فوتو: zh-shugylasy.kz
قازىرگى ۋاقىتتا ەرتىس-بايان وڭىرىندە 360 مەكتەپ بار, ولاردا جالپى سانى 116,1 مىڭ وقۋشى ءبىلىم الىپ جاتىر. 9-سىنىپتى بارلىعى 10 778 وقۋشى بىتىرسە, 11-سىنىپ تۇلەكتەرىنىڭ سانى – 4 322 بالا. مەملەكەتتىك مەكتەپ ءبىتىرۋ ەمتيحاندارى 28 مامىر مەن 11 ماۋسىم ارالىعىندا بەس ءپان بويىنشا وتەدى. ال نەگىزگى ۇلتتىق بىرىڭعاي تەستىلەۋدى 16 مامىر مەن 5 شىلدە ارالىعىندا ەلەكتروندى فورماتتا Ustudy تەستىلەۋ ورتالىعىنىڭ ەكى پۋنكت بازاسىندا (پاۆلودار جانە ەكىباستۇز قالالارىندا) وتكىزۋ جوسپارلانعان. ۇبت-عا 3 647 (84,3 پايىزى) تۇلەك قاتىسادى.
ءبىلىم بەرۋ باسقارماسىنان الىنعان مالىمەتتەرگە سۇيەنسەك, سوڭعى 3 جىلدا 11-سىنىپ بىتىرگەن 9 891 تۇلەك نەمەسە 77,2 پايىزى جوعارى وقۋ ورىندارىنا تۇسكەن. ونىڭ ىشىندە 9 553 تۇلەك تەگىن ءبىلىم الىپ جاتىر. الدىڭعى جىلدارمەن سالىستىرعاندا, جوعارى وقۋ ورىندارىنا مەملەكەتتىك ءبىلىم بەرۋ گرانتى بويىنشا تۇسكەن تۇلەكتەر سانى 6,3 پايىزعا ارتقان. تەحنيكالىق جانە كاسىپتىك ءبىلىم بەرۋ ۇيىمدارىنا 2 372 (18,5 پايىز) ادام وقۋعا قابىلدانعان.
وڭىرلىك ءبىلىم بەرۋ باسقارماسى باسشىسىنىڭ ورىنباسارى سامال قادىروۆا اتاپ كورسەتكەندەي, كەيىنگى بەس جىلدا پاۆلودار وبلىسىندا مەكتەپ بىتىرگەندەردىڭ 83 پايىزى ۇبت تاپسىرعان. جىل ساناپ ولاردىڭ ۇلەسى كوبەيىپ, بىلتىر ءتىپتى 89 پايىزعا جەتكەن. بۇرىندارى رەسەيمەن شەكارالاس اۋدانداردىڭ بالالارى وقۋ بىتىرە سالا كورشى ەلدىڭ جوعارى ءبىلىم ورىندارىن جاعالاپ كەتەتىن. بۇل تەرىس ءۇردىس كەيىنگى جىلدارى تومەندەپ كەلە جاتقانى بايقالادى.
– ەلىمىزدىڭ جوعارى وقۋ ورىندارىنا تۇسۋگە نيەت بىلدىرگەندەر سانىنىڭ وڭ ديناميكاسى بايقالىپ وتىر. كەيىنگى 5 جىلدا 16 498 (81,8 پايىز) تۇلەك قازاقستاندىق ءبىلىم ۇيىمدارىنا وقۋعا ءتۇستى. وسى ۋاقىت ارالىعىندا 2 839 تۇلەك شەتەلدە ءبىلىم الۋدى تاڭداعان. ال رەسەي ۋنيۆەرسيتەتتەرى مەن كوللەدجدەرىنە كەيىنگى جىلدارى 2 386 جاس قۇجات تاپسىرعان. اتاپ ايتقاندا, جەلەزين, شارباقتى, تەرەڭكول, ۋسپەن, ەرتىس اۋداندارى بويىنشا الگىندەي جاستار ازايماي تۇر. كەيىنگى جىلدارى مەملەكەتتىك ءبىلىم بەرۋ گرانتتارى مول ءبولىنىپ جاتىر. جىل سايىن حالىقتىڭ الەۋمەتتىك وسال توپتارىنداعى بالالارعا, ونىڭ ىشىندە كوپبالالى نەمەسە تولىق ەمەس وتباسىلارداعى بالالارعا ارنالعان كۆوتالار سانى ارتىپ كەلەدى. سونداي-اق الەۋمەتتىك وسال وتباسىلاردان شىققان بالالارعا رەكتورلىق گرانتتار, قالالار مەن اۋداندار اكىمدەرىنىڭ گرانتتارى, قازاقستان حالقىنا قورىنىڭ گرانتتارى بولىنەدى, – دەيدى س.قادىروۆا.
اتاپ وتەرلىگى, بيىل جازعى كەزەڭدە وبلىس بويىنشا 109 مىڭنان استام وقۋشى دەمالىسپەن جانە جۇمىسپەن قامتىلادى. مەملەكەتتىك لاگەرلەردىڭ ماتەريالدىق-تەحنيكالىق بازاسىن نىعايتۋعا وبلىستىق بيۋدجەتتەن 209,8 ملن تەڭگە ءبولىندى. جالپىعا بىردەي ءبىلىم بەرۋ قورىنىڭ قاراجاتى ەسەبىنەن الەۋمەتتىك وتباسىلاردان شىققان 12 مىڭنان استام بالا دەما-لادى. وڭىردە بالالاردىڭ دەمالىسى مەن جۇمىسپەن قامتىلۋىن ۇيىمداستىرۋ ءۇشىن بارلىق مەكەمەنىڭ مۇمكىندىكتەرى مەن الەۋەتىن جۇمىلدىرا وتىرىپ, كەشەندى تۇردە شارالار قابىلدانىپ جاتىر.
ءبىلىم بەرۋ باسقارماسىنىڭ دەرەگىنشە, 1 ماۋسىمنان باستاپ وڭىردە 782 مەكتەپ جانىنداعى, قالا سىرتىنداعى جانە بەيىندى لاگەرلەر اشىلادى. بۇعان قوسا « ۇلى دالا كەرەمەتى» جوباسى بويىنشا 1000 بالا تاريحي جانە كيەلى جەرلەرگە ساياحات جاسايدى. باياناۋىل اۋدانىندا قانىش ساتباەۆتىڭ 125 جىلدىعىنا ارنالعان «ق.ساتباەۆ – ۇلت ماقتانىشى» اتتى تاقىرىپتىق اۋىسىمدار, «دانا مۇراسى» ەكسپەديتسيالىق جاساقتاردىڭ سلەتى جوسپارلانعان.
پاۆلودار وبلىسى
