىك وندىرۋشىلەرىن ورگانيكالىق ءونىم وندىرۋگە ىنتالاندىرۋعا جانە ولاردىڭ سىرتقى نارىقتارداعى باسەكەگە قابىلەتتىلىگىن ارتتىرۋعا ارنالعان.
زاڭدا ورگانيكالىق ءونىم وندىرىسىنە كوشۋدىڭ نەگىزگى شارتتارى قاراستىرىلعان. ونى وندىرۋگە جانە تاڭبالاۋعا, ورگانيكالىق ءونىم اينالىمىنا تىكەلەي تالاپتار بەلگىلەنگەن. سونداي-اق ورگانيكالىق ءونىمدى ەسەپكە الۋ جانە قاداعالاۋ جۇيەسى ەنگىزىلگەن. اتاپ ايتقاندا, سايكەستىك سەرتيفيكاتى بولعان كەزدە ورگانيكالىق ءونىمدى تاڭبالاۋ قاراستىرىلعان. وسى رەتتە ورگانيكالىق اۋىل شارۋاشىلىعىن اگروونەركاسىپتىك كەشەندەگى سۇرانىسقا يە باعىت رەتىندە دامىتۋ ءۇشىن زاڭ ورگانيكالىق ءونىم ءوندىرىسى مەن اينالىمى سالاسىندا عىلىمي قامتاماسىز ەتۋدى رەگلامەنتتەيتىن باپپەن تولىقتىرىلدى.
زاڭدى قاراۋ كەزىندە سەنات دەپۋتاتتارى وعان ىلەسپە «قر-نىڭ كەيبىر زاڭنامالىق اكتىلەرىنە ورگانيكالىق ءونىم ءوندىرىسى جانە اينالىمى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قر-نىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭداردى دا ماقۇلدادى.
«بۇل زاڭدار ەلىمىزدە ورگانيكالىق ءونىم نارىعىن دامىتۋ ماقساتىمەن ازىرلەندى. جاڭا نورمالار ارقىلى ورگانيكالىق ءونىم ءوندىرىسى مەن اينالىمىنىڭ قۇقىقتىق, ەكونوميكالىق جانە الەۋمەتتىك نەگىزدەرى ايقىندالادى. سونداي-اق تۇزەتۋلەر اياسىندا ورگانيكالىق ءونىم نارىعىن مەملەكەتتىك رەتتەۋ شارالارى قاراستىرىلىپ وتىر. جالپى, ماقۇلدانعان زاڭدار ورگانيكالىق ونىمدەردىڭ ساپاسىن جانە وتاندىق وندىرۋشىلەردىڭ باسەكەگە قابىلەتتىلىگىن ارتتىرۋعا ىقپال ەتەدى دەپ سەنەمىز», دەگەن سەنات توراعاسى زاڭعا باستاماشى بولعان دەپۋتاتتارعا العىس ءبىلدىردى.
پالاتا وتىرىسىندا سەناتورلار «عىلىم جانە تەحنولوگيالىق ساياسات تۋرالى» جانە وعان ىلەسپە «قر-نىڭ كەيبىر زاڭنامالىق اكتىلەرىنە عىلىم جانە تەحنولوگيالىق ساياسات, پلاتفورمالىق جۇمىسپەن قامتۋ جانە مەملەكەتتىك باقىلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قر-نىڭ كودەكسىنە (سالىق كودەكسى) جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قر-نىڭ كودەكسىن (سالىق كودەكسى) قولدانىسقا ەنگىزۋ تۋرالى» قر-نىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭداردى ءبىرىنشى وقىلىمدا قاراپ, ماقۇلدادى.
اتالعان زاڭداردىڭ نورمالارى عىلىمدى دامىتۋ جانە عىلىمي جەتىستىكتەردىڭ ناتيجەلەرىن ەنگىزۋ جونىندەگى تەحنولوگيالىق ساياساتتى ىسكە اسىرۋ ءۇشىن قولايلى جاعدايدى قامتاماسىز ەتۋگە ارنالعان. سەناتورلاردىڭ ۇسىنعان تۇزەتۋلەر عىلىمي كادرلار دايارلاۋدى قامتاماسىز ەتۋدى, سونداي-اق عىلىمي قىزمەتكەردىڭ الەۋمەتتىك قورعالۋ كەپىلدىكتەرىن ىسكە اسىرا وتىرىپ, عىلىم سالاسىنىڭ ستراتەگيالىق, كاسىپتىك جانە الەۋمەتتىك ماسەلەلەرىن شەشۋدى كوزدەيدى.
وتىرىس بارىسىندا بىرقاتار دەپۋتاتتىق ساۋال جولداندى.
