فوتو: rast.kz
شىن مانىندە, جوعارىدا كەلتىرىلگەن كۇردەلى جاعدايدان ەسىن جيىپ, قايتا جاڭعىرۋ ءۇشىن, ارينە, ءبىرىنشى كەزەكتە ۇلتتىڭ سانى ءوسۋى كەرەك. ساپاسى كوتەرىلۋى كەرەك. ول ءۇشىن دەنساۋلىقتىڭ مىقتىلىعى ماڭىزدى. سونىمەن قاتار جاڭا زاماننىڭ سىناقتارىنا ءبىلىم مەن عىلىم ارقىلى عانا جاۋاپ بەرۋ مۇمكىن ەدى. سوندىقتان ءبىلىم مەن عىلىم جولىن تاڭداپ, ونىڭ ىشىندە دەنساۋلىق ساقتاۋ سالاسىندا قىزمەت اتقارۋى – سول جاۋاپتىڭ ءبىرى بولدى.
توكەڭ ءار امالى مەن ءار قارەكەتى ارقىلى ۇلتىنا دا, ادامزاتقا دا قىزمەت ەتۋدىڭ ۇلگىسىن قالىپتاستىردى. ۇلت كوكجيەگىن كەڭەيتىپ, الەمگە تانىلۋىنا كوپ قىزمەت ەتتى. ونىڭ ەڭ جارقىن مىسالى – 1978 جىلى الماتىدا وتكەن دۇنيەجۇزىلىك دەنساۋلىق ساقتاۋ ۇيىمى مەن UNICEF-ءتىڭ بىرلەسكەن كونفەرەنتسياسى. وعان دەيىن قازاق جەرىندە جاھاندىق جيىن بولىپ كورگەن ەمەس-ءتى. ءبىر جاعىنان, الماتى دەكلاراتسياسى بۇكىل الەمدەگى ميلليونداعان ادامنىڭ ءومىرىن ساقتاپ قالۋعا جۇمىس ىستەگەن دەنساۋلىق ساقتاۋ جۇيەسىنىڭ دامۋىنا, جەدەل جاردەم سەكىلدى العاشقى كومەك كورسەتەتىن جۇيەنى دامىتۋعا سەپ بولسا, ەكىنشى جاعىنان كونفەرەنتسيا قازاق دەگەن ەلدىڭ بار ەكەنىن الەمگە ايگىلەپ بەردى.
توكەڭ باقيلىق بولعانمەن, ونىڭ مۇراسى مەن عيبراتى عاسىرلار بويى ۇلتقا قىزمەت ەتە بەرمەك. سول ۇلاعاتىنىڭ ىشىندە مەنىڭ تۇيگەنىم – ول كىسى ءومىردى ءسۇيۋ, ادامدى ءسۇيۋدىڭ وزىق مىسالىن كورسەتىپ كەتتى. كەشىرىمشىلدىگى دە – ايرىقشالاپ اتاپ ايتۋعا بولار قاسيەت. 1978 جىلى جاھاندىق جيىننان كەيىن ءتۇرلى كورەالماۋشىلىقتىڭ سالدارىنان ەلدەن جىراقتاپ, ماسكەۋدە تۇرۋعا ءماجبۇر بولعان ەدى. سويتە تۇرا سوعان سەبەپكەر بولعانداردى دا, بىرەۋلەردىڭ ايتاعىنا ەرگەندەردى دە كەشىرە ءبىلدى. «سولاردىڭ كەيبىرىن اسپيرانت رەتىندە باپتاپ, عىلىم بايگەسىنە قوستىم, ال بيلىك ماڭايىندا بولعاندارعا كەشىرىممەن قارادىم, سول ارقىلى جاسامپازدىق جولعا كوبىرەك كۇش-قۋاتىمدى ارناۋعا مۇمكىندىگىم بولدى» دەپ ەدى بىردە اعىنان جارىلىپ.
تاعى ءبىر ەرەكشەلىگى – ۇلكەنمەن دە, كىشىمەن دە سىيلاسا, ارالاسا, ازىلدەسە ءبىلۋى. كوز جۇمار ساتكە دەيىن ومىرگە قۇشتارلىعىن, بولاشاققا سەنىمىن جوعالتپادى جانە ازىلدەن دە ايىرىلمادى. قايتىس بولارىنان ءۇش كۇن بۇرىن بالاسى الماز ءبىزدى ۆيدەوبايلانىس ارقىلى سويلەستىردى. سوندا قالىپتاسقان ءداستۇر بويىنشا اعا مەن ءىنىنىڭ, ناعاشى مەن جيەننىڭ ءبىر ءازىلىن باستاپ ەدىم, ءحال ۇستىندە جاتقان توكەڭ ازىلگە ازىلمەن جاۋاپ بەرىپ, عاجاپ ءبىر ىشكى رۋحتىڭ سونبەگەنىن كورسەتتى.
تورەگەلدى شارمان ۇلىنىڭ ءومىر جولى – ونەگەلى جول. قاجىرلى ەڭبەك, تەرەڭ ءبىلىم, جاسامپاز قايراتكەرلىك ارقىلى وشپەس ءىز قالدىرعان الىپ تۇلعانىڭ باقيلىق بولۋى تۇتاس ۇلتىمىز ءۇشىن اۋىر قايعى. بىراق توكەڭ قالدىرىپ كەتكەن ءىز, تاعىلىمى مەن ءتالىمى ەل يگىلىگى ءۇشىن قىزمەت جاساي بەرمەك. الىپ تۇلعانىڭ جانى ءجانناتتا, يمانى سالامات بولسىن.
ءاليحان بايمەنوۆ,
استانا مەملەكەت قىزمەت حابىنىڭ توراعاسى
