فۋتبولدان ءبىرىنشى ليگا كوماندالارى اراسىنداعى ەل بىرىنشىلىگىنىڭ بەسىنشى تۋرى اياسىندا وسكەمەندىك «التاي» ءوز الاڭىندا الماتىلىق «حان ءتاڭىرى» كومانداسىن قابىلدادى. ويىن ناتيجەسى بويىنشا قوناققا كەلگەن كوماندا جەڭىسكە جەتىپ, قانجىعاسىنا ءۇش ۇپايدى بايلاپ كەتتى. كەزدەسۋ بارىسىندا تولاسسىز گول سوعىلماسا دا, ويىن قىزۋ تارتىسقا تولى بولدى. ارينە, مۇنداي باسەكەدە قاۋىپسىزدىك شارالارى دا جوعارى دەڭگەيدە ورىندالۋعا ءتيىس. بۇل جولى دا «شىعىس» وڭىرلىك قولباسشىلىعىنا قاراستى 5518 اسكەري ءبولىمىنىڭ مەرزىمدى اسكەري قىزمەتشىلەرى سپورتتىق شارا ءتارتىبىن باستان-اياق باقىلاپ, قىرانداي قىراعىلىق تانىتتى.
تاياۋدا «اقتوبە» فۋتبول كلۋبىنىڭ جانكۇيەرلەرى الماتى مەتروسىندا قوعام تىنىشتىعىن بۇزعان. پوليتسەيلەر قالادا عايبات ءسوز ايتىپ, قوعامدىق ورىنداردى لاستاعان فۋتبول جانكۇيەرلەرىن جاۋاپقا تارتتى. سپورتتىق ءىس-شارالاردا ءوزىن ءوزى ۇستاۋ ەرەجەلەرىن بۇزعان قۇقىق بۇزۋشىلارعا اكىمشىلىك شارا قولدانىلدى. ال فۋتبول جانكۇيەرلەرىنىڭ ستاديونداعى ەرسى قىلىقتارى بۇدان دا اسىپ تۇسەدى. ەستە بولسا, وسىدان ءبىر اي بۇرىن تۇركيا سۋپەرليگاسىنىڭ 30 تۋرى اياسىندا «ترابزونسپور» مەن «فەنەرباحچە» كوماندالارى كەزدەسۋ وتكىزدى. ويىن سوڭىنا قاراي جەرگىلىكتى كوماندا جانكۇيەرلەرىمەن قوناق كوماندا ويىنشىلارى اراسىندا توبەلەس باستالىپ كەتتى. قازىر جارىس كەزىندەگى وسى ولقىلىقتىڭ سالدارىنان «فەنەرباحچە» فۋتبول كلۋبىن سۋپەرليگادان الىپ تاستاۋ ماسەلەسى كوتەرىلىپ جاتىر. ەموتسياعا بەرىلگەن فاناتتاردان قيتۇرقى ارەكەتتىڭ ءتۇر-ءتۇرىن كۇتۋگە بولادى. سوندىقتان بولار, «ينتەر مايامي» مەن ارگەنتينا قۇراماسىنىڭ شابۋىلشىسى ليونەل مەسسيدىڭ وققاعارى دا ويىن بارىسىندا فۋتبولشىنىڭ وزىمەن بىرگە جۇگىرىپ, قارا تەرگە تۇسەتىنى بار.
ويىنشى الاڭنىڭ قاي بۇرىشىندا بولسا, الاڭ شەتىمەن سول اۋماققا ءارلى-بەرلى جۇگىرىپ الەك ءتۇسىپ جۇرەتىنى ەزۋ تارتقىزادى. بىراق تارتىسقا تولى جارىستاردا جانكۇيەرلەردىڭ ويىنا نە جاتقانىن ۇعۋ قيىن.
وسكەمەندەگى ءبىرىنشى ليگادا ونەر كورسەتەتىن «التاي» فۋتبول كلۋبىنىڭ ويىنشىلارىندا جەكە وققاعار جوق. ويتكەنى بۇل جاقتا الاڭ ورتاسىندا ويران سالاتىن بۇزاقىلاردى قويىپ, ويىندى تاماشالاۋعا كەلەتىن كورەرمەن سانى دا نەكەن-ساياق. دەگەنمەن ۇلتتىق ۇلاننىڭ ساربازدارى سپورتتىق ويىننىڭ ويداعىداي وتۋىنە اتسالىسىپ, ءاردايىم قاۋىپسىزدىكتىڭ جوعارى دەڭگەيىندە قىزمەت اتقارىپ ءجۇر.
– مەن ۇلتتىق ۇلان قاتارىنا سەمەي قالاسىنان شاقىرىلدىم. ءبىزدىڭ قالا تۇرعىندارىنىڭ فۋتبولعا دەگەن قۇلشىنىسى الابوتەن. بيىل عانا پرەمەر ليگاعا ءوتىپ, كوشباسشىعا اينالعان «ەلىماي» كومانداسىنىڭ ءاربىر ويىنىن جەرگىلىكتى جۇرت تاعاتسىزدانا كۇتىپ, ەلەڭدەپ وتىرادى. ايتالىق, «ەلىمايدىڭ» «قىزىلجارمەن» وتكىزگەن ويىنىنا 8 مىڭعا جۋىق ادام جينالعان. ارينە, «التاي» كومانداسى ءبىرىنشى ليگادا وينايدى. الايدا بىلتىر «ەلىمايدا» ءبىرىنشى ليگادا ونەر كورسەتكەن. سول كەزدە دە ستاديوندا ينە شانشار ورىن قالدىرماعان جانكۇيەرلەردىڭ سانى كوبەيمەسە, ازايعان جوق. ال «التايدىڭ» ويىنىنا بۇگىن مولشەرمەن 40-50 ادام كەلگەن. بىراق وسكەمەن قالاسىنىڭ تۇرعىندارى فۋتبولدان گورى حوككەيگە قۇمار سياقتى, – دەيدى 5518 اسكەري ءبولىمىنىڭ قاتارداعى جاۋىنگەرى دياس مالدىباەۆ.
مەرزىمدى اسكەري قىزمەتشى قارۋلاستارىمەن بىرگە ويىنعا ەكى ساعات بۇرىن كەلگەن. قۇرامىندا كينولوگى بار جاۋىنگەرلىك جاساق جاسىل الاڭ سىرتىن تورۋىلداپ, فۋتبولعا كەلگەن جۇرتشىلىقتى كوز سىدىرتا باقىلاۋعا الادى. كۇدىكتى كورىنگەندەر بولسا, توقتاتىپ, تەكسەرىس جۇرگىزەدى. ال قالعان اسكەري ساربازدار بولسا جاسىل الاڭعا ارقاسىن بەرىپ, تىزە بۇككەن جۇرتشىلىققا نازار سالىپ, تيەسىلى اۋماقتى باقىلاۋعا الۋعا ءتيىس. الا دوپ الامانىنىڭ قاۋىپسىزدىگىن مويىنىنا العان مەرزىمدى اسكەري قىزمەتشىنىڭ ءبىرى – ايبەك التىنبەكوۆ. ول دا ۇلتتىق ۇلان ساپىنا قىزىلوردا وبلىسى, تەرەڭوزەك اۋدانى بەسارىق اۋىلىنان شاقىرتىلعان. جاۋىنگەرلىك جاساق قاتارىندا قىرانداي قىراعى ساربازعا ستاديون اۋماعىن باقىلاۋعا الۋ جۇكتەلگەن. ويتكەنى قارسىلاس كومانداعا نەمەسە قارسىلاس كوماندانىڭ جانكۇيەرلەرىنە تۇتقيىلدان شابۋىل جاساۋعا ارەكەتتەنگەن بۇزاقى توبى بولۋى بەك مۇمكىن. ۇلتتىق ۇلان ساربازى وسىنداي جانكۇيەرلەر جايىندا جولداستارىنان ءبىراز اقپارات العان كورىنەدى.
– مەن مەكتەپ قابىرعاسىندا جۇرگەندە «جايدارماندا» ونەر كورسەتتىم. ءبىر جولى قىزىلوردا قالاسىندا وتكەن سايىستا جاڭا دوستار تاپتىم. ساحنادا ونەر كورسەتىپ بولعاننان كەيىن, ءبارىمىز كيىم اۋىستىراتىن بولمەدە باس قوسىپ, اڭگىمە-دۇكەن قۇراتىنىمىز بار. استانا قالاسىنان كەلگەن ءبىر ازىلكەش ۇلىبريتانيادا بولعان ەكەن. ول تۇماندى البيون ەلىندە فۋتبول جانكۇيەرلەرىنىڭ قىزۋقاندى بولاتىنىن ايتتى. ماسەلەن, ولار قارسىلاس كلۋبقا جانكۇيەر ەكەندىگىڭدى ءبىلىپ قويسا, جاعدايىڭ مۇشكىل دەگەن ءسوز. ال سەنىڭ قارسىلاس كوماندانىڭ قالاسىندا جۇرگەنىڭدى كورسە, ارتىڭنان قۋىپ, ءىزىڭدى اڭدۋدان ەش جالىقپايدى ەكەن. ولارمەن كيكىلجىڭگە ءتۇسۋدىڭ ەش قاجەتى جوق. ارتىڭنان ەرگەن سۋىت جۇرىستىلەردى بايقاپ قالعان بولساڭ, ابدىراماي جەدەل تاكسي شاقىرىپ, تايىپ تۇرماساڭ, تۇرعان جەردە اتىپ تاستاۋى دا مۇمكىن. سوندىقتان ستاديونعا بارىپ, سۇيىكتى كومانداعا قولداۋ تانىتقاندا, ەموتسياعا سالىنباي, سالماقتى بولعانىڭ ءجون. سەنىڭ كومانداڭ ويىن بارىسىندا جەڭىسكە جەتىپ, ونىڭ اسەرىنەن شاتتانىپ, ەسىرىپ, داراقىلىق تانىتپاۋىڭ قاجەت. قارسىلاس كوماندا جانكۇيەرلەرىن مازاقتاپ, قول شىعارىپ قالساڭ, سەنىڭ ءتۇرىڭدى بىردەن جاتتاپ الادى. ودان كەيىن جالعىز جارىم جۇرگەن جەرىڭدە تاياقتىڭ استىنا الۋى دا عاجاپ ەمەس. سوندىقتان جانكۇيەر بولۋدىڭ دا ءوز مادەنيەتىن ساقتاعان ءجون. شىنىمەن, ەگەر بۇزاقىلىق بولا قالسا, بۇل ەرتەڭ فۋتبولسۇيەر قاۋىمدى ۇركىتىپ الۋعا دەيىن اپارۋى مۇمكىن. مۇنداي بۇزاقىلىقتار فۋتبولعا قىزىعۋشىلىق تانىتىپ جۇرگەن جاستاردىڭ «سوققىعا جىعىلىپ جاتقانشا, ۇيدە جاتىپ-اق جانكۇيەر بولايىن» دەگەن كوزقاراسىن قالىپتاستىرادى. ال جانكۇيەر ازايسا, ەلدىڭ فۋتبول كومانداسىنا كىم جىگەر سىيلاپ, رۋحىن وياتادى؟ سوندىقتان الا دوپقا الاڭمەن قاراۋ كەرەك. ەگەر ۇلاندىقتار ءاربىر تارتىپسىزدىكتىڭ الدىن الىپ, كورەرمەننىڭ قورعانىنا اينالسا بۇل فۋتبول جۇرتشىلىعىن ارتتىرا تۇسەدى دەپ ويلايمىن. ال فۋتبولشى ءۇشىن ويىننىڭ تارتىستى وتۋىنە سەبەپكەر بوركىن اسپانعا لاقتىرىپ قۋانىپ, جالىندى ۇرانىمەن رۋحىڭدى اسقاقتاتار كورەرمەن قاۋىم, – دەپ اعىنان جارىلدى اسكەري ءبولىمىنىڭ قاتارداعى جاۋىنگەرى ايبەك التىنبەكوۆ.
جاقىندا عانا «التاي» كومانداسى ءوز الاڭىندا تاعى دا كەزەكتى ويىن وتكىزدى. تەڭبىل دوپ تارتىسىنىڭ قاۋىپسىز وتۋىنە اتسالىسقان ۇلاندىقتار ءوز مىندەتىنە ارقاشان ءمىنسىز, ساقاداي ساي دايىن.
