وقىتۋ باعدارلامالارى ەڭبەك نارىعىنىڭ سۇرانىستارىنا سۇيەنە وتىرىپ جاسالدى. ماسەلەن, جوبا اياسىندا زاماناۋي ماماندىق – موبيلوگرافيانى دا تەگىن وقۋعا بولادى. ناتيجەسىندە, ولار سمارتفون ارقىلى ءساندى فوتو مەن بەينەجازبالار ءتۇسىرىپ, مونتاجداپ, دايىن كونتەنت جاساۋعا ماشىقتانادى. «Joltap» جوباسىنداعى «موبيلوگرافيا» كۋرسىنىڭ وقىتۋشىسى كامشات قاپاردىڭ سوزىنشە, جاھاندا اقپاراتتىق تەحنولوگيا قارىشتاپ دامىعان سايىن, SMM, موبيلوگراف ماماندىعىنا دا سۇرانىس ارتتى.
– بۇل سالادا جۇرگەنىمە ءۇش جىلعا جۋىقتادى. ياعني SMم-موبيلوگراف بولىپ جۇمىس ىستەيمىن. نەگىزگى ماماندىعىم – زاڭگەر. بىراق ماعان فوتو, بەينەجازبا ءتۇسىرۋ جانە كۇندەلىكتى الەۋمەتتىك جەلىدە بەلسەندى بولعان كوبىرەك ۇنايدى. ونىڭ ۇستىنە قازىر ادامداردىڭ كوپشىلىگى الەۋمەتتىك جەلىنى ۇنەمى قولدانادى. سايكەسىنشە, SMM مەن موبيلوگراف ماماندىعىنا سۇرانىس ەكى ەسە ارتتى. سوندىقتان ءحوببيىمدى نەگىزگى كاسىبىمە اينالدىردىم, – دەدى ول.
التى كۇندىك «موبيلوگرافيا» كۋرسىندا ماماندىققا كىرىسپە, مونتاجداۋ, زاماناۋي بەينەجازبا ءتۇسىرۋ سياقتى تەوريالىق جانە پراكتيكالىق ساباقتار وتەدى. كۋرس بارىسىندا پراكتيكاعا باسا نازار اۋدارىلادى.
– ارقاشان ماماندىق بويىنشا بلوگ جۇرگىزىپ, ءوزىمنىڭ وقۋشىلارىمنىڭ جەتىستىگىمەن ءبولىسىپ وتىرامىن. سودان بولار, ماعان «Joltap» جوباسىنا وقىتۋشى بولۋ تۋرالى ءوتىنىش ءتۇستى. جوبا باستاماشىسى – استانا قالاسىنىڭ اكىمدىگى. جالپى موبيلوگرافيا كۋرسى 6 كۇندىك وقۋدان تۇرادى. العاشقى ساباق «موبيلوگرافياعا كىرىسپە» دەپ اتالادى. وندا ماماندىق تۋرالى تەوريا نەگىزىندە تۇسىندىرەمىن. كەيىن ءفوتوتۇسىرىلىم بويىنشا تاجىريبە بولادى. ياعني ەكىنشى كۇنى بەينەجازبا ءتۇسىرۋدىڭ قىر-سىرىن ۇيرەتەمىن. مونتاج جاساۋ ءادىس-تاسىلدەرىنە دە ءبىر كۇن توقتالامىز. اسىرەسە مونتاج جاساۋعا ارنالعان قوسىمشالارعا توقتالىپ, ساباق بارىسىندا مونتاج جاسايمىز. كۋرستىڭ سوڭعى ساباعى «مونەتيزاتسيا» دەپ اتالادى. ياعني وسى سالادا جۇمىس ىستەگىسى كەلەتىن جاندار ءۇشىن قالاي جۇمىسقا ورنالاسۋعا بولادى, جەكە تاپسىرىس بويىنشا فوتو, بەينە ءتۇسىرىلىمدى قانداي باعاعا ۇسىنۋعا بولاتىنى تۋرالى ايتىلادى. ارتىنشا ستۋدەنتتەر تەست تاپسىرىپ, پورتفوليو قورعايدى. سونداي-اق فوتو, بەينەجازبالارىن كورسەتەدى. ەگەر بارلىق تاپسىرمانى جاقسى ورىنداسا, وندا كۋرستى اياقتاعانى تۋرالى سەرتيفيكات بەرەمىز, – دەدى كامشات قاپار.
كۇنى بۇگىنگە دەيىن موبيلوگرافيا بويىنشا 450-500 شاماسىندا ادام وقىپ شىققان. ءبىر قىزىعى وقۋشىلاردىڭ باسىم بولىگى ءوز ءىسىن جاڭادان باستاعان كاسىپكەرلەر, دەكرەتتەگى انالار مەن ستۋدەنتتەر ەكەن. سوندىقتان جاۋاپتىلار بيىل دا جوبا بويىنشا 10 مىڭ تۇرعىندى جاڭا ماماندىقتارعا وقىتۋدى جوسپارلاپ وتىر.
ايتا كەتەيىك, قاتىسۋشىلاردىڭ تاڭداۋىنا 14 ماماندىق ۇسىنىلعان. ال وقىتۋ باعدارلامالارى 2 اپتادان 1 ايعا دەيىنگى قىسقا مەرزىمدە پراكتيكالىق داعدىلاردى ۇسىنۋعا باعىتتالعان.
